-
සිරි දළදා වන්දනාවට බැතිමතුන් රැගත් සියලුම වාහන මහනුවරට ඇතුළුවීම වළක්වයි… ලක්ෂ හතර හමාරක් දැනුත් නගරය තුළ…
-
ඉදිරි දින 04ටම දළදා වඳින්න ප්රමාණවත් පිරිසක් දැන් නුවර… සැදැහැවතුන් පෝලිම් කිරීම සදහා සකස්කළ අත් වැටවල්වල සිට කිලෝ මීටර් 10ක ජනතා පෝලිමක්…
-
ආහාර වතුර කෙසේ හෝ දුන්නත් සනීපාරක්ෂක පහසුකම් ප්රමාණවත් ලෙස ලබා දෙන්න බෑ… ජනතාව පාලනය කරගන්න බැරි අර්බුදය මතුවෙද්දී ඇත්ත කියා ජනතාව නුවර ඒම වළක්වන්න සංවිධායකවරු තීරණය කරති…
සිරි දළදා වන්දනාවට එක්වීම සඳහා පැමිණෙන පිරිස් රැගත් බස් රථ නැවත දැනුම් දෙනතුරු මහනුවරට ඇතුළුවීම වළක්වා තිබේ. ඊයේ රාත්රියේ සිට මෙම පියවර ක්රියාත්මක කර ඇති අතර ගන්නෝරුව ප්රදේශයේ ඊයේ (23) රාත්රියේ බස් රථ 32ක් නතර කළ බව පොලිසිය පවනයි.
මධ්යම පළාත් ජ්යෙෂ්ඨ නියෝජ්ය පොලිස්පති ලලිත් පතිනායක ප්රකාශ කරන්නේ සිරි දළදා වන්දනාව සඳහා ලක්ෂ 4 1/2 ක පමණ සැදැහැවතුන් පිරිසක් මේ වනවිටත් මහනුවර නගරයට පැමිණ තිබෙන සිටින බවත් මේ රැස්වී ඉන්නේ ඉදිරි දින 04 තුළ දළදා වැඳීමට තරම් ප්රමාණවත් පිරිසක් බවත්ය. තත්ත්වය කළමනාකරණය කරගත හැකි වුවහොත් නව කණ්ඩායම්වෙත දළදා වන්දනාවට ඉඩ හසර සලසන බැවින් නැවත දැනුම් දෙනතුරු වන්දනාකරුවන් රැගත් වාහන නගරයට ඇතුළු කර නොගන්නා බව නියෝජ්ය පොලිස්පතිවරයා අවධාරණය කළේය.
මහනුවර දිස්ත්රික් ලේකම් කාර්යාලයේ දී අද (24) පැවැති මාධ්ය හමුවක දී ජ්යෙෂ්ඨ නියෝජ්ය පොලිස්පතිවරයා මෙසේද පැවසුවේය. “වන්දනාකරුවන් රැගෙන කුරුණෑගල දෙසින් එන බස් රථ මාවතගම පොලිස් වසමේ මැටිබොක්ක ප්රදේශයේදීත්, දඹුල්ල දෙසින් එන වාහන අළුවිහාරේදීත් මහියංගණ දිගන මාර්ගයේ එන වාහන හසලක ප්රදේශයේ දීත් හඟුරන්කෙත දෙසින් එන වාහන මයිලපිටියේදීත් ගම්පොළ දෙසින් එන වාහන වැලිගල්ලේදීත්, කෑගල්ල දෙසින් එන වාහන මාවනැල්ලේදීත් නතර කිරීමට පොලීසියට දැනුම් දී තිබෙනවා.
එම බස් රථ වල පැමිණෙන ජනතාවට අවශ්යය මූලික පහසුකම් අදාළ ප්රාදේශීය ලේකම් කාර්යාල සහ පළාත් පාලන ආයතන මගින් ලබා දීමට සැළසුම් කර තිබෙනවා. ඉතිරි දින වල දී දළදා වහන්සේ වන්දනා කිරීමට ප්රමාණවත් ජන පිරිසක් මේ වනවිටත් මහනුවරට පැමිණ තිබෙන බැවින් අලුතින් එන අයට එම අවස්ථාව ලබා ගැනීමට නොහැකි තත්ත්වයක් නිර්මාණය වී තිබෙනවා.
තත්ත්වය කළමනාකරණය කර ගැනීමට හැකි වුවහොත් දළදා වහන්සේ වැඳපුදා ගැනීමෙන් පසුවන සැදැහැවතුන්ට මහනුවරට පැමිණෙන ලෙස නැවත දැනුම් දීමක් කරනවා.
මැතිවරණ කාලසීමාවක් වුවත් පොලිස් නිලධාරීන් 10000 ක් හා යුද හමුදාවේ 6500 ක් ආරක්ෂාව සඳහා යොදවා තිබෙනවා. සැදැහැවතුන් පෝලිම් කිරිම සඳහා සකස් කර තිබෙන බට වැටේ සීමාව ඉක්මවා කිලෝ මීටර් 10 ක් පමණ දුරට පෝලිම්වල ජනතාව රැඳී සිටිනවා. අද වනවිට පෝලිම්වල ලක්ෂ 4 1/2 ක් පමණ ඇතැයි ඇස්තමේන්තු කරනවා.
ඊයේ දිනයේ දීත් වන්දනා කරුවන්ගේ පැමිණීම සීමා කරන්න සිදු වුණා. නගරයට තව දුරටත් ජනතාව පැමිණීම වැලැක්විය යුතු බව සෞඛ්ය අංශ දැනුම් දෙනවා. විශාල ප්රදේශයක මහ ජනතාව එක්රැස් වීම මගින් විවිධ වූ සමාජ හා සෞඛ්ය ගැටලු ඇතිවීමේ අවධානමක් පවතිනවා. ඉදිරි දින දෙකේදී දළදා වහන්සේ වන්දනා කිරීමේ අරමුණින් මහුනුවරට පැමිණීමෙන් වලකින ලෙස දැනුම් දෙන්නේ ඒ නිසයි.
දළදා දැක්ම වෙනුවෙන් සංවිධාන කටයුතු සිදු කරන කණ්ඩායම දෛනිකව රැස්වී ඉදිරියේ දී ගත යුතු තීරණ සාකච්ඡා කරන බවත් මේ වනවිට පවතින තත්ත්වය අනුව නගරයට තවත් ජනතාව ඇතුළුවීමෙන් අවධානම් තත්ත්වයක් නිර්මාණය වන බවත් මධ්යම පළාත් ආණ්ඩුකාර මහාචාර්ය එස්.බී අභයකොන් පැවසුවේය.
“ආහාර හා පානීය ජල අවශ්යතා සපුරාලිය හැකි වුවත් සනීපාරක්ෂක පහසුකම් සැලසීම සම්බන්ධයෙන් බරපතළ ගැටලු මතුවිය හැකියි. මේ නිසා පවතින සැබෑ තත්ත්වය ජනතාවට දැනුම් දිය යුතු බවට කමිටුව තීරණය කළා. තව දුරටත් ජනතාව මහනුවරට ඇතුළු වුවහොත් විශාල තෙරපීමක් ඇතිවිය හැකියි. යුද හමුදාවෙ 500 ක පමණ පිරිසක් අලුතින් මහනුවර කැඳවීමට ආරක්ෂක ලේකම් හා සාකච්ඡා කළා. ආණ්ඩුකාරවරයා පැවසුවේය.
