අසේල කුරුළුවංශ –
ආණ්ඩුවේ මුදල් හා ආරක්ෂාව ලබමින් මහා සංඝරත්නයට අපහාස කිරීමේ යූ ටියුබ් කල්ලියක් රටේ ක්රියාත්මක බවත් සුදන්ත තිලකසිරි එහි එක් පුද්ගලයෙකු බවත් සිරි සමන්තභද්ර හිමියෝ පවසති.
වැරදි ඇත්නම් වනචාරීන් ලෙස භික්ෂුන් වහන්සේට අපහාස නොකර වැරැද්ද පෙන්වා දිය යුතු බවත් පෙර ආණ්ඩු යටතේ මෙවැනි තත්ත්වක් දක්නට නොලැබුණු බවත් උන්වහන්සේ පැවසූහ.
මල්වතු පාර්ශවයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියන් ඊයේ (19) බැහැදැකීමට පැමිණි අවස්ථාවේ උන්වහන්සේ හමුවේ සමන්ත භද්ර හිමියෝ මේ බව ප්රකාශ කළහ.
යු ටියුබ් නාළිකාවක් පවත්වාගෙන යන සුදන්ත තිලකසිරි නැමැති පුද්ගලයා සාවද්ය තොරතුරු ගෙන හැර දක්වමින් තමන් වහන්සේට අපහාස කිරීම සම්බන්ධයෙන් රුපියල් මිලියන 500 ක වන්දියක් ඉල්ලා එන්තරවාසියක් යොමු කළ බවද පැවසූ සමන්ත භද්ර හිමියෝ වැඩිදුරටත් අදහස් දක්වමින් මෙසේද කීහ.
“අන්තර්ජාලය ඔස්සේ සාවද්ය තොරතුරු ඉදිරිපත් කරමින් මඩ ගැසීමට එරෙහිව සුදන්ත තිලකසිරි නැමැත්තට එරෙහිව නීති මගින් කටයුතු කළා. මේ වනවිට ඔහුට සිතාසි නිකුත් කර තිබෙනවා. මීට අමතරව අතුරු තහනම් නියෝගයක් සහ වාරණ ආඥාවක් ගත්තා. “
“මහා සංඝරත්නය හේතුවක් නොමැතිව අපහාස කරන්න දෙන්න බැහැ. අපි වැරදිනම් අපිට ඒ වැරැද්ද පෙන්වන්න. වනචාරියා කියලා බණිනවා. කහකඩයා කියනවා. කලින් ආණ්ඩු යටතේ මෙහෙම එකක් වුණේ නැහැ. අපි මේකට විරුද්ධයි. විරුද්ධ විතරක් නෙවෙයි මේ වගේ දේවල් ඉදිරියට නොවෙන්න අවශ්යය පසුබිම හදනවා. “
“සුදත්ත තිලකසිරිට ආණ්ඩුවෙන් ආරක්ෂාව ලබාදී තියෙනවා. ඒ ආරක්ෂාව ඇතුව තමයි මේ මඩ ගැසීම කරන්නේ. මේ ඔක්කොම අපි අධිකරණයට වාර්තා කළා. මේ වගේ වීඩියෝ 20 කට වඩා තියෙනවා. කොළඹ පැවැත්වෙන සඟ සමුළුවට හාමුදුරුවරු ඔක්කොම සම්බන්ධ වෙන්න ඕන. ඇයි අපිට මේ බොරුවට මඩ ගහන්නේ.”
“මිහින්තලේ කටුසෑය ළඟ පලතුරු කපන්න පොඩි බංකුවක් තියෙනවා. ඒක කඩයක් කියලා නඩුවක් දාන්න ලෑස්තියි. මේ වගේ ඒවා හැම පන්සලකම තියෙනවා. මේවා වැරදි වැඩ. මේවා මධ්යස්ථව සාකච්ඡා කරලා විසඳගන්න ඕන දේවල්. මම හිතන්නේ මේවා පළිගැනීමේ චේතනාවෙන් කරන දේවල්. “
“උමංදාවේ රෝහලක් හැදුවා. දිනකට 250 කට ප්රතිකාර ලබා දුන්නා. දැන් ඒක වහලා. ගමටම වතුර දෙන්න වතුර ෆල්ටර්ස් හැදුවා. ඒවා වහලා. අපෙන් පළිගත්තම දහස් ගානක් මිනිස්සුනට ඒකෙන් නරකක් වෙනවා. පළිගැනීම් නවත්වලා අපි කරන වැඩට උදව් දෙන්න. අපි ආරම්භ කළ කෘෂිකාර්මික වැඩසටහන නවත්වන්න උත්සහා කරනවා. අපහාස කිරීමට නඩු දැම්මා. අධිකරණය යුක්තිය ලබා දෙයි. “
“ආණ්ඩුවෙන් මුදල් හා ආරක්ෂාව දෙන යූ ටියුබ් කල්ලියක් භික්ෂුන් වහන්සේ ඇතුළු සමාජයේ වැඩක් කරන අයට පහර ගසාගෙන යනවා. විවේචනය සාධනීය නම් එයට සෙවිය යුත්තේ පිළිතුර මිස මඩ ගැසීම නෙවෙයි. පිළිතුර නැති තැන මඩ නිර්මාණය කරනවා. විවේචනයට සාධනීය සවන් දෙන්න.”
“සුදන්ත තිලකසිරි අධිකරණ තීන්දුවක් විවේචනය කරලා තියෙන්නේ. ඒක අධිකරණයට අපහාස කිරීමක්. ඔහුට ආණ්ඩුව පොලිස් ආරක්ෂාව දීලා තියෙනවා. ඒක හැමෝම දන්නවා. රජය හොඳට වැඩ කරනවා නම් ඇයි එක එක්කනා දාලා මඩ ගස්වන්නේ. අපි සමාජ හා අගමික කාර්යභාරය හරියට ඉටු කරනවා.වැඩ පෙන්වනකොට අපිට මඩ ගහනවා.”
