මේ දිනවල දඹුල්ලේ පැවැත්වෙන ශ්රී ලංකා – කොදෙව් විස්සයි විස්ස තරගාවලියට සහභාගි වන කොදෙව් කණ්ඩායමට නවාතැන් ලබා දී ඇති හෝටලයේ පහසුකම් ගැන ඔවුන්ගෙන් පැමිණිලි ලැබී ඇතැයි වාර්තා වේ.
ක්රීඩකයන්ගේ හා නිලධාරීන්ගේ කාමරවල වයි ෆයි නොමැති වීම හා නාන කාමර වල ජල පහසුකම් දුර්වලතා මෙම පැමිණිලිවලට හේතුව වී තිබේ.
මේ හේතුවෙන් මුල් දිනයේ කොදෙව් ක්රීඩකයන් තම ලැප්ටොප් රැගෙන වයි ෆයි සිග්නල් ඇති තැන් සොයමින් හෝටලය වටා දුව ගොස් තිබේ.
මෙම හෝටලයේම ලැගුම් සපයා ඇති තරග තීරකවරයාටද මෙම අපහසුතාවට මුහුණ දීමට සිදුවීමෙන් ඔහු ක්රිකට් බලධාරීන්ට හා හෝටල් කළමනාකාරිත්වයට පැමිණිලි කිරීමෙන් පසුව ඔහුට වෙනම රවුටරයක් ලබා දී ඇත.
පසුව සෑම ක්රීඩකයකුගේම කාමර වලට වයි ෆයි රවුටර ලබාදීමට කටයුතු කර ඇතත් සීගිරිය ප්රදේශයේ පිහිටි මෙම තරු පහේ හෝටලයේ පහසුකම් පිළිබඳව මේ මගින් හෙළිදරව් වී තිබේ.
ශ්රී ලංකා කණ්ඩායමද මීට පෙර මෙම හෝටලයේම ලැගුම් ගෙන ඇති අතර ක්රීඩකයන්ගේ නොකැමැත්ත නිසා ඔවුන්ට දඹුල්ලේම වෙනත් හෝටලයක නවාතැන් පහසුකම් ලබා දී තිබේ.
මෙහි සැඟවුණු කතාව නම් දඹුල්ලේ තරග පැවැත්වෙන විට ඒ සඳහා හෝටල් කාමර වෙන් කෙරෙනුයේ එම පළාතේ ක්රිකට් බලධාරියා වන ක්රිකට් ආයතනයේ ඉහළම නිලධාරියකු විසින් වීමය.
කොමිස් සහ වෙනත් වරප්රසාද උදෙසා මූලික පහසුකම් පිළිබඳව සොයා නොබලා සිදුකරන මෙවැනි බාල ක්රියා හේතුවෙන් අපකිර්තියට පත් වන්නේ ජාතියම බවත් දූෂණයට විරුද්ධව කටයුතු කරන ජනාධිපතිවරයා ක්රිකට් ආයතනයේ දූෂිතයන්ට එරෙහිව කටයුතු කරනතුරු අවදියෙන් සිටින බවත් ශ්රී ලංකා ක්රිකට් අභ්යන්තර ආරංචි මාර්ග කියයි.
