-
බීමත්කම පරීක්ෂා කිරීමට රෝහල්ගත වීමෙන් පසු ලබා ගත් රුධිර සහ මුත්රා සාම්පල රස පරීක්ෂකට යොමු කළ නමුත් තවම වාර්තා නොලැබුන බව පොලිසිය අධිකරණයට කියයි….
ආන්දෝලනාත්මක රිය අනතුරක් සිදුකළ ගම්පහ දිස්ත්රික් ජාතික ජන බලවේගයේ පාර්ලිමේන්තු මන්ත්රී හිටපු කතා නායක අශෝක රන්වලගේ රියදුරු බලපත්රය තාවකාලිකව අත්හිටුවීමට මහර මෙහේස්ත්රාත් බණ්ඩාර ඉලංගසිංහ අද ( 19) නියෝග කළේය.
එමෙන්ම චූදිත මන්ත්රීවරයා ජාතික ප්රවාහන අධිකාරියට යොමු කර ඔහුට රිය පැදවීම සඳහා යෝග්යතාවයක් තිබේ දැයි නැවත පරීක්ෂා කර අධිකරණයට වාර්තාවක් ඉදිරිපත් කරන ලෙසත් මහේස්ත්රාත්වරයා නියෝග කරනු ලැබුවේය.
පසුගිය 11 වැනිදා සපුගස්කන්ද දෙහිමුල්ල හන්දියේ දි සිදුවුන මෙම රිය අනතුරින් කුඩා බිළිදෙකු ඇතුළු තිදෙනෙකුට තුවාල සිදුවුන අතර රන්වලට එරෙහි නීතිය ක්රියාත්මක කිරීමේ වෙනසක් සම්බන්ධව සමාජ විරෝධයක් නිර්මාණය වූයේය.
කෙසේ වෙතත් චූදිත මන්ත්රීවරයා අද දිනයේදී අධිකරණයට ඉදිරිපත් වූයේත් නැත. ඔහු වෙනුවෙන් අධිකරණයට ඉදිරිපත් වූ නීතිඥවරයා අධිකරණයට දන්වා සිටියේ සිය සේවා දායකයා මේ වනවිටත් රෝහලේ නේවාසිකව ප්රතිකාර ලබන බැවැන් අධිකරණය හමුවේ පෙනී සිටීමට නොහැකි බවය.
රන්වලගේ නීතිඥයා අධිකරණයට කීවේ රිය අනතුර නිසා පාදයකට හානි වී ඇති කාන්තාවට රුපියල් පනස් දහසක් ද , තුවාල ලද බිළිඳාට රුපියල් විසි පන් දහසක් ද, ඔහුගේ මවට රුපියල් විසිපන් දහසක් ද වශයෙන් මුදල් වන්දි මුල් අවස්ථාවේ දී ලබා දුන් බවය.
එහිදී විනිසුරුවරයා පැවසුවේ රිය අනතුර සම්බන්ධ වූ නඩු කටයුත්ත තවමත් තම අධිකරණය හමුවේ විභාග වන බැවින් වන්දි මුදල් සම්බන්ධ නියෝග දීමට අධිකරණය මැදිහත් නොවන නමුත් සහන මුදලක් ලබා ගැනීමට පැමිණිලිකාර පාර්ශවය එකඟ වන්නේ නම් එයට මැදිහත්වීමක් සිදුනොකරන බවය.
තමන් එම මුදල ලබා ගැනීමට සූදානම් නොමැති බව පාදයට දැඩි ලෙස හානි වී ඇති කාන්තාවගේ සැමියා එම අවස්ථාවේ දී අධිකරණයට දැන්වූයේය.
සැකකරු අනතුර සිදුවන අවස්ථාවේ දී බීමත්ව සිටියේ දැයි අනාවරණය කර ගැනීම සඳහා රෝහල්ගතව සිටිය දී ලබා ගත් ලේ හා මුත්රා සාම්පල රජයේ රස පරීක්ෂවකරයා වෙත යවා ඇතත් මේ දක්වා ඒ් පිළිබඳව වාර්තාව ලැබී නැති බව මේ අවස්ථාවේ දී පොලිසිය අධිකරණයට දන්වනු ලැබුවේය.
කරුණු ඉදිරිපත් වන ආකාරය විමසමින් මහේස්ත්රාත්වරයා සැකකාර මන්ත්රීවරයා තවමත් රෝහල්ගතව සිටීම පිළිබඳ විමසුවේය. මහේස්ත්රාත්වරයා ප්රශ්න කර සිටියේ රිය අනතුරින් තුවාල ලැබුවේ පැමිණිලිකාර පාර්ශවය ද නැතහොත් විත්තිකරුදැයි පොලිසියෙන් විමසා සිටියේය. පොලිසිය කීවේ අනතුරින් තුවාල ලැබූ පැමිණිලිකාර පාර්ශවයේ තිදෙනෙක් රෝහල්ගත කර ඇති බවය. එසේ නම් අනතුරින් තුවාල නොලැබූ විත්තිකරු තවමත් රෝහල්ගතව සිටින්නේ ඇයිදැයි මහේස්ත්රාත්වරයා පොලිසියෙන් විමසුවේය.
ඒ් අවස්ථාවේ දී ඉදිරිපත් වූ රන්වලගේ නීතිඥයා අධිකරණයට කීවේ සිය සේවාදායකයා අයහපත් සෞඛ්ය තත්ත්වය හේතුවෙන් රෝහලේ නේවාසිකව ප්රතිකාර ලබන බවය.
නඩුව යළි ජනවාරි මස 16 වැනිදාට කැඳවීමට අධිකරණය දින නියම කළේය.
