මනම්පිටිය නිමල් ජයරත්න –
පොළොන්නරුව ඇතුළු මහවැලි බී කලාපයේ මෙවර මහ කන්නයේ මේ දිනවල අස්වනු නෙලීමත් පෞද්ගලික වෙළදුන් විසින් වී මිල පහළ දැමීමෙන් කලාපයේ සමස්ථ ගොවි ජනතාව දැඩි ව්යසනයකට පත්ව සිටින බව පොළොන්නරුව ඇතුළු මහවැලි බී කලාපයේ ගොවී සංවිධාන නිවේදනය කරයි.
රජය මෙවර වී මිලදී ගැනීමේ වැඩපිළිවෙළ ක්රියාත්මක නොකිරීමෙන් මේ වනවිට පෞද්ගලික වී වෙලදුන් සහ මහා පරිමාණ වී මෝල් හිමිකරුවන් කීරි සම්බා වී කිලෝවක් රුපියල් 109 දක්වාත්, සම්බා වී කිලෝවක් රුපියල් සියය දක්වාත්, නාඩු කිලෝවක් රුපියල් 90 දක්වාත් පහළ දමා ඇති බව මෙම ගොවි සංවිධාන පෙන්වා දෙයි.
මෙවර මහ කන්නයේ වී කිලෝවක් නිෂ්පාදනය කිරීම සඳහා දළ වශයෙන් රුපියල් 120 ක පමණ මුදලක් වැය වී ඇති බවත්, තමන්ට ලාභයක් ලැබීමට නම් රජය වී කිලෝවක් රුපියල් 150 ක මුදලකටවත් මිලදී ගත යුතුව ඇති බවත් පොළොන්නරුව ඇතුළු මහවැලි බී කලාපයේ ගොවි සංවිධාන ගණනය කර පෙන්වයි.
කුඹුරක් වගා කිරීම සඳහා සීසෑම්, පොහොර, කෘමිනාශක, වල්නාශක, සහ අනෙකුත් වියදම් අනුව රුපියල් ලක්ෂ හතරක පමණ මුදලක් වැය වී ඇතැයි කියන ඔවුහු අක්කර දෙකහමාරකින් දී කිලෝ 3000ක් ලබා ගැනීමට හැකියාව ඇතොත් වී කිලොවක් රුපියල් 110 ට අලෙවි කිරීමෙන් තමන් ලබන ශුද්ධ පාඩුව රුපියල් 70000ක් බවත් ඔවුහු පෙන්වා දෙති
“ඒ මුදලට වී විකිණුවොත් අක්කර දෙකහමාරකින් ලැබෙන්නේ රුපියල් 3,30.000 ක් විතරයි. අක්කරයකින් රුපියල් 28 000ක් පාඩුයි.“
තමන්ගෙන් කිරි සම්බා කිලෝවක් එකසිය නවයට මිලදි ගන්නා පොළොන්නරුවේ මහා මෝල් හිමියන් ඒවා සහල් බවට පත්කර කිලෝවක් රුපියල් 385 කට ද රුපියන් අනූවකට මිලදී ගන්නා නාඩු වී කිලෝවක් සහල් කර රුපියල් දෙසීය විසිපහකට ද මහා පරිමාණ මෝල් හිමිකරුවන් අලෙවි කරන බවද ගොවි සංවිධාන කියයි.
ඒ අනුව පවතින තත්ත්වයන් සැලකිල්ලට ගනිමින් ,පෞද්ගලික වෙළදුන්ට තමන්ගේ වී තුට්ටු දෙකට ලබා ගැනීමට එරෙහිව වැට බඳිමින් වී කිලෝවකට සහතික මිලක් නියමකරන ලෙසත් රජය වී මිලදි ගැනීමේ වැඩපිළිවෙළ ක්රියාත්මක කරන ලෙසත් පොළොන්නරුවේ ගොවීහු රජයෙන් ඉල්ලා සිටිති.
