මහනුවර සඳගිරි සෑය දෙසින් හන්තාන කඳුවැටිය තරණය කරමින් සිටියදී බඹර ප්රහාරයකට ලක් වූ උසස් අධ්යාපන ආයතනයක ඉගෙනුම ලබන සිසුන් 05 දෙනෙකු අතරින් තිදෙනෙකු ප්රතිකාර සඳහා මහනුවර ජාතික රෝහලට ඇතුළත් කර තිබේ.
මෙම සිසුන් ඊයේ (18) පෙරවරු 11.00 ට පමණ හන්තාන තරණය ආරම්භ කර තිබෙන බවත් බඹර ප්රහාරයට ලක්ව තිබෙන්නේ පස්වරු 4.00 ට පමණ බවත් පොලීසිය පවසයි.
අධික වැස්ස හා මීදුම් තත්ත්වය සමඟ පහළට බසින මාර්ගය සොයා ගැනීමට නොහැකිව සිසු පිරිස පහළට ගමන් කරමින් සිටිය දී එක් සිසුවෙකු බඹර ප්රහාරයට ලක්ව තිබෙන අතර ඔහු බේරා ගැනීමට ගිය අවස්ථාවේ තවත් සිසුන් දෙදෙනෙකු බඹර ප්රහාරයට ලක්ව ඇත.
අසාධ්ය තත්ත්වයේ පසුවූ එක් සිසුවෙකු පහළට ගෙන ඒම දුෂ්කර වීම හේතුවෙන් සිසුන් ඒ සම්බන්ධව පවුලේ ඥාතීන්ට දැනුම් දී තිබේ. ඒ අනුව පොලීසිය දැනුවත් කිරීමෙන් පසු මහනුවර දෙවන සිංහ රෙජිමේන්තුවේ සෙබළ කණ්ඩායමක් කන්ද තරණය කර රාත්රී 9.00 ට පමණ සිසු පිරිස නිරුපද්රිතව පහළට රැගෙන පැමිණ ඇත.
සුවසැරිය ගිලන් රථයක් මගින් මහනුවර ජාතික රෝහලට ඇතුළත් කළ සිසුන් තිදෙනා ප්රතිකාර සඳහා රෝහලේ වාට්ටු අංක 28 ට ඇතුළත් කර තිබේ.
මෙම සිසුන් ගම්පහ, කිරිබත්ගොඩ, නුගේගොඩ පදිංචිකරුවන් බව පොලීසිය පවසයි.
