අසේල කුරුළුවංශ –
අධික වර්ෂාවත් සමඟ මහනුවර හඟුරන්කෙත ප්රධාන මාර්ගයට පාතමයිලපිටිය ප්රදේශයේදී වැටී තිබුණු විශාල ගලක වැදුණු ත්රිරෝද රථයක් පාලනය කර ගැනීමට නොහැකිව මාර්ගයේ අනෙක් පසෙන් පැමිණි වෑන් රථයක ගැටී සිදුවූ අනතුරකින් ත්රිරෝද රථයේ රියදුරු එම ස්ථානයේදීම මියගොස් තිබේ.
අනතුර ඊයේ (12) පස්වරු 6.45 ට පමණ සිදුව තිබෙන අතර අනතුරින් මියගොස් ඇත්තේ ජගත් විජේසිංහ (40) නැමැති අලදෙණිය පොලිස් වසමේ බරිගම පදිංචි දෙදරු පියෙකි.
මියගිය පුද්ගලයාගේ බිරිඳ ද අනතුරින් බරපතළ තුවාල ලබා මාරස්සන රෝහලට ඇතුළත් කිරීමෙන් පසු වැඩිදුර ප්රතිකාර සඳහා පේරාදෙණිය ශික්ෂණ රෝහල වෙත මාරුකර යවා තිබේ.
මයිලපිටියේ ඥාති නිවසක පැවති දානයකට සහභාගි වී ආපසු නිවෙස බලා එමින් සිටියදී මෙම යුවළ අනතුරට මුහුණ දී තිබෙන බව පොලීසිය පවසයි.
වර්ෂාවත් සමඟ හඟුරන්කෙත මහනුවර මාර්ගයට අදාළ ස්ථානයට ඉහළින් ඇති කන්දේ සිට ගල් පෙරළෙන බවත් එසේ පහළට ඇදී ආ ගලක මෙම ත්රිරෝද රථය මුලින් ගැටී තිබෙන බවත් පොලිස් පරීක්ෂණ මගින් අනාවරණය වී තිබේ.
අධික වාර්ෂාව හේතුවෙන් ත්රිරෝද රථයේ රියදුරුට මාර්ගයට වැටී තිබුණු ගල නොපෙනෙන්නට ඇතැයි පොලීසිය සැක කරයි.
සිද්ධිය සම්බන්ධයෙන් තළාතුඔය පොලීසිය වැඩිදුර පරීක්ෂණ සිදු කරයි.
