පළවා හළ ජනාධිපතිවරයෙකුගේ ධූර කාලය සම්පූර්ණ කරදීමට පැමිණි රී ලොඩ් ජනාධිපතිවරයා විසින් පොලිස්පති ධූරය රීලෝඩ් කරමින් සිට තමන්ට අවශ්ය පොලිස්පතිවරයෙක් පත්කරගෙන සිදුකරන අවුලටත් වඩා බරපතල ව්යවස්ථාමය අවුලක් නීතිපති ධූරය රීලෝඩ් කරන්නට ගොස් ඇති කිරීමට නියමිත බව ජනාධිපති නීතිඥ උපුල් කුමාරප්පේරුම අවධාරණය කළේය. ඒ ඊයේ (10) පැවති ජාතික ජන බලවේගයේ නීතිඥයෝ මාධ්ය හමුව අමතමිනි.
ඔහු පෙන්වා දෙන්නේ ව්යවස්ථාව සහ රටේ සමස්ථ අභිලාෂය ව්යසනයට ලක් කරමින් මැතිවරණ කල් දැමීමට සූදානම්වන ජනාධිපතිවරයා ඉදිරියේ ඇතිවිය හැකි දැවැන්ත විරෝධය මර්ධනය කරගැනීමට තමාට හීලෑ පොලිස්පතිවරයෙක් සේම නීතිපතිවරයාට සේවා දිගුව ලබා දී තමාට හීලෑ අගවිනිසුරුවරයෙක් පත්කරගෙන මහා විනාශයක් කිරීමේ පූර්ව සූදානම ඉඟි මේ වනවිට පහළ වෙමින් ඇති බවය.
ජනාධිපති නීතිඥ උපුල් කුමාරප්පේරුම ඒ බිහිසුණු අනාගත තත්ත්වය විග්රහ කරන්නේ මෙසේය.
“අපේ ව්යවස්ථාවේ ඉතා පැහැදිලිව තිබෙනවා නීතිපතිවරයාට විශ්රාම යාමට නියමිත කාලයක්. ඔහු අවුරුදු 60ක් සම්පූර්ණ වන තෙක් විතරයි මේ ධුරය දැරිය හැක්කේ. හැටෙන් එහාට සේවය දීර්ඝ කිරීමක් හෝ පත්කිරීමක් කළ නොහැකියි. ඒ සඳහා ව්යවස්ථාවේ ප්රතිපාදන නැහැ. ඒක නිසා ජනාධිපතිවරයා දරන ප්රයත්නය එක පැත්තකින් ව්යවස්ථා විරෝධියි. අනෙක අනීතිකයි. ”
නීතිපති තනතුර දේශපාලනීකරණය වුනොත් සමස්ථය බිඳ වැටේවි!
“මෙවැනි පත්වීමක් මේ ආකාරයෙන් කිරීමට උත්සාහ කළහොත් නීතිපති දෙපාර්තමේන්තුව ඇතුලෙන්ම යම් ආකාරයක විරෝධතාවයන් එන්න පුළුවන්. අවුරුදු 60න් පසු නීතිපතිවරයෙකුට එක දිගට මාස හය බැගින් සේවා දිගු ලබාදීමට ගියහොත් පහළ සිටින නිලධාරීන් විශාල අපේක්ෂාභංගත්වයකට පත්වෙනවා. එවිට නීතිපති දෙපාර්තමේන්තුව සම්පූර්ණයෙන්ම අකර්මණ්ය වෙනවා වගේම නීතිපතිවරයාගේ ධුරය යම් ආකාරයක දේශපාලනීකරණයට ලක්වුණාය කියන සැකය රට තුළත් නීතිපති දෙපාර්තමේන්තුව තුළත් ඇති විය හැකියි. ප්රතිපත්තිමය කාරණය තුළ නීතිපතිවරයා කියන ධුරය දේශපාලනීකරණය වුවහොත් සමස්තයම බිඳ වැටීමකට ලක්විය හැකියාව තිබෙනවා. තමන්ගේ අනාගත අපේක්ෂාවන් පේන්නේ නැතිනම් මිනිස්සු අකර්මණ්ය වෙනවා. මේවැනි කටයුතු නිසා, නීතිපති දෙපාර්තමේන්තුවේම කාර්ය හා කර්තව්යය කියන එක බිඳවැටීමට පුළුවන්. ”
“පසුගිය කාලය පුරාම සිටි නීතිපතිවරු අවුරුදු 60න් විශාම ගියා. කිසිවෙක් අවුරුදු හැටෙන් පසුව සිටියේ නැහැ. ජනාධිපතිවරයා කියා සිටින්නේ පාස්කු ප්රහාරයේ විමර්ශන සහ නඩු කටයුතුවල කාර්යයන් වෙනුවෙන් නීතිපතිවරයාට සේවා දිගුවක් ලබාදීමේ අවශ්යතාව තිබෙන බවයි. පාස්කු ප්රහාරය සම්බන්ධයෙන් විමර්ශනයේ අධීක්ෂණ කටයුතුවල සිටි ප්රධානම නිලධාරියා ඩී. ලිවේරා මහත්මයා සේවයෙන් විශ්රාම ගියා. පාස්කු ප්රහාරය සම්බන්ධයෙන් එක නඩුවක් අවසන් වෙලා තවත් නඩුවක් පැවරී තිබෙනවා. නීතිපතිවරයාට සේවා දිගුවක් ලබාදුන හොත් මෙය ඉතා නරක පූර්වාදර්ශයක් වෙනවා.”
මේ හදන්නේ හීලෑ අගවිනිසුරුවරයෙක් පත් කරගන්න ද?
“අග්රවිනිශ්චයකාරවරයාගේ ධුර කාලය දෙසැම්බර් මාසයෙන් අවසන් වුණාට පසුව, මේ නීතිපතිවරයාගේ සේවා දිගුව ඒ සමගම අග්රවිනිශ්චයකාරවරයා ලෙස පත්කරන්න ඉඩ තිබෙනවා. එවැනි තත්වයකදී නැවතත් පෙර තත්වයටම පත්වෙනවා. එවිට අධිකරණය ගැන තිබෙන විශ්වාසය කඩ වෙනවා. අධිකරණයේ ස්වාධීනත්වය බිඳ වැටුණා යැයි කිය හැකියි. අධිකරණයට අනවශ්ය මැදිහත්වීමක් සිදුවුණා යැයි කියන්න පුළුවන්. ඒ වගේම සේවා දිගුව ලබාදීමෙන් ජනාධිපතිවරයා නීතිපති දෙපාර්තමේන්තුවට, ශ්රේෂ්ඨාධිකරණයට මැදිහත් වුණා කියන්න පුළුවන්කම තිබෙනවා. මේ නිසා සමස්තයම බිඳ වැටීමට ඉඩ තිබෙනවා.
කතෝලික සභාව මේ කරුණ ප්රතික්ෂේප කර, ප්රකාශයක් කර තිබෙනවා. ඔවුන් එහි කියනවා, පාස්කු විමර්ශන මුවාවෙන් දේශපාලන විනාශයන් කරන්න එපා කියා. එය හරිම අවාසනාවන්ත තත්වයක්. මෙවැනි පූර්වාදර්ශයක් දුන්නොත් නීතිපති දෙපාර්තමේන්තුවේ පහළ නිලධාරීන් අධෛර්යයට පත්විය හැකියි. ඒ වගේම ඔවුන් අනෙක් පැත්තට හිතන්න පුළුවන් දේශපාලන හස්තයක් එක්ක ගැට ගැහුනොත් තමන්ට අවශ්ය දේ කර ගන්න පුළුවන් කියා. රාජ්ය සේවකයන්ගේ උසස්වීම් ගන්නා ක්රමය අවුල්කර දැමුවායින් පස්සේ ඔවුන් නොදැනුවත්වම දේශපාලන කඳවුරක් වටා එකතුවීමට පුළුවන්කම තිබෙනවා.
මේ තත්වය තමයි අපි නැති කළ යුත්තේ. මේක නීති විරෝධියි වගේම ව්යවස්ථාවට පටහැණියි. මේ පත්කිරීම සම්බන්ධයෙන් විරුද්ධත්වය ප්රකාශ කරන්නැයි අපි රටේ ජනතාවගෙන් ඉල්ලා සිටිනවා.
