යහපාලන රජය විසින් මෙරට සෑම දරුවකු සඳහා ම ලබා දෙන සුරක්ෂා රක්ෂණ ආවරණයේ ප්රතිලාභ කප්පාදු කිරීමටත් අදාළ ප්රතිලාභ අඩු ආදායම්ලාභී පවුල්වල දරුවන් සඳහා පමණක් සීමා කිරීමටත් රජය තීරණය තර ඇතැයි ද සන්ඩේ ටයිම්ස් පුවත් පත වාර්තා කරයි. ඒ අනුව ඉදිරියේදී රජයේ පාසැල්වලට යන මුදල් ගැටලු සහිත සිසුන්ගේ, දෙමාපියන් හෝ නීත්යනුකූල භාරකරුවකුගේ මරණයක් සඳහා ලබාදෙන සුරක්ෂා රක්ෂණාවරණය රු. 200,000 සිට රු. 75 000 දක්වා අඩු කිරීමට රජය තීරණය කර ඇත.
මීට අදාළ සංශෝධිත චක්රලේඛයක් අධ්යාපන අමාත්යංශයේ ලේකම්වරයා විසින් නිකුත් කරනු ලැබ තිබේ.
පසුගිය වසරේ මාර්තු 13 වෙනි දා නිකුත් කරන ලද චක්රලේඛයේ සඳහන්ව තිබූ පරිදි දෙමව්පිය මරණයක් සඳහා පවුලේ දරුවන් සියලු දෙනා වෙනුවෙන් වෙන් කර ඇති උපරිම මුදල වෙන රු. 600 000 ද, රු. 225 000 දක්වා අඩු කර ඇත.
නව චක්රලේඛයට අනුව මෙම මුදල පවුලේ පාසැල් යන වයසේ සිටින සියලුම දරුවන් අතර සමානව බෙදී යයි. දෙමව්පියන් දෙදෙනාම මිය ගියහොත් , මරණ වෙනුවෙන් වෙන් වෙන මුදල වෙන වෙනම දරුවන් වෙත ලබා දෙන බව අමාත්යංශ ලේකම් එම්. එන්. රණසිංහ මහතා පවසයි. අදාළ චක්රලේඛය මේ වෙන විට පළාත් ලේකම්වරුන්, අධ්යාපන අධ්යක්ෂවරුන් හා විදුහල්පතිවරුන් වෙතට නිකුත් කර තිබේ.
‘සදහටම සුරකිමු ජාතියේ දරුවන් යන’ තේමාව යටතේ 2017 දී ඉදිරිපත් කළ අයවැය යෝජනාවට අනුව මෙම රක්ෂණ ක්රමය ක්රියාත්මක කරන ලදී. ඒ අනුව රාජ්ය අනුග්රහය ලබන රක්ෂණ ආවරණයක්, ශ්රී ලංකා රක්ෂණ සංස්ථාව මඟින් වසරක කාලයක් සඳහා ලබා දෙනු ලැබේ.
