2019 අප්‍රියෙල් 21 වැනිදා සිදුවූ පාස්කු ඉරිදා ප්‍රහාරයන්ගෙන් හානියට පත් පාර්ශ්වයන්ට සහන සැළසීමට ජාත්‍යන්තර මුස්ලිම් සංවිධානයක් විසින් එවකට හිටපු ජනාධිපති මෛත්‍රීපාල සිරිසේනට ලබාදුන් ඇමරිකානු ඩොලර් මිලියන 05ක චෙක්පතේ මුදලින් බෝම්බ පිපිරුමෙන් හානි වූ කිසිවෙකුටත් මෙතෙක් දායකත්වයක් ලැබී නැති බව අගරදගුරු පදවියේ සමාජ සුභසාධන ආයතනයක් වන සෙත්සරණ නම් වූ ආයතනයේ අධ්‍යක්ෂ දොන් නිශාන්ත ලෝරන්ස් රාමනායක පියතුමා ඊයේ පාස්තු ප්‍රහාරය සම්බන්ධයෙන් සොයා බලන ජනාධිපති කොමිසම හමුවේ සාක්ෂි දෙමින් අනාවරණය කළේය.
පාස්කු ප්‍රහාරයෙන් හානියට පත්වූ ජනතාවගේ සුභ සාධන කටයුතු සියල්ල සොයා බලා කටයුතු කරනුයේ සෙත් සරණ ආයතනය විසිනි. ඒ බව කොමිසමේ දී සඳහන් විය. කොමිසම හමුවේ ලෝරන්ස් රාමනායක පියතුමන් සඳහන් කරනු ලැබුවේ ඩුබායි හි මුස්ලිම් සංවිධානයක් කොළඹ නෙළුම් පොකුණේ උත්සවයක් පවත්වමින් ඩොලර් මිලියන පහක ප්‍රදානය සංකේතවත් කරමින් ඩමි චෙක්පතක් මෙම උත්සවයේ දී හිටපු ජනාධිපතිවරයා වෙත ප්‍රදානය කළ බවය. එහෙත් එම මුදලට කුමක් සිදුවීදැයි මෙතෙක් සොයා ගැනීමට නොමැති බවත් අගරදගුරු හිමිපාණන් හමුවීමට එකල රජයේ සිටි කතෝලික ඇමතිවරුන්ට පවා උන් වහන්සේ ඒ ගැන දැනුම් දුන් බවක් පියතුමා සඳහන් කළේය.
කොමිසම හමුවේ තවදුරටත් කරුණු දැක්වූ ලෝරන්ස් පියතුමා මෙසේ කීහ..
“ ඩුබායි රාජ්‍ය යේ මුස්ලිම් සංවිධානය නෙළුම් පොකුණ රඟහලේදී ලබා දුන් ඩොලර් මිලියන 05 ක මුදලින් කිසිදු දායකත්වයක් බෝම් ප්‍රහාරයෙන් හානියට පත් ජනතාවට ලැබුණේ නැහැ. මේ ගැන අගරදගුරු හිමිපාණන් උන්වහන්සේ බැහැ දැකීමට පැමිණි කතෝලික ඇමතිවරුන්ට සඳහන් කරල තිබුණා. එම ප්‍රදානය ලබාදුන් සංවිධානයේ පිරිස්ද එම උත්සවයට පෙර පැමිණ අගරදගුරුතුමාව හමුවෙලා මුදල් පරිත්‍යාගයක් කරන බව පවා දැනුම්දී තිබුණා. මේ ගැන රවී කරුණානායක ඇමතිවරයාටත් පවසල ඒ ගැන සොයා බලන්න යැයි සඳහන් කළා. එම අවස්ථාවේදී රවී කරුණානායක ඇමතිවරයා කිසියම් අයෙක්ට දුරකතන ඇමතුමක් ගත්තා. එම ඇමතුම කාට දුන්නද කියල දන්නේ නැහැ. අවසානයේදී රවී කරුණානායක ඇමතිවරයා සඳහන් කළේ එහෙම දෙයක් දැනගන්න නැහැ. හොයල කියන්නම් කියල. “
ඒ ගැන සොයා බලන ලෙස අගරදගුරුතුමන් ද ඉල්ලීමක් කර ඇතත් තවමත් ඒ පිළිබද විභාගයක් සිදු නොවූ තැන අවසානයේ දී කොමිසමටත් සඳහන් කළ බව ද ලෝරන්ස් රාමනායක පියතුමා තවදුරටත් සඳහන් කළේය.
බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරීශ්‍රයේ බිම් මහලේ රූබි ශාලාවේ ස්ථාපිත කර ඇති පංච පුද්ගල ජනාධිපති කොමිසන් සභාව රැස්වූයේ එහි සභාපති අභියාචනාධිකරණ විනිසුරු ජනක් ද සිල්වා මහතා ගේ ප්‍රධානත්වයෙනි. අභියාචනාධිකරණ විනිසුරු බන්දුල කරුණාරත්න, විශ්‍රාමික අභියාචනාධිකරණ විනිසුරුවරුන් වන සුනිල් රාජපක්ෂ, බන්දුල අතපත්තු යන මහත්වරු සහ විශ්‍රාමික අධිකරණ අමාත්‍යාංශයේ ලේකම් මංගලිකා අධිකාරී මහත්මිය කොමිසමේ සෙසු සාමාජිකයන්ය. කොමිසමේ ලේකම් ලෙස කටයුතු කරන්නේ බුවනෙක හේරත් මහතාය.
පාස්කු ප්‍රහාරයෙන් විනාශයට පත් දේපල හා බිඳවටුණු ජන ජිවිතය යථාවත් කිරීම සඳහා මුස්ලිම් ලෝක ලීගය විසින්මූ කළ මෙම මුදල් ප්‍රදානය වර්ෂ 2019 ජූලි මස 31 දා සවස නෙළුම්පොකුණ රඟහලේ දී සිදු විය. එම උත්සවය සඳහා එවකට ජනාධිපති මෛත්‍රීපාල සිරිසේන හැරුණු විට හිටපු ජනාධිපතිවරයෙක් මෙන්ම වත්මන් අගමැති, මහින්ද රාජපක්ෂ, හිටපු ජනාධිපතිනී චන්ද්‍රිකා බණ්ඩාරනායක කුමාරතුංග ඇතුළු ප්‍රභූ පිරිසක් එක් වී සිටියහ. මුස්ලිම් ලෝක ලීගයේ මහලේකම් ආචාර්ය මොහොමඩ් බින් අබ්දුල් කරීම් අල් ඊසා විසින් එම මුදල් ප්‍රදානය හිටපු ජනාධිපති මෛත්‍රීපාල සිරිසේන වෙත භාර දුන්නේය.
