මධ්යම පළාතේ පශු වෛද්ය කොට්ඨාස වල සේවය කළ වෛද්යවරු 11 දෙනෙකු පසුගිය කාලය තුළ රට හැර යෑම හේතුවෙන් මේ වනවිට කොට්ඨස 06 ක කිසිදු පශු වෛද්යවරයෙකු නොමැති තත්ත්වයක් මතුව තිබෙන බවත් රජයේ පශු වෛද්ය නිලධාරීන් ගේ සංගමයේ මධ්යම පළාත් සභාපති පශු වෛද්ය සමිත මීගහකොටුව පවසයි.
පළාත තුළ පශු වෛද්යවරු 87 දෙනෙකු සිටිය යුතු වුවත් මේ වනවිට සේවයේ සිටින්නේ 46 දෙනෙකු පමණක් බවත් ඒ අතරින් ද වෛද්යවරු කිහිප දෙනෙකු කාර්යාල සේවයට අනුයුක්තව සිටින නිසා ක්ෂේත්ර රාජකාරි වලට ප්රමාණවත් වෛද්යවරු නොමැතිව කිරි ගොවීන් දැඩි අසීරුතාවට පත්ව සිටින බවත් ඒ සභාපතිවරයා කීය.
සත්ත්ව නිෂ්පාදන හා සෞඛ්ය දෙපාර්තමේන්තුවේ මධ්යම පළාත් අධ්යක්ෂවරිය ඇතුළු පරිපාලනය මෙම ගැටලු විසඳීමට විධිමත් ක්රියාමාර්ගයක් නොගන්නා බව පවසමින් ඊට විරෝධය දක්වා රජයේ පශු වෛද්යවරු ඊයේ (14) අසනීප නිවාඩු වාර්තා කරමින් සේවයට නොපැමිණිය හ.
රජයේ පශු වෛද්ය නිලධාරීන් ගේ සංගමයේ මධ්යම පළාත් සමාජිකයින් සත්ත්ව නිෂ්පාදන හා සෞඛ්ය දෙපාර්තමේන්තුවේ මධ්යම පළාත් කාර්යාලය ඉදිරිපිටට පැමිණ විරෝධතාවක නිරතවීමෙන් අනතුරුව මාධ්ය හමුවේ අදහස් දක්වමින් සමිත මීගහකොටුව පවතින ප්රශ්නය නිවැරදිව තේරුම් නොගෙන පරිපාලනය විසින් පශු වෛද්යවරුන්ට හිතුමතේ ස්ථාන මාරු ලබාදීම හේතුවෙන් ඔවුන් මානසික වශයෙන් දැඩි කම්පනයකට ලක්ව සිටින බවත් කීය.
වැඩ ප්රමාණය අධික වීමත් පරිපාලනය විසින් ගන්නා අත්තනෝමතික තීරණ නිසාත් පීඩාවට පත්වන පශු වෛද්යවරුන්ට අකමැත්තෙන් වුවත් රජයේ සේවයට සමුදීමට සිදුව තිබෙන බව ද හෙතෙම අවධාරණය කළේය.
මේ සම්බන්ධව කළ විමසීමක දී සත්ත්ව නිෂ්පාදන හා සෞඛ්ය දෙපාර්තමේන්තුවේ මධ්යම පළාත් අධ්යක්ෂ වෛද්ය කුමුදුනී රාජනායක පැවසුවේ මධ්යම පළාතේ කිරි නිෂ්පාදනයට වැඩිම දායකත්වය ලබාදෙන නුවරඑළිය දිස්ත්රික්කයේ පශු වෛද්ය කොට්ඨාස ගණනාවක ම සේවය සඳහා පශු වෛද්යවරු නොමැතිවීම නිසා කිරි ගොවීන් දැඩි දුෂ්කරතාවට පත්ව සිටින බවයි.
රාජ්ය සේවයෙන් නිවාඩු ලබා විදේශ ගතවීම සඳහා අවසර ලබාදීමත් සමඟ මධ්යම පළාත් පශු වෛද්යවරු ගණනාවක් විදේශ ගතවීම සඳහා ඉල්ලීම් ඉදිරිපත් කළත් තමන් ඊට අවසර නොදුන් බවත් ඒ අතරින් 09 දෙනෙකු රැකියාවෙන් ඉල්ලා අස්වී විදේශ ගත වූ බවත් ඇය පැවසුවාය.
විශේෂයෙන් නුවරඑළිය දිස්ත්රික්කයේ මස්කෙළිය කොට්ඨාසයේ කිරි ගොවීන් විශාල පිරිසක් සිටින බවත් විදේශ රට වලින් ආනයනය කළ මිල අධික කිරි දෙනුන් සිටින බැවින් මස්කෙළියට පශු වෛද්යවරයෙකු ගේ සේවය අත්යවශ්යය බවත් කී අධ්යක්ෂවරිය මේ වනවිට එම කොට්ඨාසයේ එකදු වෛද්යවරයෙකු හෝ නොමැති බව ද අවධාරණය කළාය.
කුණ්ඩසාලේ කොට්ඨාසයේ සිටින වෛද්යවරු දෙදෙනාගෙන් එක් අයෙකු මස්කෙළියට මාරු කළත් ඔහු පසුගිය ජූනි මස සිට විවිධ හේතු දක්වමින් සේවයට වාර්තා නොකර සිටින බවත් මේ නිසා එම වෛද්යවරයා ගේ වැටුප් අත්හිටුවීම අවශ්යය පියවර ගෙන තිබෙන බවත් ඇය පැවසුවාය.
පශු වෛද්යවරුන් ගේ හිඟය සම්බන්ධව රජයේ අවධානය යොමුව තිබෙන බවත් විශ්රාම ගොස් සිටින පශු වෛද්යවරු කොන්ත්රාත් පදනම මත බඳවා ගැනීමට කටයුතු කරමින් සිටින බවත් අමාත්ය මහින්ද අමරවීර ද පශු වෛද්යවරු බඳවා ගැනීම සඳහා කැබිනට් මණ්ඩලයට යෝජනාවක් ඉදිරිපත් කර තිබෙන බවත් ඇය පැවසුවාය.
රජයේ පශු වෛද්ය නිලධාරීන් ගේ සංගමයේ සාමාජික ජ්යෙෂ්ඨ පශු වෛද්ය ඩබ්ලිව්.කේ.ආර් දයානන්ද මෙහි දී අදහස් දැක් වූවේය.
