මෙතෙක් කල් පැවති රාජ්ය සේවයේ පැවති සාම්ප්රදායික දේශපාලන පළිගැනීම් මින් ඉදිරියට රාජ්ය නිලධාරීන්ට අත් විඳන්නට සිදුනොවන බවත්, කාර්යක්ෂම ජනතාවාදී රාජ්ය සේවයක් නිර්මාණය කිරීම සඳහා කැපවන රාජ්ය සේවකයින් වෙනුවෙන් තමන් පෙනී සිටින බවත් ජනාධිපති අනුර කුමාර දිසානායක ප්රකාශ කළේය.
ජනාධිපති අනුර කුමාර දිසානායක කෘෂිකර්ම, ඉඩම්, පශු සම්පත් , වාරිමාර්ග , ධීවර හා ජලජ සම්පත් අමාත්යවරයා ලෙස අද (03) පෙරවරුවේ කෘෂිකර්ම අමාත්යංශයේදී වැඩ භාරගැනීමෙන් අනතුරුව අමාත්යාංශ නිලධාරීන් සමඟ පැවති සාකච්ඡාවේදී මේ බව සඳහන් කළේය.
රාජ්ය සේවකයින් ද ජනතාව තෘප්තිමත් වන ඵලදායී හා කාර්යක්ෂම රාජ්ය සේවාවක් ඇති කිරීමට ක්රියා කළ යුතු බවද සඳහන් කළ ජනාධිපතිවරයා ග්රාමීය දිළිඳුබව තුරන් කිරීම සඳහා කෘෂිකර්ම අමාත්යාශයට පැවරී තිබෙන කාර්යභාරය අතිමහත් වන අතර රාජ්ය නිලධාරීන්ගේ ක්රියාකාරීත්වය අනුව දිළිඳු බව තුරන් වන්නේද නැතිද යන වග තීරණය වනු ඇති බවය.
මෙවර ජනාධිපතිවරණයේදී පුරවැසියා නව දේශපාලන සම්ප්රදායක් කෙරෙහි විශ්වාසය තබා ඇති බවත් ඒ සඳහා පැරණි දේශපාලන සංස්කෘතියට තිබෙන විරෝධතාවය, පූරවැසියා මුහුණ දෙන ආර්ථික ගැටලු හා රාජ්ය සේවයේ කාර්යභාරය පිළිබඳ පුරවැසියා තෘප්තිමත් නොවීම බලපා ඇති බවත් ජනාධිපති අනුර කුමාර දිසානායක පෙන්වා දුන්නේය.
එම නිසා කාර්යක්ෂම ජනතාවාදී රාජ්ය සේවාවක් ඇති කිරීම සඳහා ගත යුතු සෑම ක්රියාමාර්ගයක්ම ගැනීමට කටයුතු කරන බව පැවසූ ජනාධිපතිවරයා ආර්ථිකය බිඳ වැටීම පිටුපස වංචාව දූෂණය තිබූ බව ජනතාව විශ්වාස කරන බවත් එය වැළැක්වීම සඳහා මෙවර ජනවරම ලබාදී ඇති බවත් කියා සිටියේය.
රාජ්ය දේහය පුරා පැතිර පවතින වංචා දූෂණ නැවැත්වීම සඳහා ජනතාව තැබූ විශ්වාසය ජනාධිපතිවරයා ලෙස තමන් රකින බවත් රාජ්ය සේවකයින්ද තමන්ගේ වගකීම නිසි අයුරින් ඉටු කිරීමට කැපවන ලෙසත් ජනාධිපතිවරයා රාජ්ය සේවකයින්ගෙන් ඉල්ලා සිටියේය.
මහ මැතිවරණයක් එළඹෙන තෙක් පවතින ඉදිරි දින හතළිහක කාලය සංක්රාන්තික කාලයක් වන අතර එම කාලය තුළ රාජ්ය සේවාව බිඳ නොවැටී පවත්වාගෙන යාමට රාජ්ය සේවකයා කටයුතු කළ යුතු බවද ජනාධිපතිවරයා කීවේය.
මෙතෙක් සිටි නායකයින් මාධ්ය ඉදිරියේ රාජ්ය නිලධාරීන් ප්රශ්න කළ ආකාරයෙන් මින් ඉදිරියට මාධ්ය ඉදිරියේ රාජ්ය නිලධාරීන් ප්රශ්න කිරීමට ලක් නොකරන අතර එවැනි මාධ්ය සංදර්ශන තමන් පිළි නොගන්නා බවත් රාජ්ය සේවකයාගේ ගරුත්වය රකිමින් පුරවැසියා තෘප්තිමත් වන රාජ්ය සේවාවක් නිර්මාණය කිරීමට බලාපොරොත්තු වන බවත් ජනාධිපති අනුර කුමාර දිසානායක මෙහිදී වැඩි දුරටත් ප්රකාශ කළේය.
කෘෂිකර්ම අමාත්යංශයේ වත්මන් තත්ත්වය සහ ඉදිරි කටයුතු පිළිබඳව ද ජනාධිපති අනුර කුමාර දිසානායක අමාත්යාංශ ලේකම්වරු ඇතුළු අමාත්යංශයේ ඉහළ නිලධාරීන් සමඟ මෙහිදී දීර්ඝ ලෙස සාකච්ඡා කරනු ලැබීය.
