මනම්පිටිය නිමල් ජයරත්න –
සිරිපුර රන්කෙත්ගම ප්රදේශයේදී පුද්ගලයන් දෙදෙනෙකුට අයුතු බලපෑම් හා තර්ජනය කර ඔවුන් සතුව තිබූ රුපියල් තුන්ලක්ෂ අනූ දාහක මුදලක් සහ පවුම් හතර හමාරක් බරැති රන් භාණ්ඩ කොල්ල කෑ බවට චෝදනා ලද සිරිපුර පොලිස් ස්ථානයේ පොලිස් කොස්තාපල් තුන්කට්ටුවේ වැඩ තහනම් කිරීමට කටයුතු කළ බව පොලොන්නරුව පොලිස් අධිකාරී නිශාන් ද සිල්වා පවසයි.
මෙම කොල්ලකෑමේ සිද්ධියට සම්බන්ධ බවට සැක කරන එක් කොස්තාපල් කෙනෙක් ඉකුත් 19 වැනිදා අත් අඩංගුවට පත්වුන අතර අනෙක් කොස්තාපල්ලා දෙදෙනා ඊයේ (22) සවස දෙහිඅත්තකන්ඩිය මහේස්ත්රාත් අධිකරණයට ඉදිරිපත් වී තිබිණි.
නීතිඥවරුන් මාර්ගයෙන් මහේස්ත්රාත් අධිකරණයට ඉදිරිපත් වූ සැකකාර පොලිස් කොස්තාපල් දෙදෙනා ඇතුළුව පොලිස්යේ තිදෙනාම 24 වෙනිදා හඳුනාගැනීමේ පෙරෙට්ටුවකට ඉදිරිපත් කිරීමට කටයුතු කරන ලෙස දෙහිඅත්තකණ්ඩිය වැඩබලන අතිරේක මහේස්ත්රාත් අසිකා දිසානායක නියෝග කළාය.
ඒ අනුව එම සිද්ධියට සම්බන්ධ සැකපිට අත්අඩංගුවට ගෙන අධිකරණයට ඉදිරිපත් කළ සිරිපුර පොලිස් ස්ථානයට අනුයුක්තව රාජකාරී කළ පොලිස් කොස්තාපල්වරුන් තිදෙනාගේම වැඩ තහනම් කිරීමට කටයුතු කළ බව පොළොන්නරුව පොලිස් අධිකාරි නිශාන් ද සිල්වා අප කළ විමසීමකදී සඳහන් කළේය.
අදාල පොලිස් තුන් කට්ටුව විසින් සැලසුම් සහගතව මාතර උස්ගොඩ තෙලිජ්ජිවල ලිපිනයේ පදිංචිව සිටි, දේශීය වෙද මහතෙකු, සිරිපුර ප්රදේශයේ අසනීප අයෙකුට ප්රතිකාර කිරීමට බව පවසා සිරිපුරට ගෙන්වාගෙන තිබේ.
එහිදි නිධානයකින් ලබාගත් ගල්පෙට්ටියක් තිබෙන බවට පුද්ගලයන් දෙදෙනෙකු වෙද මහතා දැනුවත්කොට කොට ඔහුව සිරිපුර රන්කෙත්ගම වැව ආසන්නයට රැගෙන ගොස් ඇති බව වාර්තා වේ. මේ අතර වැටලීමක් සිදු කරන ආකාරයෙන් එම ස්ථානයට පැමිණි පොලිස් නිලධාරින් තිදෙනා එම සිද්ධිය වීඩියෝ කර මාධ්ය මගින් ප්රසිද්ධ කරන බවට බියගන්වා,තර්ජනය කර, වෙද මහතාගෙන් සහ පැමිණිලි කළ අනෙක් පුද්ගලයින්ගෙන් මුදල් සහ රන් භාණ්ඩ කොල්ලකෑ බව පැමිණිල්ලේ සඳහන් වී ඇත.
ඒ අනුව මෙම සිද්ධියට මූලික වූ සිරිපුර ප්රදේශයේ පදිංචි තිදෙනෙකු දෙසැම්බර් 18 වෙනිදා අත්අඩංගුවට ගෙන ඔවුන් දෙහිඅත්තකණ්ඩිය මහේස්ත්රාත් අධිකරණයට ඉදිරිපත් තිබිණි. හෙට (24) එම පිරිස හඳුනා ගැනීමේ පෙරෙට්ටුවකට යොමු කිරීමට නියමිත බව කොට්ටාස අපරාධ විමර්ශන අංශය සඳහන් කරයි.
පොළොන්නරුව ජ්යෙෂ්ඨ පොලිස් අධිකාරී නිශාන් ද සිල්වාගේ උපදෙස් මත, පොළොන්නරුව කොට්ඨාශ අපරාධ විමර්ශන අංශයේ ස්ථානාධිපති, ප්රධාන පොලිස් පරීක්ෂක ජේ.පී.ආර්. ජාගොඩආරච්චි, පොලිස් පරීක්ෂක ඒ.ටී. බණ්ඩාර මහතා ඇතුළු පොලිස් නිලධාරි කණ්ඩායමක් විසින් විමර්ශන කටයුතු කිරීමෙන් පසු මෙම පොලිස් කොස්තාපල්වරුන් තිදෙනා අත්අඩංගුවට ගෙන අධිකරණයට ඉදිරිපත් කර තිබේ.
