දේශපාලන පළිගැනීම් පිළිබඳ චෝදනා විමර්ශනය කිරීම වෙනුවෙන් යැයි ප්රකාශ කරමින් හිටපු ජනාධිපතිවරයා විසින් පත් කරන ලද ජනාධිපති පරීක්ෂණ කොමිෂන් සභාවේ මතභේදාත්මක නිර්දේශ පිළිබඳව සමාජය හමුවේ ඇති ගැටලුකාරී තත්වය පිළිබඳ ජාතික ජන බලවේගයේ නායක අනුර කුමාර දිසානායක අද (07) පාර්ලිමේන්තුවේදී ප්රශ්න කළේය.
සථාවර නියෝග 27/2 යටතේ මතුකළ එම ප්රශ්නයෙන් දැඩි ප්රතිවිරෝධතා මතුකරන එම කොමිෂන් සභා වාර්තාව සහ ඒහි නිර්දේශ පිළිබඳව වත්මන් ජනාධිපතිවරයා ප්රමුඛ ආණ්ඩුවේ ස්ථාවරය කුමක්ද යන්නත් ඒ් සම්බන්ධයෙන් ගනු ලබන පියවර කුමක්ද යන්නත් විමසා සිටියේය.
මන්ත්රීවරයා මෙසේ ද ප්රකාශ කළේය.
“2015 ජනවාරි සිට 2019 නොවැම්බර් දක්වා කාලය තුළ දේශපාලන පළි ගැනීම් පිළිබඳව සොයා බැලීම සඳහා හිටපු ජනාධිපතිවරයා විසින් විශ්රාමලත් ශ්රේෂ්ඨාධිකරණ විනිසුරු උපාලි අබේරත්නගේ සභාපතිත්වයෙන් යුතු ජනාධිපති පරීක්ෂණ කොමිෂන් සභාවක් 2020 ජනවාරි 09 වැනි දින අංක 2157/44 දරන අති විශේෂ ගැසට් පත්රය මගින් පත් කරනු ලැබ තිබුණා. “
“එසේම එම කොමිෂන් සභාවේ අවසන් වාර්තාව 2020 දෙසැම්බර් 08 වැනි දින හිටපු ජනාධිපතිවරයා වෙත භාර දී තිබුණා.”
“මෙම කොමිෂන් සභාවට පවරන ලද විෂයපථය සහ එම කොමිසම විසින් අනුගමනය කරන ලද ක්රියාපටිපාටිය සාධාරණ නොවන බවටත් එම කොමිෂම තමන් ගේ බලතල ඉක්මවා ක්රියාත්මක වී ඇති බවටත් සමාජය තුළ බලවත් කතිකාවක් ඇති වුණා. විශේෂයෙන් එම කොමිසම් සභා වාර්තාවේ නිර්දේශ සම්බන්ධයෙන්ද බරපතළ ගැටලුකාරී තත්වයක් උද්ගත වී තිබුණා. “
“නිදසුනක් ලෙස ඇතැම් පැමිණිලිවලට අදාළව එමගින් නිර්දේශ කර තිබුණේ ඊට අදාළව අධිකරණය හමුවේ පවරා ඇති සහ විභාග වන නඩුකර ඉවත් කර ගැනීමටයි. එසේම තවත් පැමිණිලිවලට අදාළව නීතිය ක්රියාත්මක වූවන්ට වන්දි ලබා දීමටත් එයින් යෝජනා කළා. තවත් නිර්දේශයක් මගින් වංචා දූෂණ අක්රමිකතා පිළිබඳ චෝදනා ඉදිරිපත් කළ අයට දඬුවම් ලබා දීමටද යෝජනා කර තිබුණා.”
“මෙම තත්වය තුළ මෙම කොමිෂන් සභා වාර්තාව සම්බන්ධයෙන් සහ එහි නිර්දේශ සම්බන්ධයෙන් වත්මන් ජනාධිපතිවරයා ප්රමුඛ ආණ්ඩුවේ ස්ථාවරය කුමක්ද යන්නත් ඒ් සම්බන්ධයෙන් ගනු ලබන පියවර කුමක්ද යන්නත් මේ සභාව හමුවේ තබනු ඇතැයි අපේක්ෂා කරනවා. “
