මහ මැතිවරණ දිනය හා මනාප අංක නිකුත් කිරීම සම්බන්ධයෙන් අවසන් තීරණයක් ගැනීම සඳහා මැතිවරණ කොමිෂන් සභාව අද (20) පැවැත්වූ සාකච්ඡාව තීරණයකින් තොරව අවසන් වූ අතර එහි විශේෂත්වය වූයේ නිරෝධායන චෝදනාවකට ලක්ව සිටි කොමිසමේ සාමාජික මහාචාර්ය රත්නජීවන් හූල් යාපනයේ පිහිටි සිය නිවසේ සිට වීඩියෝ තාක්ෂණය ඔස්සේ මෙම සාකච්ඡාවට එක් වීමය.
මැතිවරණ කොමසාරිස් මහින්ද දේශප්‍රියගේ ප්‍රධානත්වයෙන් රාජගිරිය මැතිවරණ දොපාර්තමේන්තුවේ දී අද සවස පැවති මෙම සාකච්ඡාව පැයකට අධික කාලයක් පැවති අතර මැතිවරණය පැවැත්වීම පිළිබඳ එහි සාමාජිකයන් විවිධ මත ඉදිරිපත් කරන්නට විය.
කෙසේ වෙතත් මේ සම්බන්ධයෙන් අධිකරණ තීන්දුව ප්‍රකාශයට පත් කිරීමෙන් පසු කොමිසම නැවතක වතාවක් රැස් වී අවසන් තීන්දුවක් ගත යුතු බව බහුතර මතය විය. ඒ අනුව ශ්‍රේෂ්ඨාධිකරණයේ තීන්දුව ප්‍රකාශයට පත් කිරීමෙන් පසු නැවත රැස් විය යුතු බව කොමිසම තීරණය කළේය.
මෙම සාකච්ඡාවට මැතිවරණ කොමිසමේ සාමාජික රත්නජීවන් හූල්ට සහභාගී වීමට නොහැකි වූයේ නිරෝධායන චෝදනාවක් ඔහුට එල්ලවීම හේතුවෙනි.
රත්නජීවන් හූල් ගේ දියණිය විදේශගතව සිට පැමිණි පසු යාපනයේ පිහිටි සුපිරි හෝටලයක දින 12ක් නිරෝධායනය වූවාය. එම නිරෝධායන කාල සීමා පසුගිය 18 වැනිදා අවසන් විය. එහෙත් ඇය තව දින 14 ක් නිරෝධායනය විය යුතු බවට සෞඛ්‍ය අංශ උපදෙස් ලබා දී තිබිණි.
සෞඛ්‍ය අංශ මගින් ලබා දෙන ලද එම උපදෙස් අනුව ඇය 18 වැනිදා නල්වූර් පිහිටි ඇගේ නිවසට නිරෝධායනය සඳහා යා යුතු වුවත් ඇය කෙලින්ම තම පියා සමග පැමිණියේ රාජගිරිය පිහිටි මැතිවරණ දෙපාර්තමේන්තුවටය.
පසුගිය සඳුදා (18) හා අඟහරුවාදා (19) දෙදින තුළම ඇය එම දෙපාර්තමේන්තුවට පැමිණ ඇති අතර ඊයේ (19) ඇය නිරොි්ධායනය නොවී පැමිණ සිටින බව දැනගත් රාජගිරිය මැතිවරණ දෙපාර්තමේන්තුවේ නිලධාරීන් හා සුලු සේවකයන් දැඩි බියට පත්ව ඒ සම්බන්ධයෙන් පියාට හා දියණියට දැඩි සේ චෝදනා එල්ල කරනු ලැබුවේය.
කෙසේ වෙතත් අවසානයේ මේ සම්බන්ධව සෞඛ්‍ය පරීක්ෂක නිලධාරීන් හා අදාල අංශවෙත මැතිවරණ දෙපාර්තමේන්තු සේවකයින් පැමිණිලි කර සිය විරෝධය පල කළේය. අනතුරුව සෞඛ්‍ය අංශ නිලධාරීන් හා කොළඹ නගර සභා නිලධාරීන් පැමිණ තත්වය පරීක්ෂා කර බලා මැතිවරණ දෙපාර්තමේන්තුව ජීවානුහරණයට ලක් කිරීමට පියවර ගත්තේය.
මැතිවරණ දෙපාර්තමේන්තුවේ සුලු සේවකයන්ගේ දැඩි විරෝධය මැද ඉහළ නිලධාරීන්ගේ මැදිහත් වීමෙන් රත්නජීවන් හූල්ට සිය දියණිය රැගෙන එදිනම යාපනය බලා යෑමට සිදු විය.
මහචාර්ය රත්නජීවන් හූල් පසුගිය කාලයේ මැතිවරණය කඩිමුඩියේ පැවැත්වෙනවාට දිගින් දිගටම දැඩිව විරුද්ධ වූයේය. ඔහු මෙය මැතිවරණ දෙපාර්තමේන්තුවට නිරෝධායනයට ලක් කිරීම මැතිවරණය කල් දැමීමට ගත් උපායශීලී පියවරක් වන බවත් එම දෙපාර්තමේන්තුවේ නිලධාරීන් අතර කතාබහට ලක්ව ඇත.
