සූරියවැව නුවන් ජයසේකර –
හම්බන්තොට මහේස්ත්රාත් අධිකරණයේ පැවති නඩුවකට අදාලව දඩ මුදලක් ගෙවීම සදහා ව්යාජ රුපියල් 5000 නොට්ටුවක් ලබා දුන් කාන්තාවක උසාවි පොලිස් නිළධාරීන් විසින් ඊයේ (23) සවස අත්අඩංගුවට ගෙන හම්බන්තොට පොලිස් ස්ථානය වෙත ඉදිරිපත් කර තිබේ.
මෙලෙස අත්අඩංගුවට ගෙන ඇත්තේ අම්බලන්තොට, බැරගම, පදිංචි 28 හැවිරිදි කාන්තාවකි.
අදාල කාන්තාව විසින් නඩුවකට අදාලව ගෙවිය යුතුව තිබූ රුපියල් 8000/= දඩ මුදලක් ගෙවිමට මහේස්ත්රාත් අධිකරණයේ මුදල අයකැමි වෙත රුපියල් 5000/= නොට්ටුවක්ද සමග මුදල් ලබා දි තිබේ.
එහිදී අධිකරණයේ මුදල් අයකැමිවරිය විසින් එම මුදල යන්ත්රයට දමා ගණනය කරන අවස්ථාවේ එම මුදල ව්යාජ එකක් බවට තහවුරු විම හේතුවෙන් ඇය විසින් මේ පිළිබදව අධිකරණ පොලිස් නිළධාරින් දැනුවත් කර ඇත.
පසුව එම නිළධාරීන් විසින් අදාල කාන්තාව වැඩිදුර විමර්ශනය කටයුතු සඳහා අත්අඩංගුවට ගෙන හම්බන්තොට පොලිසියට බාර දි තිබේ.
අත්අඩංගුවට පත් සැකකාරියගෙන සිදුකල මුලික ප්රශ්න කිරීමේදි ඇය පවසා ඇත්තේ තමන්ට මෙම මුදල් නෝට්ටුව ලැබුණු අකාරය පිළිබදව නොදන්නා බවය. සිද්ධිය පිළිබදව හම්බන්තොට මුලස්ථාන පොලිසිය වැඩිදුර විමර්ශන පවත්වයි.
