මේ වනවිට රජය බහු විධ සේවා අත්‍යාවශ්‍ය සේවා ලෙස නම් කර ඇති බවත් රටේ අත්‍යාවශ්‍ය සේවාවන් කඩාකප්පල් කිරීමේ ඕනෑම ක්‍රියාවක් දේශද්‍රෝහී ක්‍රියාවක් ලෙස නම් කර දැඩි ක්‍රියාමාර්ග ගන්නා බත්ව කැබිනට් ප්‍රකාශක අමාත්‍ය බන්දුල ගුණවර්ධන පවසයි.
හෙට ආරම්භ වීමට නියමිත දීප ව්‍යාප්ත දැවැන්ත වැඩ වර්ජනයට රජය පාර්ශවයෙන් අනතුරු අඟවමින් කැබිනට් ප්‍රකාශකවරයා කීවේ රටට අත්‍යාවශ්‍ය විස්තීරණ අරමුදල් පහසුකම පිළිබඳව තීරණය ගැනීමට IMF අධ්‍යක්ෂවරුන් 20 වැනිදා රැස්වන පසුබිමක එම ක්‍රියාවලිය ය කඩාකප්පල් කිරීමට කිසිසේත් ඉඩ දිය නොහැකි බවය.
මේ වනවිට රජය බහුවිධ සේවා අත්‍යවශ්‍ය සේවා ලෙස ප්‍රකාශයට පත් කර ඇති බවත් එය කඩකළොත් පවතින නිතිය මත නීත්‍යානුකූලව දැඩි ක්‍රියාමාර්ග ගන්නා බවත්ය.
මින් පෙර රජය වෙනුවෙන් ප්‍රකාශයක් නිකුත් කරමින් පාර්ලිමේන්තු මන්ත්‍රී වජිර අබේවර්ධන අනතුරු ඇඟවූයේ අත්‍යාවශ්‍ය සේවා පනතට අනුව එම සේවා කඩ කරන අයගේ දේපල අත්පත් කරගෙන රාජ සන්තක කළ හැකි තරම් නීති ශක්තිමත් බවය.
කෙසේ වෙත්ත රජයේ වෛද්‍ය නිලධාරීන්ගේ සංගමය විසින් සඳුදා (13) ආරම්භ කළ වෘත්තීය සමිති ක්‍රියාමාර්ගය අද (14) පළාත් පහක් පුරා ක්‍රියාත්මක වෙමින් ඇති අතර අතර හෙට (15) රට පුරා ක්‍රියාත්මක වීමට නියමිතය.
සමස්ත ලංකා හෙද සංගමය හෙට (15) වෛද්‍ය වැඩ වර්ජන ක්‍රියාමාර්ගයට සහාය දෙන බව පැවසීය.
සැලසුම් කර ඇති පරිදි හෙට (15) වෘත්තීය ක්‍රියාමාර්ගයක නිරත වන බව ඒකාබද්ධ තැපැල් සේවා වෘත්තීය සමිති පෙරමුණ කීවේය.
මධ්‍යම තැපැල් හුවමාරුවේ සේවකයින් අද (14) පස්වරු 4 සිට රාජකාරීවලින් ඉවත් වන්නේ තැපෑල අත්‍යාවශ්‍ය සේවාවක් ලෙස අලුතින්ම ප්‍රකාශයට පත් කර තිබියදී ය,
තවත් අත්‍යාවශ්‍ය සේවාවක් ලෙස ගැසට් කර තිබෙන ප්‍රවාහන සේවය නියෝජනය කරන ශ්‍රී ලංකා දුම්රිය සේවයේ ලොකොමෝටිව් ඔපරේටින් ඉංජිනේරු සංගමය පැය 24ක වැඩ වර්ජනයක් ප්‍රකාශයට පත් කළේය. වර්ජනය අද (14) මධ්‍යම රාත්‍රියේ සිට ක්‍රියාත්මක වේ.
විශ්වවිද්‍යාල ආචාර්යවරුන්ගේ සමිති සම්මේලනයේ සභාපති මහාචාර්ය ශ්‍යාම් කුමාර බන්නැහැක පැවසුවේ, FUTA සාමාජිකයන්ගේ වර්ජනය සියලුම රජයේ විශ්වවිද්‍යාල හරහා අඛණ්ඩව ක්‍රියාත්මක කරන බවයි.
විශ්වවිද්‍යාල අනධ්‍යන කාර්ය මණ්ඩලය ද ඇතුළත් විශ්වවිද්‍යාල වෘත්තීය සමිති ඒකාබද්ධ කමිටුවද හෙට 15 වැඩවර්ජනයට එක්වන බව නිවේදනය කළේය.
ශ්‍රී ලංකා වරාය අධිකාරියේ වෘත්තීය සමිති ද හෙට (15) පැවැත්වෙන වෘත්තීය ක්‍රියාමාර්ගයට සහය පළ කරන බව නිවේදනය කර ඇත.
ලංකා විදුලිබල මණ්ඩල සේවක සංගමයේ ප්‍රධාන ලේකම් රංජන් ජයලාල් පැවසුවේ, රටපුරා පැවැත්වෙන වෘත්තීය සමිති ක්‍රියාමාර්ගයට සහය දැක්වීම සඳහා සියලුම ලංවිම සේවකයින් හෙට (15) අසනීප වාර්තා කරන බවයි.
බදු ප්‍රතිපත්තියට එරෙහි විරෝධතාවලට සහය දැක්වීමට ලංකා විදුලිබල මණ්ඩල ඉංජිනේරු සංගමය තීරණය කර තිබේ.
ලංවිම ඉංජිනේරුවන් අද (14) සිට සතියක කාලයක් අකුරට වැඩ ව්‍යාපාරයක නිරත වන අතර ඔවුන් අසනීප නිවාඩු වාර්තා කරන බව ලංවිම ඉංජිනේරු සංගමයේ සම ලේකම් බුද්ධික විජයවර්ධන මාධ්‍යයට කීවේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
අනම්‍යව සිටිමින් රජය මේ වෘත්තීය සමිති විරෝධය මර්ධනය කිරීමේ සැලසුමක නරත වී ඇත.
