-
කැසිනෝ ගසා පැරදුන නිසා බොරු අපරාධයක් මවලා…ඔහු වරාය නගරයේ ආයෝජනය කළ කෝටිපති ව්‍යාපාරිකයෙක් නොවේ… පිරමීඩ ජාවාරම්කරුවෙක්!
තම නිවසට පැන කෝටි හතරකට ආසන්න වත්කම් ප්‍රමාණයක් කොල්ල කෑ බවට බොරැල්ල පොලිසියට පසුගිය 20 දා අලුයම පැමිණිල්ලක් කළ බොරැල්ල ලේක් ඩ්‍රයිව් පාරේ පදිංචිව සිටි කෝටිපති චීන ජාතිකයා සිදුකර ඇත්තේ බොරුවක් බවත් ඔහු වරාය නගරයේ ආයෝජනය කරන ව්‍යාපාරිකයෙක් නොව, අන්තර්ජාතික පිරමීඩ ජාවාරමක් රට තුළ සිට මෙහෙයවන ජාවරම් කරුවෙක් බවත් විමර්ශනවලදී හෙළි දරව් වී ඇත.
අපරාධකරුවන් කණ්ඩායමක් නිවසට පැන කොල්ල කෑ බව කියමින් ඔහු විසින් පිටපතකට අනුව බොරු පැමිණිල්ලක් කරන්නේ කැසිනෝ සූදුවට ගොස් පිරමීඩ ජාවාරමින් රැස් කරගත් කෝටි ගණනක මුදල් පරාජය වීම සිය හවුල්කරුවන්ගෙන් වසන් කරගැනීමට බව ද විමර්ශනවලින් හෙළි වී ඇත.
මේ වනවිට දකුණු කොට්ඨාස අපරාධ විමර්ශන කාර්යාංශයේ නිලධාරීන් විසින් බොරු පැමිණිලිකාර චීන ජාතිකයා ඇතුළු චීන ජාතිකයින් දෙදෙනෙක්, ඔහුගේ භාෂා පරිවර්තක සහ තවත් පුද්ලයෙක් අත් අඩංගුවට ගෙන තිබේ.
වාර්තාවන පරිදි සිද්ධිය මෙසේය.
කොළඹ වරාය නගරයේ ආයෝජනය කළ ව්‍යාපාරිකයෙක් ලෙස පෙනී සිටිමින් Su Zu Qing නැමැති මෙම 38 හැවිරිදි චීන ජාතිකයෙක් පසුගිය 20 දා අලුයම පොලිසියට පැමිණිලි කරමින් දන්වා සිටියේ 19 දා රාත්‍රී කාලයේ දී නිවසට කඩා වැදුන පිරිසක් කෝටි හතරකට ආසන්න දේපල සහ වත්කම් ප්‍රමාණයක් කොල්ල කෑ බවය.
බොරැල්ල ලේක් ඩ්‍රයිව් පාරේ නිවසට ඇතුළු වූ කොල්ලකරුවන් තිදෙනෙක් තමන්ටත් , තම භාෂා පරිවර්තකයාටත් අරක්කැමියාටත් පහර දී ගිනි අවියක් පෙන්නා මරණීය තර්ජන කර දෑත් දෙපා ගැටගසා අනතුරුව නිවසේ තිබූ ඇමරිකානු ඩොලර්, යුවාන්, තායි බාත්, හොංකොං ඩොලර්, ඩිරාම් ඇතුළු විදේශීය මුදල් ද, ජංගම දුරකථන 11ක්, ලැප්ටොප් පරිගණක 07ක්, අර්මාන් වර්ගයේ අත් ඔරලෝසුවක්, දේශීය මුදල්, විදේශීය මත්පැන් බෝතල් 05ක්, සීසීටීවී පද්ධතයේ DVR කොටස සහ KDH වෑන් රථයක් කොල්ලකෑ බවට මෙම චීන ජාතිකයා පැමිණිලි කර තිබිණි.
නමුත් විමර්ශනය ආරම්භයේ දී මේ පැමිණිල්ලේ ගැටලු සහගත ස්ථාන රාශියක් විමර්ශකයන්ගේ අවධානයට ලක් වූයේය.
ඒ ඔස්සේ පරීක්ෂණ කරගෙන යනවිට විමර්ශකයින්ට හෙළි වූයේ කොළඹ වරාය නගරයේ ව්‍යාපාර කටයුතුවල නිරතවන බව කී මෙම චීන ජාතිකයා එවැනි ආයෝජකයෙක් නොව, ජාත්‍යාන්තර පිරමීඩ ජාවාරමක නිරතවන පුද්ගලයෙක් බවය.
ඔහු මෙම ජාවාරම තවත් චීන ජාතිකයන් කීප දෙනෙක් සමග එක් වී රට තුළ මෙහෙයවා ඇත.
නීති විරෝධී ජාත්‍යාන්තර පිරමීඩ ජාවාරම මේ පුද්ගලයා විසින් පවත්වාගෙන ගොස් ඇත්තේ මාසික රුපියල් ලක්ෂ 07ක කුලියකට ගත් බොරැල්ලේ ලේක්ඩ්‍රයිව්හි නිවස කේන්ද්‍ර කරගෙන කොළඹ 07 කුරුඳුවත්ත පිහිටි ස්ථානයක බව ද විමර්ශන අංශ කියයි.
ලැබුන තොරතුරු මත පොලිසිය කුරුඳුවත්තේ එම ස්ථානය වටලන අවස්ථාව වනවිට එහි වැඩ කරමින් සිටි චීන ජාතිකයින් 15ක් පමණ එම ජාවාරම පවත්වාගෙන යන ලැප්ටොප් පරිගණක 40ක ප්‍රමාණයක් රැගෙන පලා ගොස් ඇතැයි විමර්ශන අංශ අනුමාන කරයි.
ජාවාරමේ මුදලින් කැසිනෝ ගසා පරාජය වූ පසු එය වසන් කරගැනීමට සකස් කළ මෙම අපරාධ සැලසුම ක්‍රියාත්මක කිරීම වෙනුවෙන් චීන ජාතිකයාගේ භාෂා පරිවර්තක වූ රියදුරුට ලක්ෂ 15ක මුදලක් ලබා දී ඇතැයි අනාවරණය වී තිබේ.
දකුණු කොට්ඨාස අපරාධ විමර්ශන කාර්යාංශය පරීක්ෂණ පවත්වයි.
මේ ලිපියත් කියවන්න….
අත් පා බැඳ දමා කෝටිපති චීන ව්‍යාපාරිකයෙකුගේ බොරැල්ලේ නිවස කොල්ල කාලා…
