ලබන 21 වැනිදා පාසල් ආරම්භ කරන පාසල්වලට පැමිණෙන ගුරුවරුන්ට සහ සිසුන්ට බාධා කරන බාහිර පිරිස් වේ නම් ඔවුන් සම්බන්ධයෙන් ක්‍රියා කරන ලෙසත් අදාළ තොරතුරු සොයා බැලීම සඳහා පාසල් ආසන්නයේ බුද්ධි නිලධාරීන් යොදවන ලෙසත් බස්නාහිර පළාත් පොලිස් ස්ථානාධිපතිවරුන්ට උපදෙස් ලබා දී තිබේ.
දිවයිනේ සිසුන් 200ට අඩු පාසල් ලබන 21 වැනිදා විවෘත කිරීමට මේ වනවිට රජය විසින් කටයුතු යොදා ඇත. එහිදී පවතින ගුරු වර්ජනය හේතුවෙන් පාසල් පැමිණෙන ගුරුවරුන්ට යම් බාහිර පිරිස් බාධා කරයිනම් ඔවුන් සම්බන්ධයෙන් ක්‍රියා කිරීමට මේ අනුව උපදෙස් ලැබී ඇති බව පොලිස් ආරංචි මාර්ග පවසයි.
එසේම පාසල් ආරම්භ කිරීමට පෙර අදාළ පාසල්වල තත්ත්වය සම්බන්ධයෙන් තොරතුරු ලබා ගැනීම, විදුහල්පතිවරයා සහ ගුරුවරුන් කවුද යන්න පිළිබඳව පොලිසිය දැනුවත් වීම නිසි සෞඛ්‍යාරක්ෂක පහසුකම් පාසලේ පවතින්නේද යන්න පිළිබඳව සොයා බැලීමට පොලිසියේ ඉහළ නිලධාරීන් වෙතින් පොලිස් ස්ථානාධිපතිවරුන් දැනුවත් කොට තිබේ.
පසුගිය 14 වැනිදා බස්නාහිර පළාත් ජේෂ්ඨ නියෝජ්‍ය පොලිස්පතිවරයාගේ ප්‍රධානත්වයෙන් පැවති සාකච්ඡාවකින් අනතුරුව පළාතේ පොලිස් ජනාධිපතිවරුන්ට මෙම උපදෙස් ලැබී ඇත.
මෙම පාසල් විවෘත කළ හැකි ආකාරයට පිරිසිදු කර තිබේද යන්න පිළිබඳවද සොයා බලන ලෙස උපදෙස් ලබා දී ඇති අතර මුව ආවරණ සබන් අත්සෝදන දියර, ජල පහසුකම් නොමති පාසල් වේ නම් ප්‍රදේශයේ දානපතියන්ගේ සහයෙන් මෙම ද්‍රව්‍ය ලබා දෙන ලෙසද ඔවුන්ට උපදෙස් ලැබී ඇත.
මෙම උපදෙස් අතර විශේෂයෙන් පොලිස් ස්ථානාධිපතිවරුන් වෙත අවධාරණය කර ඇති කරුණක් වන්නේ පාසල් විවෘත කිරීමේ තීරණයට විරෝධය පළකරන හෝ බාධා කරන පුද්ගලයන් හෝ කණ්ඩායම් වේ නම් ඔවුන් සම්බන්ධයෙන් අවබෝධයෙන් සිට ඒ සම්බන්ධයෙන් අවශ්‍ය පියවර ගන්නා ලෙසය.
මේ සඳහා අවශ්‍ය වේ නම් ප්‍රදේශයේ සිවිල් ආරක්ෂක කමිටුවල සහය ලබා ගන්නා ලෙසද පොලිස් ස්ථානාධිපතිවරුන්ට උපදෙස් ලබා දී ඇති බව පොලිස් ආරංචි මාර්ග සඳහන් කළේය.
Discussion about this post