සූරියවැව නුවන් ජයසේකර –
සිය බිරිය සමග අනියම් ඇසුරක් පැවැත්වූ බව කියන ලුණුගම්වෙහෙර වෙහෙරගල පදිංචි ඥාති පුද්ගලයෙකුට රාජකාරී ගිනි අවියෙන් වෙඩි තබා මිට වසර 13කට පෙර ඝාතනය කිරීමේ වරදට වරදකරු වු පොලිස් කොස්තාපල් වරයෙකුට හම්බන්තොට මහාධිකරණ විනිසුරු රෂන්ත ගොඩවෙල මහතා ඊයේ (08) මරණීය දණ්ඩණය නියම කළේය.
මෙලෙස මරණීය දණ්ඩනය නියම කෙරුණේ 03 කණුව,බෝදාගම,තණමල්විල පදිංචිව සිටි තිස්සමහාරාම පොලිසියට අනුයුක්තව රාජකාරි සිදුකළ පොලිස් කොස්තාපල් වරයෙකු වු 54 හැවිරිදි හෙට්ටිආරච්චිගේ ජයසේන නැමති දෙදරු පියෙකුටය.
චූදිත 2008.11.01 වන දින පෙරවරු 5.45ට පමණ රාජකාරියේ සිටියදී වෙහෙරගල අගුණුකොළවැව පදිංචි 41 හැවිරිදි දිසානායක මුදියන්සේලාගේ ජයසුන්දර නැමති මරණ කරුගේ නිවසට ගොස් රාජකාරි ගිනි අවියෙන් වෙඩි තබා ඔහුව ඝාතනය කර තිබේ.
චුදිත විසින් මෙලෙස ඝාතනය කර තිබුණේ සිය බිරියගේ වැඩිමහළු සහෝදරියගේ පුරුෂයාය. මුලික පොලිස් පරික්ෂණ වලදී අනාවරණය වි තිබුණේ මරණ කරු කලක් තිස්සේ චුදිතගේ බිරිය සමග අනියම් ඇසුරක් පවත්වා ඇති බවය.
අදාල වෙඩිතැබීමෙන් පසු චුදිත ටී 56 ගිණි අවිය සමග කුඩාඔය ප්රදේශයේ කැලයක සැඟව සිටියදී හමුදා නිළධාරීන් විසින් අල්ලා තණමල්විල පොලිසියට බාරදීමෙන් පසු තිස්සමහාරාම මහේස්ත්රාත් අධිකරණයට ඉදිරිපත් කර තිබේ.
පසුව සිද්ධිය පිළිබදව තිස්සමහාරාම මහේස්ත්රාත් අධිකරණයේ පැවති මුලික නඩු විභාගයෙන් පසු නීතිපතිවරයා විසින් චූදිතට එරෙහිව 2014.12.03 වන දින හම්බන්තොට මහාධිකරණය හමුවේ අධිචෝදනා ගොනුකර තිබේ. ඒ අනුව පැවති නඩු විභාගයේදි චුදිතට එරෙහිව නගා තිබූ අධිචෝදනාව පැමිණිල්ල විසින් සාධාරණ සැකයෙන් ඔබ්බට ඔප්පු කිරීම හේතුවෙන් හම්බන්තොට මහාධිකරණ විනිසුරු රෂන්ත ගොඩවෙල චුදිතට මරණීය දණ්ඩනය නියම කළේය.
මරණීය දණ්ඩනය නියම කෙරුණු චුදිත ශ්රි ලංකා ජනාධිපති වරයා විසින් මරණීය දණ්ඩනය නියම කරන තෙක් වැලිකඩ බන්ධනාගාරයේ රඳවා තබන ලෙසට මහාධිකරණ විනිසුරු වරයා විසින් නියෝග කළේය.
නිතිපති වරයා වෙනුවෙන් රජයේ අධිනීතීඥ ශෙහාන් මුස්තාපා පැමිණිල්ල මෙහෙයවන ලදි.
