මනම්පිටිය නිමල් ජයරත්න –
සිවිල් ආරක්ෂක බලකා මූලස්ථාන යටතේ පාලනය වන වැලිකන්ද නෙළුම්වැව ඩී 08 සිවිල් ආරක්ෂක ගොවිපළ තුළ ඉපැරණි චෛත්යයක් පිහිටා තිබූ ස්ථානයක් මීට දින කිහිපයකට පෙර කැනීම් කර එහි තිබූ පුරාවස්තු රැගෙන ඇති ගොස් තිබේ.
පොළොන්නරුව වැලිකන්ද සිවිල් ආරක්ෂක බලකා මූලස්ථානය මගින් මෙම ගොවිපළ පාලනය කරන අතර එම නිධන් වස්තු කැනීම් කරන දින කීපය තුළ එම ස්ථානයේ සිවිල් ආරක්ෂකයින් නොසිට ඇති බවත්, එලෙස ගොවිපල තුළ සිවිල් ආරක්ෂකයින් නොසිට ඇත්තේ පුරාවස්තු කැණීම් කිරීමට අවස්ථාව සැලසීමක් වශයෙන් බවට සැකකරන බවත් මේ සම්බන්ධව චෝදනා කරන නෙලුම්වැව ගොවීහු පවසති.
නෙළුම්වැව සහ ඒ අවට පුරාවස්තු පිහිටා තිබෙන ස්ථාන මීට පෙරද නිදන් වස්තු ජාවාරම්කරුවන් විසින් කැණීම් කර ඇති බවත්, මෙම පුරාවස්තු රැකගැනීමට නිසි ආරක්ෂක වැඩපිළිවෙළක් යොදවන ලෙස වත්මන් ජනාධිපති අනුර කුමාර දිසානායක ඇතුළු ඒ සම්බන්ධ ක්රියා කරන අමාත්යාංශ සහ අදාළ බලධාරීන්ගෙන් ඉල්ලීමක් කරන බවත් ප්රදේශවාසීහු පවසති.
ගොවි සංවිධාන නියෝජිතයින් සහ ගොවීන් මෙන්ම පරිසරවේදීන් එල්ල කරන චෝදනාව පිළිබඳ අප පොළොන්නරුව වැලිකන්ද රිදීපොකුණ
සිවිල් ආරක්ෂක බලකා මූලස්ථානයේ දෙවන අණදෙන නිලධාරී ප්රසාත් ගුණරත්නගෙන් දුරකථනයෙන් කළ විමසීමකදි ඔහු කියා සිටියේ, එම කැනීම් කර ඇත්තේ ගොවිපොළ තුළ නොව ඒ ආසන්නයේ බවය. මේ පිළිබඳව වැලිකන්ද පොලිසියෙන් පැමිණ විමර්ශනයක් සිදුකර ඇති බව ද ඔහු පැවසුවේය.
අප මේ සම්බන්ධයෙන් වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායකගෙන් දුරකථනයෙන් කළ විමසීමකදී ඔහු සඳහන් කළේ,එලෙස නිදන් වස්තු කැණීම් කිරීම පිළිබඳව, මේ දක්වාම පැමිණිල්ලක් පොලිසියට නොලැබුන බවත්, ඒ සම්බන්ධ විමර්ශනයක් සිදුකර නොමැති බවත්ය.
අනතුරුව අප මේ සම්බන්ධව වැලිකන්ද රිදීපොකුණ සිවිල් ආරක්ෂක බලකා මූලස්ථානයේ අණදෙන නිලධාරී රෝහිත නවරත්නගෙන් දුරකථනයෙන් කළ විමසීමකදී ඔහු පැවසුවේ, කැනීම් කර ඇත්තේ සිවිල් ආරක්ෂක බලකා මූලස්ථානයේ ගොවිපල තුළ නොවන බවත්,එම කැණීම් සිදුකර ඇත්තේ මීට මාස එකහමාරකට පෙර බලකා මූලස්ථානය ආසන්නයේ බවත්ය.
