ජෙනරාල් ශවේන්ද්ර සිල්වා, ජෙනරාල් ජගත් ජයසූරිය, අද්මිරාල් ඔෆ් ද ෆ්ලීට් වසන්ත කරන්නාගොඩ, සහ හිටපු එල්.ටී.ටී.ඊ නායක විනගාමූර්ති මුරලිදරන්ට එරෙහිව එක්සත් රාජධානිය විසින් පනවා ඇති සම්බාධක පිළිබඳව රජයේ නිල ප්රකාශය අද (26) සවස විදේශ කටයුතු අමාත්යාංශ විසින් ප්රකාශයට පත් කරනු ඇතැයි කැබිනට් මාධ්ය ප්රකාශක වෛද්ය නලින්ද ජයතිස්ස පැවසුවේය.
ඔහු පැවසුවේ මින් පෙර අවස්ථා ගණනක දී විවිධ රජයන් විසින් ශ්රි ලංකාවේ විවිධ පුද්ගලයින් සම්බන්ධව මෙවැනි සම්බාධක පනවා ඇති අතීතයක් ඇති බවය. කැබිනට් මාධ්ය ප්රකාශකවරයා ඒ සම්බන්ධව මෙසේ සිහි කළේය.
“2020 පෙබරවාරි 1 වැනිදා ඇමරිකා එක්සත් ජනපදය ශවේන්ද්ර සිල්වාට ඔහුගේ පවුලේ සමීපතමයින්ට එක්සත් ජනපදයට ඇතුළුවීම තහනම් කළා. 2021 දෙසැම්බර් 10 නාවික බුද්ධි නිලධාරී චන්දන හෙට්ටිආරච්චි සහ මාණ්ඩලික සැරයන් සුනිල් රත්නායක සහ ඔවුන්ගේ ආසන්නම පවුලේ සාමාජිකයින්ට එක්සත් ජනපදයට ඇතුළුවීම තහනම් කළා. 2022 දෙසැම්බර් 09 ඇමරිකා එක්සත් ජනපදය මේජර් ප්රභාත් බුලත්වත්තට සහ ඔහුගේ ආසන්නම පවුලේ සාමාජිකයින්ට එක්සත් ජනපදයට ඇතුළුවීම තහනම් කළා විතරක් නොවෙයි, දේපල අවහිර කිරීමකුත් සිද්ධ කරලා තියනවා.”
“2023 දි ගෝඨාභය රාජපක්ෂ, මහින්ද රාජපක්ෂ, මාණ්ඩලකි සැරයන් සුනිල් රත්නායක, ලුතිනන් කමාන්ඩර් චන්දන හෙට්ටිආරච්චි කියන අයට කැනඩාවට ඇතුළුවීම තහනම් කරලා කැනඩාවේ වත්කම් තහනම් කරලා තියනවා. 2023 අප්රෙල් 27 ඇමරිකා එක්සත් ජනපදය වසන්ත කරන්නාගොඩටම ඇමරිකා එක්සත් ජනපදයට ඇතුළත් වීම තහනම් කරලා තියනවා.”
“2024 දෙසැම්බර් 10 ඇමරිකා එක්සත් ජනපදය ශ්රි ලංකන් ගුවන් සේවාවේ හිටපු ප්රධාන විධායක නිලධාරී කපිල චන්ද්රසේන සහ රුසියාවෙ හිටපු තානාපති උදයංග වීරතුංගට සහ ඔවුනගේ ආසන්නම පවුල්වල සාමාජිකයින්ට එක්සත් ජනපදයට ඇතුළත්වීම තහනම් කරලා තියනවා.”
” එහි තවත් පියවරක් හැටියට තමයි 2025 මාර්තු 24 එක්සත් රාජධානිය විසින් ශවේන්ද්ර සිල්වා, වසන්ත කරන්නාගොඩ, ජගත් ජයසූරිය සහ විනයාග මූර්ති මුරලදරන්ට එක්සත් රාජධානියට ඇතුළත් වීමටත් වත්කම් අත් හිටුවීමත් තීරණයක් අරන් ප්රකාශයට පත් කරලා තිබෙන්නේ. එම තීන්දුව සම්බන්ධයෙන් රජයේ ස්ථාවරය අද විදේශ කටයුතු අමාත්යාංශය මගින් ප්රකාශයට පත් කරනවා.”
