කීර්ති ප්රනාන්දු –
-
නඩත්තුවෙදි මතුවුන විරෝධතාවයෙන් බේරෙන්න යන්තම් අටවලා තියලා… පැය දෙකක් එක දිගට දුවන්න බෑ….
-
ඇත්ත තත්ත්වය ගැන කොලේ වහලා සියල්ල සූදානම් කියනවා. පද්ධතියට එක් කළ වහාම බිඳවැටෙන්න නියමිතයි…
-
කැලණිතිස්ස නැප්තා බලාගාරයේ ජනන හැකියාව ගැන වහාම විධිමත් පසුවිපරමක් කරන්න… ලංකා විදුලිබල මන්ඩලීය තාක්ෂණික ඉංජිනේරු හා අධිකාරි සංගමය පවසයි…
නොරොච්චෝලය බලාගාරය සඳහා ගල් අඟුරු නොලැබීම, ඩීසල් බලාගාර සඳහා ඉන්ධන නොලැබීම, ජල විදුලිය නිශ්පාදනයට ජලය හිඟකම සම්බන්ධව ගැටලු මතුවෙමින් එද්දී හදිසි ජාතික අවශ්යතාවයක් වෙනුවෙන් පද්ධතියට එක් කිරීම සඳහා සූදානම් යැයි කියන මෙගාවොට් 165ක ධාරිතාවක් සහිත දැවිතෙල් මගින් බලගන්වන කැලණිතිස්ස සංයුක්ත බලාගාරයේ ක්රියාකාරිත්වය පිළිබඳ බරපතල ගැටලු සහගත තත්ත්වයක් ඇති බවත් මේ පිලිබඳව මහජන උපයෝගීතා කොමිසම ඇතුළු වගකිවයුත්තන්ගේ අවධානය වහාම යොමුවිය යුතු බවත්, ලංකා විදුලිබල මන්ඩලීය තාක්ෂණික ඉංජිනේරු හා අධිකාරි සංගමයේ සභාපති ඒ .ජී .යූ නිශාන්ත පවසයි.
ඔහු පවසන්නේ මේ වනවිට ධාවන තත්ත්වය සම්බන්ධව බරපතල අවිශ්වාසනීය තත්ත්වයක් සහිත කැලණිතිස්ස සංයුක්ත බලාගාරයේ යථාර්ථය යම් පිරිසක් විසින් සාහසික ලෙස වසන් කර ඇති බවය.
මේ පිලිබඳව කළ විමසුමක දී ලංකාසරට අදහස් දක්වමින් සභාපතිවරයා මෙසේද පැවසුවේය.
“කැලණිතිස්ස සංයුක්ත බලාගාරය 2019 වර්ෂයේ දී බිඳ වැටුණා. මේ බිඳවැටීමත් සැබෑ ලෙසම ප්රශ්නයක් මතු කළා. මොකද බලාගාරයෙ ජනන යන්ත්රයෙ ඇක්සල් දෙකක් තියනවා. මේ ඇක්සල් දෙකම එකපාර ඩැමේජ් වුනා. එය ප්රශ්නයක් විදිහට තවමත් ඉතිරිවෙලා තියනවා.“
“කෙසේ වෙතත් මෙම කොටස්වල නඩත්තුව සඳහා පළමුව ඩුබායි රාජ්යයටත් දෙවනුව ඉන්දියාවටත් යැව්වා. එම යන්ත්ර කොටස් ලංකාවට ගෙන ඒමට මාස 18කට වැඩි කාලයක් ගියා.“
“ඒ ගෙනාපු කොටස් යළි ජනන යන්ත්රයට සවි කිරීම සිදු කිරීමේදී විදුලි හා යාන්ත්රික ඉංජිනේරුවන් ගේ අධීක්ෂණ වගකීම් නිසි පරිදි ඉටු වුණාද කියන සැකය මතු කරමින් අලුත් වැඩියා කර ධාවනයට එක් කළ පළමු අවස්ථාවේම යන්ත්රයෙහි bearing සහ rotor වලට හානි වුනා. මේ හානිය මුල් අවස්ථාවේ දී සිදුවූ හානියටත් වඩා බරපතල හානියක්.“
“මේ තත්ත්වය රට තුළ බරපතල සංවාදයකට හේතු වුනා. ඒ තත්ත්වය යටපත් කරගන්න චීන කණ්ඩායමක් ගෙනාව. ගෙනැවිත් විනාශවුන යන්ත්රයේ කොටස් අලුත්වැඩියා කළා. ඒක ඒ වෙලාවෙ ආපු දැඩි විවේචනයට උත්තරයක් මිස නිශ්චිත විසඳුමක් නොවෙයි. ඔවුන් දැම්මේ පැලැස්තරයක්.“
බලාගාරයේ ඇත්ත ගැන කොලේ වහලා..
ඉංජිනේරුවරු විදිහට අප දන්නවා මෙතන සාධනීය තත්ත්වයක් නෑ. අලුත්වැඩියාවෙන් පසු මේ දක්වා එම ජනන යන්ත්ර ධාවනය කර ඇති පැය ගණන 800 කටත් අඩුයි. අප දන්න විදිහට තවමත් එක දිගට පැයක් දෙකක් දුවන්න බෑ මේ ජනන යන්ත්රයට. අධික දෙදරීමක් එනවා. ඒ කියන්නෙ අසමතුලිතා තාවයක් ඇතිවෙලා තියනවා අලුත්වැඩියාවෙදි.
අපි කියන්නෙ මේකයි. රටේ විදුලිය අර්බුදයක. එහෙම අවස්ථාවක දී පද්ධතියට එක් කරගන්න සූදානම් කියලා ලෑස්ති කරලා තියෙන මේ බලාගාරය බරපතල අර්බුදයක තියෙන්නෙ. ඇත්ත ඉතාම අප්රසන්නයි.
ඒ හින්දා සංගමයක් ලෙස අප අවධාරණයෙන් කියන්නෙ මේ අවස්ථාවේ පද්ධතියට එක්කිරීමට සූදානම් යැයි පවසන කැලණිතිස්ස සංයුක්ත බලාගාරයෙන් අපේක්ෂිත ජනනය කොතෙක් දුරට සුරක්ෂිත දැයි පසුවිපරමක් කළ යුතු බවයි.
මොකද මෙම බලාගාරය පද්ධතියට එකතු කළ වහාම නැවත බිඳවැටීමක් සිදුවී පද්ධතියෙන් යළි ඉවත් කිරීමේ විශාල අවදානමක් තියනවා.
සපුගස්කන්ද තෙල් පිරිපහදුවේ නිෂ්පාදනය වන නැප්තා ඉන්ධනයක් ලෙස භාවිතා කළ හැකි එකම විදුලි බලාගාරය මෙයයි. මේක භාවිතා නොකළහොත් ඉතාම අඩු මුදලට එම නැප්තා විකිණීමට සිදුවෙනවා.
පසුගිය නඩත්තු කාලය තුළද සිදු වූයේ එයයි. මහජන උපයෝගිතා කොමිසම ඇතුළු වගකිවයුතු පාර්ශවයන්ගෙන් මෙම බලාගාරයේ ජනන හැකියාව පිළිබඳ නිවැරදි තක්සේරුවක් ස්වාධීන කණ්ඩායමක් මගින් ලබාගන්නා ලෙස අප සංගමයක් ලෙස ඉල්ලා සිටිනවා.“
ලංකා විදුලිබල මන්ඩලීය තාක්ෂණික ඉංජිනේරු හා අධිකාරි සංගමයේ සභාපති ඒ .ජී .යූ .නිශාන්ත වැඩිදුරටත් කීවේය.
