මනම්පිටිය නිමල් ජයරත්න –
පොළොන්නරුව සිරිපුර බාල පොහොර ජාවාරම්කරුට අයත් බව කියන තවත් පොහොර තොගයක් කදුරුවෙල, අත්තනකඩවල සහ දෙහිඅත්තකණ්ඩිය ප්රදේශවලින් 16 වෙනිදා ,සවස සොයාගැනීමට හැකි වූ බව පොළොන්නරුව කොට්ඨාස අපරාධ විමර්ශන අංශය සඳහන් කරයි.
ඒ අනුව එම ජාවාරම්කරුවා දෙහිඅත්තකණ්ඩිය අලෙවි නියෝජිතයාට ලබාදුන් බාල පෝර මිටි 250 ක්ද අත්තනකඩවල ප්රදේශයේ තිබී පොහොර මිටි 190 ක් ද සොයාගැනීමට හැකි වූ බව පොළොන්නරු කොට්ටාශ අපරාධ විමර්ශන අංශයේ නිලධාරියකු අප කළ විමසීමකදී සඳහන් කළේය.
පොළොන්නරුව කදුරුවෙල නගරයෙ ජාවාරම්කරුට අයත් ලොරියක තිබී පොහොර තොගයක් පොළොන්නරුව පොලිසිය මගින් අත්අඩංගුවට ගෙන ඇති බවත්, එහි තිබෙන පොහොර මිටි සංඛ්යාව නිශ්චිත වශයෙන් කිව නොහැකි බවත් කොට්ඨාස අපරාධ විමර්ශන අංශය පවසයි.
දෙහිඅත්තකණ්ඩිය ප්රදේශයේ වෙළඳසැලට ජාවාරම්කරු විසින්ම ලබාදුන් බාල පොහොර මිටි 250 තිබෙන බවට වෙළඳසැල් හිමිකරු පොහොර ලේකම් කාර්යාලය, සහ පොළොන්නරුව කොට්ටාස අපරාධ විමර්ශන අංශය දැනුවත් කළ බවද පොලිසිය කියයි.
මාධ්ය හරහා මෙම බාල පෝර ජාවාරම හෙළිවීමත් සමග ජාවාරම්කරුවා සඟවා තිබෙන පොහොර සම්බන්ධ තොරතුරු ලැබෙමින් පවතින බවත්, ඒ අනුව විමර්ශන කටයුතු කරමින් එම පොහොර අත්අඩංගුවට ගැනීමට කටයුතු කරන බවත් පොළොන්නරුව කොට්ඨාස අපරාධ විමර්ශන අංශයේ නිලධාරියෙකු අප කළ විමසීමේදී පැවසීය.
මේ අතර ජාවාරම්කරුවාගෙන් ලබාගත් බාල පොහොර වී වගාවට යෙදීමෙන් වී වගාව සම්පූර්ණයෙන්ම කහ වී ඇති බවත්, එහි අස්වැන්නද මෙවර නිශ්චිත වශයෙන් අඩුවන බැවින්, ජාවාරම්කරුවාට වහා නීතිය ක්රියාත්මක කරන්න ඔහු උපයා තිබෙන වත්කම් පොහොරවලින් පාඩු විඳි ගොවියාට වන්දි ලබා දිමේ ක්රමවේදයක් වහා සැකසීමට රජය වහා පියවර ගන්නා ලෙසත් මහවැලි බී කලාපයේ ව්යාපාර කමිටුවේ උප සභාපති කපිල සිරිල් පතිරණ සඳහන් කළේය.
මහවැලි බි කලාපීය ගොවීන් සඳහන් කරන්නේ මින් ඉදිරියට රජය මැදිහත් වී ප්රමිතියෙන් යුත් පොහොර ලබාදීමට වැඩපිළිවෙළක් සකසන ලෙසය. එමෙන්ම මේ බාල පොහොර ජාවාරම්කරුවාට
එරෙහිව නීති ක්රියාත්මක කරන ලෙසද මහවැලි බි කළාපයේ ගොවි සංවිධාන නියෝජිතයින් රජයෙන් ඉල්ලීමක් කර ඇත..
පොළොන්නරුව කොට්ඨාශ අපරාධ විමර්ශනයට ලද තොරතුරක් අනුව පසුගිය 14 වෙනිදා සිදුකර වැටලීමේදී මෙම ජාවාරම්කරු ගේ සේවකයන් විසින් ඇසුරුම් කළ බාල පොහොර මිටි 1565 ක්, තවත් ඇසුරුම් බෑග් 13,000 කට අධික ප්රමාණයක් පොහොර පැටවීමට සූදානම් කර තිබූ ලොරි හතරක්, සහ ලේබල් කිරීමට යොදාගත් උපකරණ සහ පොලිතින් බෑග් මසන යන්ත්ර තුනක්, අත්අඩංගුවට ගනු ලැබුවේය.
