ශ්රී ලංකා විවාහක රූ රැජිණගේ කිරුළ ලෝක විවාහක රූ රැජිණ වන කැරලයින් ජූරි විසින් ගලවා දැමීමේ සිද්ධිය ඉතාම අශෝභන පිළිකුල් සහගත සිදුවීමක් බවත් ඒ පිළිබඳව කැරලයින් සමාව ගත යුතු බවත් ලොව පළමු විවාහක රූ රැජින වන, කොළඹ නගරාධිපතිනී රෝසි සේනානායක මහත්මිය පවසයි.
ඇය කැරලයින් ජූරිට දුරකථන ඇමතුමකින් තමා පවසා සිටියේ ද ජූරි විසින් ශ්රී ලංකාවට ගෙන ආ කිරුළ රැක ගත යුතු බව යැයි රෝසි සේනානායක මහත්මිය ‘ටෘත් විත් චමුදිත’ යූටියුබ් සම්මුඛ සාකච්ඡාවට එක්වෙමින් පැවසුවාය.
එමෙන්ම පුෂ්පිකා ද සිල්වා එම කිරුළට මෙන්ම ඇය ලෝක විවාහක රූ රැජින ලෙස ශ්රී ලංකාව නියෝජනය කිරීමට සුදුසු බව, කිරුළ යළි හිමිවීමෙන් පසු ඇය ඉතාම අසීරු අවස්ථාවේදී වුවද ශක්තිමත්ව සම්මුඛ සාකච්ඡාවට මුහුණ දුන් ආකාරයෙන් තමාට පෙනී ගිය බව රෝසි සේනානායක මහත්මිය කීවාය.
එදින එම සිදුවීම වූයේ තමා ඇතුළු ආරාධිත පිරිස සහ විනිශ්චය මණ්ඩලයේ ම ස්ථානයෙන් ගිය පසුව බවද ඇයට ඒ දැනගන්නට ලැබුනේ නිවසට ගොස් පැයක පමණ කාලයකින් පසුව බවද රෝසි සේනානායක මහත්මිය කියා සිටී.
මෙම සිදුවීම තුළ කිසිදු දේශපාලනයක් නොමැති බවත් ඒ නිසාම අගමැති ආර්යා ශිරන්ති රාජපක්ෂ මැතිනිය විපක්ෂ නායක බිරිඳ ජලනි ප්රේමදාස මහත්මියත් එහි ආරාධිත අමුත්තන් වූ බවද මොවුන් සියල්ලන්ම එකම ස්ථානයකට කැඳවීමට හේතුව කිසිදු දේශපාලනයකින් තොරව කාන්තාව මුල්කරගනිමින් කාන්තාවගේ අභිවෘද්ධිය උදෙසා පවත්වන අවස්ථාවක් වන බව යැයි සේනානායක මහත්මිය පෙන්වා දුන්නාය.
මෙම සිදුවීම වූ වහාම තමා මිසිස් වර්ල්ඩ් ඉන්කෝපරේශන් සමග සම්බන්ධ වී මේ පිළිබඳ සාකච්ඡා කළ බව ද ඇය කීවාය.
ලෝක විවාහක රූ රැජින තේරීමේ තරගය පිහිටුවන ලද විදේශික යුවල, එම පවුල හා එම සංවිධානය සමඟ පවතින දැඩි සම්බන්ධතාව මෙන්ම, පළමු ලෝක විවාහක රූ රැජින රැජිණ වීම සහ වසර දහයකට අධික කාලයක් මෙරට ජාතික අධ්යක්ෂවරිය ලෙස දේශපාලනයට පිවිසෙන තෙක් තමා කටයුතු කිරීම යන කරුණු කාරණා හේතුවෙන් පුෂ්පිකා ද සිල්වා කැරලයින් ජූරි සහ චන්දිමල් සිල්වා එකම තැනකට ගෙනැවිත් රටට සිදුවූ අපකීර්තිය සමථයකට පත් කිරීම තමාගේ වගකීමක් ලෙස තමා සලකන බව ඇය කියා සිටියාය.
ලෝක විවාහක රූ රැජින තරඟයේ ඇත්තේ මූලික සුදුසුකම් තුනක් පමණක් බවත් එනම් විවාහක වී තිබීම, මම නියෝජනය කරන රටේ පුරවැසියෙකු වීම, වයස අවුරුදු 18 ට වැඩි අයෙකු වීම යන කරුණු තුන පමණක් බව රෝසි සේනානායක මහත්මිය අවධාරණය කළාය.
කැරලයින් ජූරිට එවැනි විනිශ්චයක් නොකොට කිසියම් ගැටළුවක් ඇත්නම් ඒ සඳහා අවශ්ය නිර්නායක මිසිස් වර්ල්ඩ් ඉන්කෝපරේශන් වෙතින් ගෙන්වාගෙන ඔවුන්ගේ උපදෙස් අනුව කටයුතු කළ යුතුව තිබූ බව ඇය කීය.
