පකිස්ථාන මැද පෙළ ක්රීඩක සවුද් ශකීල් ගේ ක්රිකට් වික්රමය පකිස්ථානු කණ්ඩායම මහා ප්රබල තැනකට ඔසවා තබා තිබේ. සවුද් නොදැවී ද්විත ශතකයක් ලබා ගත්තේය. ඔහු රැස් කර ලකුණු 208 මොනතරම් සංයමයකින් රැස් කළ ලකුණු ප්රමාණයක් දැයි වැටහෙන්නේ ඔහුගේ පිතිකරණ ස්වරූපය දෙස බැලූ කලය. පන්දු 361කට මුහුණ දුන් සවුද් ලකුණු 208ට හතරේ පහර 19ක් එල්ල කළේය. එක් හයේ පහරක්වත් ඒ ටෙස්ට් ඉනිමේ නැත.
ශ්රී ලංකාවට ප්රබල අභියෝගයක් ලබා දෙමින් ගාල්ලේ දී මෙවැනි ජයග්රාහී උසකට ශකීල් විසින් ඔසවා තබන්නේ ලකුණු 101කට කඩුළු 05ක් දැවී සිටි පකිස්ථාන කණ්ඩායමය. මේ ලකුණු සංඛ්යාවට ශක්තිමත් පදනම එක් කරන්නේ 6 වැනි කඩුල්ල වෙනුවෙන් සවුද් සමග එක්ව ලකුණු 171ක සබඳතාවයක් ගොඩනැගූ අඝා සලමන්ය.
සලමන් දැව ගිය පසු තනිවම ඉනිම හැසිරවූ සවුද් සිය ද්විත්ව ශතකය කරා ගියේය. විශිෂ්ටත්වය වන්නේ සලමන් දැවී ගිය පසු සවුද් එක් අන්තයක් ආරක්ෂා කරගෙන ලකුණු 183ක් කණ්ඩායමට එක් කරමින් තමන් දිවිත්ව ශතකය කරා යෑමය.
සලමන් දැවි ගිය පසු පිටියට පැමිණි අනෙක් ක්රීඩකයින් සිවු දෙනාම ලබා ගත්තේ ලකුණු 50ක් පමණි. මේ කාලය තුළ සවුද් විසින් තනිව කණ්ඩායමට එක්කළ ලකුණු ප්රමාණය සියයකට වැඩිය. ඔහු දිවිත්ව ශතකයට යන්නේ ඒ තරම් ස්ථාවර ලෙසය.
ගාල්ල වර්ණවත් කළ ඒ ටෙස්ට් ඉනිම එතරම් රමණීය ය.
හොඳම පන්දු යැවීම රමේෂ් මෙන්ඩිස්ගෙනි. ඔහු ලකුණු 136ට කඩුළු 05ක් බිඳ හෙළුවේය.
ප්රභාත් ජයසූරිය ලකුණු 145ට කඩුළු 03කි. විශ්ව ප්රනාන්දු සහ කසුන් රාජිත කඩුල්ල බැගින් බිඳහෙළූහ.
දෙවැනි ඉනිම ක්රීඩා කරන ශ්රී ලංකා කණ්ඩායම පකිස්ථානයට වඩා ලකුණු 135ක් පිටුපසිනි.
නිශාන් මධුෂ්ක නොදැවී ලකුණු 08ක් සහ නායක දිමුත් කරුණාරත්න නොදැවී ලකුණු 06ක් ලබාගෙන කඩුල්ලේ හිඳී.
හෙට දිනය ශ්රී ලංකා කණ්ඩායමට තීරණාත්මකය.
ගාලු ක්රීඩාංගනයේ දී දෙවැනි ඉනිමක ලකුණු 149ක් හඹා ගොස් අභියෝගාත්මක ඉලක්කයක් ප්රතිවාදීන්ට ලබා දීම කිසිසේත්ම පහසු කටයුත්තක් නොවේ.
මුලින්ම පන්දුවට පහර දුන් ශ්රී ලංකා කණ්ඩායම ලකුණු 312ක් ලැබුවේය. ධනංජය ද සිල්වා ලකුණු 122ක් ලැබුවේය.
ශ්රී ලංකා ක්රීඩා ලෝලීන් උපේක්ෂාසහගතව සිටින්නේ කාසියේ වාසිය දිනාගෙන සිය වාසනාවන්ත ක්රීඩාංගනයේ දී තරග වදින ශ්රී ලංකා කණ්ඩායමේ හැසිරීම දෙසය.
