ශ්රී ලංකාවේ පොලිස්පති ධුරය පසුගිය 31 දා අහෝසි වීමත් සමඟම පොලිස්පති ධුරය සඳහා ජ්යෙෂ්ඨ නියෝජ්ය පොලිස්පතිවරයකු පත්කිරීම ව්යවස්ථා සභාවේ අනුමැතිය මත ජනාධිපතිවරයා විසින් සිදුකළ යුතුව ඇත. .
ඒ අතරම ජනාධිපතිවරයා විසින් තවදුරටත්. සී ඩී. වික්රමරත්නට සේවා දිගුවක් ලබා දීමේ අවකාශයක් තිබෙන බවට ජනාධිපති කාර්යාලයේ අභ්යන්තර ආරංචි මාර්ග ප්රකාශ කර සිටී.
මේ අතර පොලිස්පති ධූරය සඳහා ජ්යෙෂ්ඨ නියෝජ්ය පොලිස්පති වරුන් තිදෙනෙක් පෙළ ගැසී සිටිති. ඒ දේශබන්ධු තෙන්නකෝන් නිලන්ත ජයවර්ධන සහ ලලිත් පතිනායකය.
මින් ජ්යෙෂ්ඨ නියෝජ්ය පොලිස්පතිවරුන් දෙදෙනෙක් පාස්කු ප්රහාරය සිදුවීමට දීම සම්බන්ධයෙන් පැවති සියලුම කොමිෂන් වලින් චෝදනා ලැබූ අයය.
ජ්යෙෂ්ඨ නියෝජ්ය පොලිස්පති නිලන්ත ජයවර්ධන පාස්කු ප්රහාරය වළක්වා නොගැනීම සම්බන්ධව වරදකරුවෙක් කර ශ්රේෂ්ඨාධිකරණයෙන් දඩ මුදලක් නියම කර ඇත්තේය. ඔහුගේ වත්කම් පරීක්ෂාවක් ද සිදුකර අධිකරණයට ඉදිරිපත් කරන ලෙස ඊයේ (02) නියෝග කෙරිනි. ඔහුට විරුද්ධව විනයානුකූල ක්රියාමාර්ග ගන්නා ලෙස ශ්රේෂ්ඨාධිකරණ නියෝගයක් ද තිබේ.
මේ වනවිට පොලිස් කොමිසමේ අභ්යන්තර ආරංචි මාර්ග පවසන්නේ මෙම ජ්යෙෂ්ඨ නියෝජ්ය පොලිස්පතිවරුන් තිදෙනා සම්බන්ධව පොලිස් කොමිසමින් දීර්ඝ පරීක්ෂණයක් පැවැත්වෙන බවය. එහෙත් එම පරික්ෂණ ඇල් මැරුණු ස්වරූපයකට පත් වී ඇතැයි වාර්තා වේ.
එවකට බස්නාහිර පළාත් බාරව සිටි ජ්යෙෂ්ඨ නියෝජ්ය පොලිස්පති නන්දන මුණසිංහ පොලිස් කොමිසමේ මෙම පරීක්ෂණ කමිටුවට කැඳවා ඔහුගෙන් මේ වනතුරුත් සාක්ෂි විමසා නැත.
පොලිස්පති ධූර අපේක්ෂාවෙන් සිටිනා ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් ද අවස්ථා ගණනාවක චෝදනාවට ලක්වූ නිලධාරියෙකි. ගෝල්ෆේස් අරගල භූමියට ප්රහාරයක් එල්ලවන්නට හැර රට විශාල ව්යසනයකට ඇද දැමීම සම්බන්ධව ඔහුට චෝදනා එල්ල වන්නේය. ජනාධිපති මන්දිරයෙන් ලැබුණු මුදල අමාත්යවරයා භාරයට පත් කරන ලෙස කොටුව පොලිස් ස්ථානාධිපති සාගර ලියනගේට ලබා දුන් උපදෙස් ඔහු විසින් ලිඛිතව දන්වා ඇති වීමත් ඒ පරීක්ෂණ පෙළ ගැසුනු ආකාරයත් සම්බන්ධව ගැටලු රැසක් පවතින්නේය. පාස්කු ප්රහාරය වළක්වා නොගැනීම සම්බන්ධ වගකීම් පැහැර හැරීමේ චෝදනාවත් දේශබන්දු තෙන්නකෝන් සම්බන්ධව ඇත්තේය.
ආරක්ෂක ක්රියාමාර්ග දියත් කිරීමේ දී පුහුණුව ලත් පොලිස් නිලධාරීන් යොදවා පල්ලිය තුලට එන පිරිමි පුද්ගලයන්ගේත් කාන්තා නිලධාරිනියන් යොදවා කාන්තාවන්ගේත් පූර්ණ ශරීර පරීක්ෂාවක් කරන ලෙස උපදෙස් ලබා දි ඇතැයි වාර්තා වේ.
එමෙන්ම අනෙකුත් සියලුම පල්ලි පිළිබඳවත් මේ ආකාරයෙන් දැඩි ආරක්ෂක විධි විධාන යොදවන ලෙස ජ්යෙෂ්ඨ නියෝජ්ය පොලිස්පතිවරයා දැනුම් දී ඇත. එහෙත් කොළඹ සහ කොළඹ උතුර භාර ජ්යෙෂ්ඨ නියෝජ්ය පොලිස්පතිවරුන් විසින් එම නියෝග ඉටු වී නැති බව වාර්තා වී තිබිණි. එමෙන්ම මේ එක් නියෝජ්ය පොලිස්පතිවරයෙකු ඒ අවස්ථාව වනවිට නිවාඩුවක් ගතකරමින් සිටි බැවින් නියෝජ්ය පොලිස්පති කාර්යාලයෙන් පහළට එම නියෝග ගමන් කර නොමැති බවටත් වාර්තා වී තිබේ.
කෙසේ වෙතත් කොළඹ දකුණු භාරව සිටි නියෝජ්ය පොලිස්පති වසන්ත වික්රමසිංහ සහ කළුතර නියෝජ්ය පොලිස්පති නිමල් පෙරේරා එම උපදෙස් නිසි ආකාරයෙන්ම පිළිපැද ඇති බව අනාවරණය වී ඇත.
අප ඉන්නේ උභතෝකෝටිකය ය. දැන් රටේ පොලිස්පතිවරයෙක් නැත. මෙවැනි සංක්රාන්ති කාල පැවති ඉතිහාස තිබිණි. එහෙත් මේ වනවිට තත්ත්වය වෙනස් වන්නේ පොලිස්පති තනතුර සඳහා මරාගෙන මැරෙන බලපොරයක් ඉහළ නිලධාරීන් කීප දෙනෙක් අතර නිර්මාණය වී ඇති බැවිනි.
රජයත් ඉන්නේ තීරණයක් ගැනීමේ අසීරු අඩියකය. දේශපාලනිකව මේ අවස්ථාවේ දී අප්රසාදයට සහ අනවශ්ය ගැටලුවකට නොගොස් මේ ප්රශ්නය විසඳා ගැනීමත් පහසු නැත. සුදුසුකම් සපුරා ඇති සෑම නිලධාරියෙක්ම අඩුම ගණනින් වසර 05කට එපිට සේවා කාලයක් සහිත නිලධාරීන්ය. ඒ සඳහා මෙතෙක් දියත් කළ තාවකාලික පිළියම නම් මාස තුනට, සති දෙකට තුනට හිටපු පොලිස්පතිවරයාට සේවා දිගු දෙමින් ප්රශ්නය හෙටට කල් දැමීමය.
උත්තරය නැවත වරක් ප්රශ්නයම වී ඇත. සමහර තීන්දු ඉතාම අසීරු බව සැබෑය. එහෙත් මිනිස්සු ආණ්ඩුවක් පත් කරන්නේ අසීරු අසීරු තීන්දු අසීරු අවස්ථාවල දී ගැනීමටය. අප බලානෙ ඉන්නේ ඒ අසීරු තීන්දුව රටටත් පොලිසියටත් යහපතක් වීමේ ප්රාර්ථනාව සහිතවය.
රාලහාමි –
