නීති විරෝධී ලෙස ආනයනය කරන ලද අධි බල යතුරුපැදි ඇතුළු යතුරුපැදි 21ක් සිය ගබඩාවක සඟවා තැබූ බවට චෝදනා ලද හම්බන්තොට, නගරවැව ප්රදේශයේ කුරුළු උද්යානයක හිමිකරු සහ තවත් සැකකරුවන් දෙදෙනෙකු ජූලි 30 වන දින දක්වා තවදුරටත් රක්ෂිත බන්ධනාගාර ගත කර කිරීමට හම්බන්තොට මහේස්ත්රාත් අධිකරණය අද (25) නියෝග කළේය.
චෝදනා ලබද්දී පොලිසිය මග හැර කට්ටි පනිමින් සිටි කුරුළු උද්යාන හිමිකරු විශේෂ පොලිස් කණ්ඩායමක් විසින් අත් අඩංගුවට ගනු ලබන්නේ පසුගිය 17 වැනිදාය.
ජූලි 12 වන දින, මධ්යම අපරාධ විමර්ශන කාර්යාංශයට අනුයුක්ත පොලිස් නිලධාරීන් කණ්ඩායමක් හම්බන්තොට, කුරුළු උද්යානයක ගබඩා තුළ සඟවා තිබී නීතිවිරෝධී ලෙස ආනයනය කරන ලද යතුරුපැදි 21 ක් අත්අඩංගුවට ගෙන තිබිණි.
වැඩබලන පොලිස්පතිවරයාට ලැබුණු විශේෂ තොරතුරු මත පදනම්ව, මධ්යම අපරාධ විමර්ශන කාර්යාංශයේ අධ්යක්ෂවරයා ඇතුළු නිලධාරීන් කණ්ඩායමක් විසින් මෙම වැටලීම සිදු කර තබිණි.
හම්බන්තොට නාගරවැව පිහිටි කුරුළු උද්යානය සහ පර්යේෂණ මධ්යස්ථානයේ කුරුළු ආහාර ගබඩාවේ සඟවා තිබූ, ශ්රී ලංකාවට ආනයනය කිරීම තහනම් විදේශ රටවල නිෂ්පාදනය කරන ලද අධි ධාරිතාවයෙන් යුත් බයිසිකල් ඇතුළු යතුරුපැදි 21ක් පොලිස් නිලධාරීන් විසින් සොයා ගන්නා ලදී.
මෙම යතුරුපැදිවලින් එකක් පමණක් රුපියල් මිලියන 15 කට වඩා වටිනා බවත්, මෙම යතුරුපැදි තොගයේ වටිනාකම මිලියන 210ක් බවත් පොලිසිය පැවසුවේය.
