පසුගිය මාර්තු 7 හා 8 දිනවලට කොළඹ හා කැළණිය විශ්ව විද්‍යාලවල ශිෂ්‍ය විරෝධතා මර්දනයේදී ක්‍රියා කළ ආකාරය පිළිබඳ කරුණු විමසීම සඳහා මහජන ආරක්ෂාව පිළිබඳ අමාත්‍ය ටිරාන් අලස් , ශ්‍රී ලංකා මානව හිමිකම් කොමිසම හමුවට කැඳවා තිබේ.
ඒ අනුව, මෙම විරෝධතාවලදී පොලීසිය ක්‍රියා කළ ආකාරය පිළිබඳව කරුණු විමසීමට ලබන 13 වැනිදා පෙරවරු 10ට කොමිසම හමුවේ පෙනී සිටින ලෙස අමාත්‍යවරයාට දන්වා ඇත.
මීට අමතරව, කොළඹ විශ්ව විද්‍යාලය හා කැළණියේදී පොලීසිය හා යුධ හමුදාව, ක්‍රියා කළ ආකාරය සම්බන්ධයෙන් වෙනම පරීක්ෂණයක් පැවැත්වීමට ද ශ්‍රී ලංකා මානව හිමිකම් කොමිෂන් සභාව තීරණය කර තිබේ.
ඒ අනුව, මේ වනවිටත් අදාළ සිදුවීම් සිදු වන දිනයන්හිදී එම ප්‍රදේවල සේවයේ යොදවා සිටි ජ්‍යෙෂ්ඨ පොලිස් නිලධාරීන්ගේ නම් ලැයිස්තුවක් මානව හිමිකම් කොමිසම වෙත ලබා දෙන ලෙස ද, එම කොමිසම පොලිස්පතිවරයාගෙන් ඉල්ලා ඇති බව වාර්තා වෙයි.
