මින් ඉදිරියට දේශපාලන කටයුතුවල දී ජනාධිපතිවරයාට කිසිම සහයක් ලබා නොදෙන අතර ඔහුගේ දේශපාලන රැස්වීම්වලට එක්වන සියලුම පොහොට්ටු මන්ත්රීවරුන් සම්බන්ධව විනය ක්රියාමාර්ග ගෙන පක්ෂයෙන් නෙරපන බව පොදු ජන පෙරමුණේ මහ ලේකම් සාගර කාරියවසම් අද ( 29 ) නිවේදනය කළේය.
එමෙන්ම පොහොට්ටුවේ අනුමාතියක් නොගෙන ජනාධිපතිවරණය සඳහා අපේක්ෂකයින් ලෙස ඉදිරිපත්වන සියලු දෙනාටම එරෙහිව විනය ක්රියාමාර්ග ගැනීමට අද දේශපාලන මණ්ඩලයේ දී අති මහත් බහුතරයකින් අනුමත වූ බව ද මහලේකම්වරයා කීවේය.
ඉදිරි ජනාධිපතිවරණය සඳහා ශ්රී ලංකා පොදුජන පෙරමුණේ පොහොට්ටුව ලකුණ යටතේ අපේක්ෂකයකු ඉදිරිපත් කිරීමට එම පෙරමුණේ දේශපාලන මණ්ඩලය තීරණය කිරීමත් සමග මෙම තීන්දුව ගෙන ඇත.
අද පැවති එම පෙරමුණේ දේශපාලන මණ්ඩල රැස්වීමේ දී මෙම තීරණය ගත් බවත් දේශපාලන මණ්ඩලයේ සාමාජිකයින් 82 දෙදෙනාගෙන් 79 ක් රැස්වීමට එක්ව සිටි අතර ඉන් 11 දෙනෙක් හැර අනෙක් සියලුම සාමාජිකයින් පොහොට්ටුව ලකුණ යටතේ පොහොට්ටුවෙන් අපේක්ෂකයෙක් ඉදිරිපත් කිරීමේ යෝජනාව සම්මත කළ බවත් වාර්තා වේ.
දේශපාලන මණ්ඩල රැස්වීම නිමා වී මාධ්ය වෙත අදහස් දැක්වූ පොදු ජන පෙරමුණේ මහ ලේකම් සාගර කාරියවසම් පැවසුවේ මෙවැන්නකි.
“අද පොහොට්ටුවේ දේශපාලන මණ්ඩලය රැස් වුනා පොහොට්ටුවේ ජනාධිපති අපේක්ෂකයා පිළිබඳ තීන්දුවක් ගැනීමට. එහිදී යෝජනාවක් ඉදිරිපත් කළා පක්ෂය වෙනුවෙන් පක්ෂයේම සාමාජිකයෙක් ඉදිරිපත් කළ යුතුය කියන කාරණය සම්බන්ධයෙන්. එහිදී කීප දෙනෙක් ඊට විරුද්ධව අදහස් දැක්වූවා. අති බහුතරයක් ඊට පක්ෂව අදහස් දැක්වූවා.
ඒ අනුව මත විමසුමක් කළා. ඒ අනුව ඉතා වැඩි බහුතරයෙන් සම්මත වුනා ඉදිරි ජනාධිපතිවරණය සඳහා ශ්රි ලංකා පොදු ජන පෙරමුණෙන් පොහොට්ටුව ලකුණ යටතේ අපේක්ෂකයෙක් ඉදිරිපත් විය යුතු බවට.
ඊට අමතරව මේ තීන්දුවට විරුද්ධව ක්රියා කරන යම් අයෙක් වේ නම් ඔවුන්ට එරෙහිව විනය පියවර ගැනීමටත් ඒ වගේම පක්ෂයේ කිසි යම් කෙනෙක් පක්ෂයේ අනුමැතියකින් තොරව ජනාධිපතිවරණයට ඉදිරිපත් වෙනවා නම් ඒ අයටත් විරුද්ධව වහාම විනය ක්රියාමාර්ග ගත යුත බවටත්, යෝජනා සම්මතයක් සිදුකර ගත්තා.
ඉදිරි දින කීපය තුළ දැනට සලකා බලමින් සිටින අපේක්ෂකයින් අතරින් සුදුසුම අපේක්ෂකයා ජනාධිපතිවරණයට සුදුසම ජයගත හැකි අපේක්ෂකයා ඉදිරිපත් කරනවා.
දැන් අප පක්ෂය විසින් ඉදිරිපත් කරන්න තීන්දු කළා අපේක්ෂකයෙක්. ඒ නිසා වර්තමාන ජනාධිපතිවරයාට කිසිම සහයෝගයක් ලබා දෙන්න පුලුවන් කමක් නෑ. ඒ තත්ත්වය තුළ මින් ඉදිරියට අපේ පක්ෂයේ කවුරුන් හෝ වෙනත් මැතිවරණ වේදිකාවක හිටියොත් ඔවුන් සම්බන්ධව විනය පියවර ගන්නවා.
සාගර කාරියවසම් කීවේය.
