යළි රට ගොඩනැන්වීම සඳහා ජනවරමක් ලැබූ ජනාධිපති අනුර කුමාර දිසානායකට පැවරි ඇති වගකීම දුෂ්කර සහ සහ භාරදූර කටයුත්තක් බවත්, ඒ කටයුත්ත සාර්ථක කරගැනිම සඳහා ආශීර්වාදය මෙන්ම පූර්ණ සහයෝගය ලබා දෙන බවත් කොළඹ අග රදගුරු අති උතුම් මැල්කම් කාදිනල් රන්ජිත් හිමිපාණෝ පැවසූහ.
කොළඹ අග රදගුරු නිල නිවසට පැමිණ ජනාධිපති අනුර කුමාර දිසානායක උන්වහන්සේ බැහැදැකීමෙන් අනතුරුව මාධ්ය වෙත අදහස් දක්වමින් කාදිනල් හිමිපාණෝ මේ බව කීහ .
එහිදී කාදිනල් තුමා මෙසේ ද ප්රකාශ කළේය.
ශ්රී ලංකාවේ වැඩිමනත් ජනතාවගේ කැමැත්තෙන් ජනාධිපති ධූරයට පත් වෙච්චි අපේ අනුර කුමාර දිසානායක මහත්මයාට මම සුබ පතනවා.
ඒ වගේම මම කල්පනා කරනවා මේ අවස්ථාවේ දී ශ්රී ලංකාව තුළ අවශ්යම වෙනසක් ඇති කිරීමේ බාරධූර වගකිම දැන් එතුමාගේ කර මතට රටේ ජනතාව පවරලා තියනවා.
මේක භාරදූර කටයුත්තක්. ඒක දුෂ්කර කටයුත්තක් වෙන්න පුලුවන්. නමුත් අපි එතුමාට සම්පූර්ණ අපේ සහයෝගයත්, ආශීර්වාදයත් ඒ සඳහා ලබා දෙන බවට ප්රතිඥා දෙනවා.
ඒ වගේම විශේෂයෙන්ම දිළිඳු ජනතාව ගැන සිතමින් ඔබතුමාගේ කාර්ය සහ කටයුතු ඉදිරියට කරගෙන යන්න කියලා ඔබතුමාගෙන් ඉතාම ඕනෑකමින් ඉල්ලා සිටිනවා.
ජනාධිපතිවරයා සමග කළ සාකච්ඡාව ප්රස්තුතය කුමක් වී දැයි මාධ්ය කළ විමසීමක දී උන් වහන්සේ පැවසුවේ රටේ පොදු කටයුතු සම්බන්ධව කතා කළ බවය. එමෙන්ම පාස්කු ප්රහාරය සම්බන්ධව නිශ්චිත විමර්ශන සිදුකර සත්ය හෙළිදරව් කිරීම සඳහා උපරිම ශක්තිය යොදවන බව ජනාධිපතිවරයා සහතික කළ බව ද උන්වහන්සේ මාධ්යයට කීහ.
