දිනසේන රතුගමගේ –
යාපනයේ රාජ්ය බැංකුවක ලිපිකරු පත්වීම් ලබා දෙන බව පවසා රුපියල් කෝටි තුනක පමණ මුදලක් වංචා කළ යාපනයේ රාජ්ය බැංකුවක හිටපු කළමනාකාරවරයෙකු ඊයේ (29) යාපනය පොලීසිය විසින් අත් අඩංගුවට ගෙන තිබේ.
ඔහු සේවය කළ බැංකුවේ ලිපිකරු පත්වීම් ඇති බවත් තමන් ඉහළ පෙළේ බැංකු නිලධාරීන් දන්නා හඳුණන නිසා ඔහුට එම පත්වීම් ලබා දිය හැකි බවත් පවසමින් එක් අයෙකුගෙන් රුපියල් ලක්ෂ 15 බැගින් මේ හිටපු බැංකු කලමනාකාරවරයා විසින් අල්ලස් ලබා ගෙන තිබේ.
මේ අන්දමට යාපනය මුලතිව් හා කිළිනොච්චිය යන පළාත් වල තරුණ තරුණියන් විසි දෙනෙකුට වඩා වැඩි පිරිසකගෙන් ඔහු මුදල් එකතු කරගෙන ඇත.
මුදල් ලබා දුන් නමුත් රැකියා නොලැබීම නිසා එම මුදලෙන් විදේශ රටවලට යාමට අපේක්ෂා කළ තරුණයින් දෙදෙනෙකු හිටපු බැංකු කළමනාකාරවරයා හමු වී ඔවුන්ගේ මුදල් ආපසු ඉල්ලා තිබේ.
කාලයක් මුදල් ලබා දීම ප්රතික්ෂේප කළ ඔහු පසුව මුදල වෙනුවෙන් මතු දාතම චෙක් පත් දෙකක් එම තරුණයින් දෙදෙනාට ලබා දී ඇත.
අදාල දිනයේදී තරුණයින් එම චෙක්පත් බැංකුවට ඉදිරිපත් කළද ගිණුමේ මුදල් නොමැතිකම මත චෙක් පත් දෙක අගරු චෙක්පත් වී ඇත.
පසුව මේ පිළිබදව එම තරුණයින් දෙදෙනා බැංකු වාර්තා සමග යාපනය පොලීසියේ විශේෂ වංචා විමර්ශන අංශයට පැමිණිලි කිරීමෙන් පසුව හිටපු බැංකු කළමනාකාරවරයා අත් අඩංගුවට ගෙන තිබේ.
යාපනය පොලීසිය ඔහුගෙන් ප්රශ්න කොට ඔහුව අධිකරණය වෙත ඉදිරිපත් කිරීමට පියවර ගෙන ඇත.
