මත් කුඩු කිලෝ තුන්සීයකට ආසන්න ප්රමාණයක් සහිව දකුණු දිග ඈත මුහුදේ යාත්රා කරමින් තිබිය දී නාවික හමුදාව විසින් අඩංගුවට ගත් බහුදින ධීවර යාත්රාව තංගල්ල ධීවර වරායට රැගෙනවිත් තිබේ.
ආරක්ෂක අංශ වෙත ලද තොරතුරකට අනුව ශ්රී ලංකා නාවික හමුදාව සහ පොලිස් මත්ද්රව්ය නාශක කාර්යාංශය විසින් සිදුකළ ඒකාබද්ධ මෙහෙයුමකින් මෙම ධීවර යාත්රාව සොයා ගෙන ඇත.
අදාළ යාත්රාවේ මත්ද්රව්ය පාර්සල් 15ක් තිබී හමු වී ඇති අතර, එහි හෙරොයින් කිලෝ 100ක්, අයිස් කිලෝ 200ක් පැවති බවත්, රිවෝල්වරයක්, නවීන පන්නයේ පිස්තෝල ගිනි අවියක් සහ මැගසින් දෙකක් අත් අඩංගුවට ගත් බව නියෝජ්ය ආරක්ෂක ඇමති විශ්රාමික මේජර් ජනරාල් අරුණ ජයසේකර පැවසුවේය.
අරුණ ජයසේකර නියෝජ්ය ඇමතිවරයා තංගල්ල ධීවර වරායේ දී මෙසේ ද පැවසුවේය.
“දකුණු ප්රදේශයේ ගැඹුරු මුහුදේ නාවික හමුදාව විසින් මෙහෙයුමක් දියත් කළා ඔවුන්ට ලැබුණු තොරතුරක් අනුව. ජාත්යාන්තරයේ සංවිධාන සහ අනෙකුත් රටවල් එක්ක සම්බන්ධ වෙලා තොරතුරු හුවමාරු කරගෙන නාවික හමුදාව විසින් විශේෂ ක්රියාන්විතයක් ලෙස මත්ද්රව්ය තොගය ප්රවාහනය කරමින් තිබූ යාත්රාව අත් අඩංගුවට ගත්තා සැකකරුවන් හය දෙනෙක් සමග .”
“මේ කරගෙන යන විමර්ශනවලින් දැනට සනාථ වෙලා තියනවා අයිස් කිලෝ ග්රෑම් 200ක් සහ හෙරොයින් කිලෝ ග්රෑම් 100ක් පමණ. එහි වටිනාකම දළ වශයෙන් කෝටි 400ක් පමණ කියලා.”
“ඊට අමතරව රිවෝල්වර එකක් සහ නවීන පන්නයේ පිස්තෝලයක් සහ මැගසින් දෙකක් රට තුළට ඇතුළු කරන්නට ජාවාරම්කරුවන් උත්සාහ කළ වෙලාවේ සිද්ධියට සම්බන්ධ සැකකරුවන් සමග මේ අත් අඩංගුවට ගත්තේ.”
“මේ සංවිධානාත්මක අපරාධ කියලා සඳහන් කරන්නේ. මත්ද්රව්ය ජාවාරම, අවි ජාවාරම, අනෙක් අපරාධ සියල්ලක් එකට බද්ධ වෙච්චි ක්රියාවයක් තමයි මේ සිද්ධ වෙන්නේ. ඒ නිසා වත්මන් රජය මත්ද්රව්ය මැඩලීමේ මෙහෙයුම සම්බන්ධව කටයුතු කරන සියලුම ආයතනවලට ස්වාධීනව කටයුතු කරන්න දීලා තියනවා. ඒ නිසා තමයි මේ මෙහෙයුම් සාර්ථකව කරන්නේ.”
“මේ වර්ෂය ඇතුළ නාවික හමුදාවෙන් පමණක් හොරොයින් කිලෝ ග්රෑම් 898ක් කේරළ ගංජා කිලෝ ග්රෑම් 5810ක්, අයිස් කිලෝ ග්රෑම් 2480ක් හෂීස් කිලෝ ග්රෑම් 33ක්, විස මත් පෙති ලක්ෂ අටක් අත් අඩංගුවට ගෙන ඇතැයි නියෝජ්ය ආරක්ෂක ඇමති විශ්රාමික මේජර් ජනරාල් අරුණ ජයසේකර පැවසුවේය.”
