මනම්පිටිය නිමල් ජයරත්න –
සෝමාවතී ජාතික වනෝද්යානයේ කන්දකාඩු ප්රදේශයේ හක්කපටස් යොදාගෙන දඩයමේ නිරතව සිටි පුද්ගලයින් තිදෙනෙක් සෝමවතිය අඩවි ආරක්ෂක කාර්යාලය මගින් අත්අඩංගුවට ගෙන අද ( 10) පොළොන්නරුව අතිරේක මහේස්ත්රාත් අධිකරණයට ඉදිරිපත් කිරීමෙන් අනතුරුව එක් අයෙකුට රුපියල් 1,05,000 බැගින්, තිදෙනාට රුපියල් තුන් ලක්ෂ පහළොස් දහසක දඩයක් ගෙවන ලෙස අතිරේක මහේස්ත්රාත් එරන්දි මිහිරාණි වික්රමසිංහ නියෝග කළාය.
වැලිකන්ද කුඩාපොකුණ ප්රදේශයේ පදිංචිකරුවන්වන මෙම සැකකරුවන් තිදෙනා කන්දකාඩු ප්රදේශයේ දඩයමේ නිරත වී සිටියදී හක්කපටස් දොළහක්, විදුලි පන්දම් දෙකක්, පිහි එකක්, සහ ගිනිපෙට්ටි 12 සමග සෝමවතිය අඩවි ආරක්ෂක කාර්යාලයේ නිලධාරීන් විසින් අත්අඩංගුවට ගෙන තිබිණි.
ඔවුන් තිදෙනා අවුරුදු 18, 22, 25, යන වයසේ පසුවන්නන් බවද ඒ පිලිබඳ පරීක්ෂණ සිදුකරන සෝමවතිය අඩවි ආරක්ෂක කාර්යාලයේ වනජීවී නිලධාරීන් පවසයි.
සෝමවතිය අඩවි ආරක්ෂක කාර්යාලයේ ස්ථාන භාර නිලධාරී ජී.ඒ.පී. මනහර, වන සත්ව අඩවි සහකාර අමිල ශ්රී නාලක විසින් මෙම සැකකරුවන් අත්අඩංගුවට ගෙන ඇත.
සෝමාවතීය ජාතික වනෝද්යානයට ඇතුළු වීම, සතුන්ට හානි කරන හක්කපටස් ළඟ තබා ගැනීම, ඇතුළු චෝදනා හයක් යටතේ ඔවුන් අධිකරණයට ඉදිරිපත් කර තිබිණි.
මෙම සැකකරුවන් දීර්ඝ කාලෙක සිට හක්කපටස් යොදාගනිමින් ඌරන්, මුවන් ඇතුළු සතුන් දඩයම් කර ඇති බවට සෝමාවතිය වනජීවි නිලධාරීන් කරන ලද මූලික පරීක්ෂණ වලින් තහවුරු වීී ඇත.
