රනිල් වික්රමසිංහ වෙත සහයෝගය ලබා දීම සඳහා පොදු ජන පෙරමුණේ මන්ත්රී කණඩායම සහ වෙනත් දේශපාලන පක්ෂ විසින් සැලසුම් කරන නව දේශපාලන බලවේගය ගොඩ නැගීමට අගමැතිවරයා ලෙස තම ආශිර්වාදය හා සහයෝගය නිරන්තරව ලබාදෙන බව ද අගමැති දිනේෂ් ගුණවර්ධන අද (18) පැවසුවේය.
ඔහු මේ බව ප්රකාශ කළේ මල්වතු මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනායක ස්වාමින්ද්රයන් වහන්සේ බැහැදැක ආශිර්වාද ලබා ගැනීමෙන් අනතුරුව මාධ්ය හමුවේ අදහස් දක්වමිනි.
අගමැති දිනේෂ් ගුණවර්ධණ ද ප්රකාශ කළේ රජය ඉදිරියට ගෙන යෑමට සහයෝගය ලබාදුන් පොහොට්ටුවේ මන්ත්රීවරු අතිමහත් බහුතරයක් පොහොට්ටුව ගත් තීරණය ප්රතික්ෂේප කරමින් රට වැටී තිබුණු අර්බුදයෙන් ගොඩගත් රනිල් වික්රමසිංහ ට ජනපතිවරණයේ දී සහයෝගය ලබා දීමට තීරණය කළේ ප්රායෝගික සුදුසුම දේශපාලන පියවර ලෙස බව අගමැතිවරයා එහිදී පැහැදිලි කළේය.
“පොහොට්ටුවේ තීන්දුවට ප්රතිපක්ෂව රනිල් වික්රමසිංහ මහත්මයා සහයෝගය දැක්වීම සඳහා පැමිණි මන්ත්රී කණ්ඩායම පොහොට්ටුව වගේම තවත් පක්ෂ ගණනාවක් නියෝජනය කරනවා. “
“වසර දෙකක් තිස්සේ ඉතා අසීරුවෙන් ඉදිරියට පැමිණි රට මේ වනවිට නිවැරදි මාවතක ගමන් කරමින් තිබෙනවා. මේ ජයග්රහණය තව දුරටත් ආරක්ෂා කර ගනිමින් ඉදිරියට ගෙන යෑම සඳහා අප සියලු දෙනා එකට එකතු වී වැඩ කරනවා. මේ වනවිට පළාත් පාලන ආයතනයේ සිට පාර්ලිමේන්තුව දක්වා සියලුම මන්ත්රීවරු එකට අත්වැල් බැඳගෙන සිටිනවා. මේ නිසා ඉදිරි මැතිවරණයක දී තමන් ට අපේක්ෂකත්වය ලබා ගැනීමට නොහැකි වේයැයි කිසිවෙකුත් බියට පත්විය යුතු නැහැ. ඔවුන් ට කිසිදු තර්ජනයක් ඇති වීමට අපි ඉඩ තබන්නේ නැහැ. නව දේශපාලන බලවේගයක් බිහි කිරීමේ අවශ්යතාව අප තේරුම් ගෙන තිබෙනවා. ඒ වෙනුවෙන් මේ වනවිට ආරම්භ වී තිබෙන සාකච්ඡා සඳහා මගේ පූර්ණ සහයෝගය හා ආශිර්වාදය ලබා දෙනවා.” අගමැතිවරයා සහතික කළේය.
