ශ්රී ලංකාවට ආසන්න මුහුදු ප්රදේශයේ පැවති ගැඹුරු පීඩන අවපාතය අද (27) පස්වරුව වන විට සුළි කුණාටුවක් දක්වා වර්ධනය වී ඇති බව කාලගුණ විද්යා දෙපාර්තමේන්තුව නිල වශයෙන් නිවේදනය කරයි. මෙම නව සුළි කුණාටුව නම් කර ඇත්තේ “දිත්වා” (Ditwah) යනුවෙනි.
මෙම නාමය යෝජනා කර ඇත්තේ යේමනය විසිනි. ලෝක කාලගුණ විද්යා සංවිධානය (WMO) සහ එක්සත් ජාතීන්ගේ ආසියා හා පැසිෆික් ආර්ථික හා සමාජ කොමිසමේ (ESCAP) නිවර්තන සුළි කුණාටු පිළිබඳ මණ්ඩලය විසින් කලාපීය වශයෙන් අනුමත කරන ලද නාම ලේඛනයට අනුව මෙම නම ලබා දී ඇත.
ආරම්භයේදී දකුණු මුහුදු ප්රදේශය ආශ්රිතව අඩු පීඩන කලාපයක් ලෙස පැවති මෙය, පසුගිය 25 වනදා වන විට පීඩන අවපාතයක් බවට පත්විය.
26 වනදා වන විට එය ගැඹුරු පීඩන අවපාතයක් දක්වා වර්ධනය වූ අතර , අද (27) පස්වරුව වන විට ලැබුණු දත්ත වලට අනුව එය “දිත්වා” සුළි කුණාටුව බවට පරිවර්තනය වී ඇත.
ඉදිරි කාලගුණ අනාවැකිය: “දිත්වා” සුළි කුණාටුවේ බලපෑම හේතුවෙන් ඉදිරි දින කිහිපය තුළදීත් දිවයිනට තද වැසි අපේක්ෂා කළ හැකි බව කාලගුණ විද්යා දෙපාර්තමේන්තුව පවසයි. සුළි කුණාටුවේ පිහිටීම වෙනස් වීමත් සමඟ තද වැසි ලැබෙන ප්රදේශ වරින් වර වෙනස් වීමේ හැකියාවක් පවතින බව කාලගුණ විද්යා දෙපාර්තමේන්තුවේ නියෝජ්ය අධ්යක්ෂිකා ප්රීතිකා ජයකොඩි මහත්මිය පෙන්වා දුන්නාය.
කාලගුණ තත්ත්වය නිරන්තරයෙන් වෙනස් විය හැකි බැවින්, කාලගුණ විද්යා දෙපාර්තමේන්තුව මගින් නිකුත් කරන යාවත්කාලීන නිවේදන පිළිබඳව දැඩි අවධානයෙන් පසුවන ලෙස මහජනතාවගෙන් ඉල්ලා සිටියි.
