ලලිත් චාමින්ද –
ශ්රිලංකා ගුවන් හමුදාවේ ගුවන්භටයින් සිව් දෙනෙකු රාජ්ය සේවයෙන් බැහැරව පුද්ගලික ආයතනයක් වෙත මුදාහැර රුපියල් විසි තුන් ලක්ෂ, හැට දහස්, හයසිය අසුවක වැටුප (2,360,680) රජයෙන් ගෙවා ඇති බැව් ජාතික විගණන කාර්යාලය මගින් නිකුත්කොට ඇති විගණන වාර්තාවක සදහන් වේ.
මෙකී ගුවන් භටයින් සිව් දෙනා 2023 වර්ෂයේ මාර්තු 01 දින සිට සැප්තැම්බර් 30 දක්වා මාස හතක් සඳහා මෙම පුද්ගලික ආයතනය වෙත මුදාහැර තිබුණි. එම කාලය තුළ වැටුප රජයෙන් ගෙවා ඇති බව විගණනය මගින් අනාවරණය කොට ඇත.
රජයේ වැටුප් ලබන නිලධාරියෙකු රාජ්ය සේවයේ වෙනත් තනතුරකට මුදාහැරිය හැකි වුවත් ඉන් බැහැර වෙනත් වු රජයේ නොවන බාහිර ආයතනයන්හි කටයුතු වෙනුවෙන් යෙදවිය නොහැකි බවද විගණන වාර්තාවේ සඳහන් වේ.
ශ් රිලංකා ගුවන් හමුදාව විසින් එම නියමයෙන් බැහැරව මෙම ගුවන් භටයින් සිව්දෙනා පුද්ගලික ආයතනයක් වෙත මුදාහැර තිබුණි. එමෙන්ම කටුනායක ගුවන් හමුදා මුලික කඳවුරේ ගුවන් භටයින් 31 දෙනෙකු මාස තුනක් වු කාලයක් සඳහා තම නිත්ය රාජකාරියෙන් බැහැරව වෙනත් බාහිර ආයතනයන්හි කටයුතු සඳහා යොදවා තිබුණි.
මෙම ගුවන් භටයින් සිව් දෙනා මේ වනවිට ගුවන් හමුදා මුලස්ථානය වෙත වාර්තාකර ඇති බව ගුවන් හමුදාව විසින් විගණනයට සඳහන් කොට ඇත.
