තත්ත්වයෙන් බාල ඖෂධ භාවිතයෙන් ඇස් අන්ධවූ වින්දිත රෝගීන් 17 දෙනෙකුට රජය මගින් වන්දි ලබා දීමටත්, එම බාල ඖෂධ ගෙන්වූ සමාගමට එරෙහිව නීතිමය පියවර ගැනීමටත් කැබිනට් මණ්ඩලය එකඟවූ බව ආණ්ඩු පක්ෂයේ ප්රධාන සංවිධායක, සෞඛ්ය හා ජනමාධ්ය ඇමති වෛද්ය නලින්ද ජයතිස්ස අද (07) පාර්ලිමේන්තුවේ දී පැවසුවේය.
පාර්ලිමේන්තුවේ දී අසන ලද ප්රශ්නයකට පිළිතුරු දෙමින් ඇමතිවරයා පැවසුවේ මෙවැනි වන්දි ප්රදානයන් සඳහා මින් පෙර පූර්වාදර්ශ නොමැති බවය. ඇමතිවරයා මෙසේ ද කීවේය.
පහුගිය කාලයේ දි තත්ත්වයෙන් බාල ඖෂධ ගෙනා සමාගම් හඳුනාගෙන තියනවා. ඒ සිදුවීම් වුනේ කොහොමද කියලා තමයි හොයමින් ඉන්නේ. නුවරඑළිය රෝහලේ ඇසේ සුද ඉවත් කිරීමේ ශල්යකර්මයට භාජනය කළ රෝගීන් ගණනාවකගේ ඇස් අහිමිවීමේ තත්ත්වයන් වාර්තා වුනා. සමහර කෙනෙක් පූර්ණ අන්ධ භාවයට පත් වුනා.
ඒ සම්බන්ධව සොයන්න සෞඛ්ය අමාත්යාංශයේ අතිරේක ලේකම්වරයෙකුගේ මූලිකත්වයෙන් කමිටුවක් පත් කරලා තිබුණා. ඒ කමිටු වාර්තාව ලැබුණා. ඒ අනුව අපි ඊයේ කැබිනට් මණ්ඩලයේ දී තීරණය කළා එම ආබාධිත තත්ත්වයට පත් කරන ලද රෝගීන් 17 දෙනෙකුට රජය මගින් වන්දි මුදල් ලබා දෙන්න.
මෙවැනි ආකාරයේ වන්දි ප්රදානයක් මින් පෙර සිදුවුනේ නෑ. ඒ සම්බන්ධ පූර්වාදර්ශ නෑ. ඒ විතරක් නෙමෙයි, මේ ඖෂධය ගෙන්වීම සඳහා මූලික වුන අයට නීතිමය ක්රියාමාර්ග ගන්නත් කටයුතු කරන්න කැබිනට් මණ්ඩලය තීන්දු කළා.
මේ එකින් එක විමර්ශනය කරමින් යනවා. මේවට අදාල සියලුම අයට නීතිමය ක්රියාමාර්ග ගන්නවා. ඇමතිවරයා පැවසුවේය.
