-
වසරේ මුල් දවස් 24 තුළ මුහුදෙන් අත් අඩංගුවට ගත් මත්ද්රව්යවල වීදි වටිනාකම රුපියල් බිලියන 08 ඉක්මවයි… මේ වසරේ අත් අඩංගුවට ගත් වැඩිම මත්ද්රව්ය තොගය මේ කිලෝ ග්රෑම් 270යි…
දකුණු මුහුදේ සිදුකළ විශේෂ මෙහෙයුමකදී මත්ද්රව්ය සමඟ නාවික හමුදා භාරයට ගත් බහුදින ධීවර යාත්රා දෙක සහ සැකකරුවන් 11 දෙනා මේ වන විට දික්ඕවිට ධීවර වරාය වෙත රැගෙන එනු ලැබ තිබේ.
ශ්රී ලංකා පොලිසියෙන් ලද බුද්ධි තොරතුරකට අනුව නාවික හමුදාව විසින් මෙම මෙහෙයුම සැලසුම් කර තිබිණි.
නාවික හමුදාවේ ගැඹුරු මුහුදු ආවේක්ෂණ නෞකා (Offshore Patrol Vessels) යොදාගනිමින් දින කිහිපයක් පුරා දකුණු මුහුදේ සිදුකළ සෝදිසි කිරීමකින් පසු මෙම අත්අඩංගුවට ගැනීම සිදු විය.
එක් යාත්රාවක සැකකරුවන් 05ක් සහ අනෙක් යාත්රාවේ සැකකරුවන් 06ක් ලෙස යාත්රා දෙකෙහි සිටි සැකකරුවන් 11 දෙනෙකු යාත්රා දෙක සමග අත් අඩංගුවට පත් වී තිබේ.
මූලික පරීක්ෂණවලට අනුව මෙම යාත්රා තුළ කිලෝග්රෑම් 270 කට ආසන්න මත්ද්රව්ය තොගයක් පවතින බවට සැක කෙරේ.
නාවික හමුදා මාධ්ය ප්රකාශක කමාන්ඩර් බුද්ධික සම්පත් ප්රකාශ කළ පරිදි, මෙම මත්ද්රව්ය තොගයේ නිශ්චිත බර සහ වර්ගය ඉදිරි විමර්ශනවලදී තහවුරු කර ගැනීමට නියමිත බවය.
දැනට වරාය වෙත රැගෙනවිත් ඇති යාත්රා දෙක සහ සැකකරුවන් 11 දෙනා වැඩිදුර විමර්ශන සහ නීතිමය කටයුතු සඳහා පොලිස් මත්ද්රව්ය නාශක කාර්යාංශය වෙත භාරදීමට කටයුතු සූදානම් කර ඇත.
මේ වසරේ මුල් දවස් 24 තුළ සමුද්ර තීරයෙන් අත් අඩංගුවට ගත් විශාලම මත්ද්රව්ය තොගය මෙම මත්ද්රව්ය කිලෝග්රෑම් 270ක ප්රමාණය ය.
මේ වසර තුළ මුහුදු මගින් මත්ද්රව්ය ජාවාරම් කිරීම සම්බන්ධයෙන් දේශීය පුද්ගලයින් 30කට අධික සංඛ්යාවක් සහ විදේශීය සැකකරුවන් කිහිපදෙනෙකු (විශේෂයෙන් ඉරාන සහ පාකිස්ථාන ජාතිකයින් විය හැකියි) නාවික හමුදා බුද්ධි අංශ සහ වෙරළාරක්ෂක බලකාය එක්ව අත්අඩංගුවට ගෙන ඇත.
මන්නාරම සහ මිගමුව අවට මුහුදු සීමාවන්හි කළ වැටලීම් වලදී පසුගිය දින 23 තුළ දළ වශයෙන් තවත් කිලෝග්රෑම් 180 – 200 ක පමණ හෙරොයින් සහ අනෙකුත් මත්ද්රව්ය නාවික හමුදාව විසින් අත්අඩංගුවට ගෙන තිබුණි. මේ වසරේ මෙතෙක් අත් අඩංගුවට ගත් වැඩිම මත්ද්රව්ය තොගය වන මෙම කිලෝ ග්රෑම් 270ක මත්ද්රව්ය තොගයත්, පසුගිය දින 24 තුළ උතුරු සහ වයඹ මුහුදු තීරයේ කළ වැටලීම්ව දී කේරල ගංජා කිලෝ ග්රෑම් 800කට අධික ප්රමාණයත් සමග මෙතෙක් මේ වසරේ අත්අඩංගුවට ගත් මුළු මත්ද්රව්ය තොගයේ වීදි වටිනාකම (Street Value) රුපියල් බිලියන 8 ඉක්මවන බව නාවික හමුදා මූලාශ්ර පවසයි.
