ඉඳුනිල් කහටපිටිය –
250කට අධික පිරිසකට ජීවිත අහිමි කරමින් 2019 වසරේ එල්ල වූ පාස්කු ඉරිදා මරාගෙන මැරෙන බෝම්බ ප්රහාර මාලාව සම්බන්ධයෙන් කෙරෙන විමර්ශනවල තීරණාත්මක හැරවුම් ලක්ෂ්යයක් සනිටුහන් කරමින්, රාජ්ය බුද්ධි සේවයේ (SIS) හිටපු ප්රධානී විශ්රාමික මේජර් ජෙනරාල් සුරේෂ් සලෙයි අත්අඩංගුවට ගෙන තිබේ.
අද (25) උදෑසන පෑලියගොඩ ප්රදේශයේදී අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් විසින් මෙම අත්අඩංගුවට ගැනීම සිදු කර ඇති බව වාර්තා වේ.
සුරේෂ් සලේ කවුද?
ඉස්ලාමීය අන්තවාදීන් විසින් පල්ලි සහ සංචාරක හෝටල් ඉලක්ක කර එල්ල කළ මෙම ප්රහාරයෙන් පුද්ගලයින් 269 දෙනෙකු මියගිය අතර සිය ගණනක් තුවාල ලැබූහ. මෙම ප්රහාරය සම්බන්ධයෙන් සුරේෂ් සලෙයිට එරෙහිව මීට පෙරද විවිධ චෝදනා එල්ල වී තිබුණි. දැනට පවතින විමර්ශනවලට අනුව, බුද්ධි තොරතුරු හිතාමතා වසන් කිරීම හෝ ප්රහාරකයන්ට මඟ පෙන්වීම සම්බන්ධයෙන් ඔහු වෙත ප්රබල සැකයක් මතු වී ඇත.
විශ්රාමික මේජර් ජෙනරාල් සුරේෂ් සලෙයිගේ වෘත්තීය ජීවිතය ප්රධාන වශයෙන් යුද හමුදා බුද්ධි අංශය වටා ගොඩනැගුණකි. ඔහු ශ්රී ලංකා යුද හමුදාවේ යුද බුද්ධි බලකායේ (Military Intelligence Corps) ජ්යෙෂ්ඨ නිලධාරියෙකු ලෙස කටයුතු කළ අතර, 2016 වසරේදී යුද බුද්ධි අංශයේ අධ්යක්ෂ (Director of Military Intelligence) ලෙස පත් විය. ඉන් අනතුරුව ඔහු මැලේසියාවේ ශ්රී ලංකා මහ කොමසාරිස් කාර්යාලයේ සහ පසුව ඉන්දියාවේ නවදිල්ලි නුවර ශ්රී ලංකා මහ කොමසාරිස් කාර්යාලයේ ආරක්ෂක උපදේශකවරයා ලෙස රාජ්යතාන්ත්රික සේවයේ ද නිරත විය. පාස්කු ප්රහාරය සිද්ධ වන්නේ ඔහු රාජ්ය තාන්ත්රික සේවයේ යෙදී සිටි වකවානුවේදී ය.
ඔහුගේ වෘත්තීය ජීවිතයේ වඩාත්ම කැපී පෙනෙන සහ ආන්දෝලනාත්මක පත්වීම සිදු වූයේ 2019 ජනාධිපතිවරණයෙන් පසුවය. 2019 දෙසැම්බර් මාසයේදී හිටපු ජනාධිපති ගෝඨාභය රාජපක්ෂ විසින් ඔහුව රාජ්ය බුද්ධි සේවයේ (SIS) අධ්යක්ෂවරයා ලෙස පත් කරන ලදී. සිවිල් නිලධාරියෙකු යටතේ පැවති මෙම ආයතනය මෙහෙයවීමට හමුදා නිලධාරියෙකු පත් කළ පළමු අවස්ථාව මෙය ලෙස ඉතිහාසයට එක් විය.
විශේෂයෙන් සටහන් කළ යුතු වන්නේ ඔහුගේ වෘත්තීය ජීවිතය ජාත්යන්තර මට්ටමේ දැඩි විවේචන සහ චෝදනා මධ්යයේ ගෙවී ගිය එකක් වීමය. විශේෂයෙන්ම එක්සත් ජාතීන්ගේ මානව හිමිකම් කවුන්සිලය වැනි ජාත්යන්තර ආයතන මගින් ශ්රී ලංකාවේ මානව හිමිකම් උල්ලංඝනය කිරීම් සහ බුද්ධි අංශ මගින් සිදු කළේ යැයි කියන අයුතු බලපෑම් සම්බන්ධයෙන් ඔහුගේ නම කිහිපවිටක්ම සඳහන් විය.
2022 වසරේදී එවකට එක්සත් ජාතීන්ගේ මානව හිමිකම් පිළිබඳ මහ කොමසාරිස්වරිය නිකුත් කළ වාර්තාවල පවා, මෙරට සිවිල් සමාජ ක්රියාකාරීන් සහ මාධ්යවේදීන් නිරීක්ෂණය කිරීම හා ඔවුන්ට එල්ල වූ බලපෑම් සම්බන්ධයෙන් රාජ්ය බුද්ධි සේවයේ වගකීම ප්රශ්න කර තිබුණි.
මීට අමතරව, 2023 වසරේ චැනල් 4 නාලිකාව එල්ල කළ මාරාන්තික චෝදනාවලින් කියැවුණේ පාස්කු ප්රහාරය මෙහෙයවූවන් සමඟ ඔහු රහසිගත සබඳතා පැවැත්වූ බවයි. සලෙයි මෙම චෝදනා ප්රතික්ෂේප කරමින් අදාළ පාර්ශවයන්ට එරෙහිව නීතිමය පියවර ගැනීමට පවා උත්සාහ කළද, ජාත්යන්තර ක්ෂේත්රය තුළ ඔහු කෙරෙහි පැවති සැකය මුළුමනින්ම ඉවත් නොවීය.
විශේෂයෙන්ම ජාත්යන්තර මානව හිමිකම් සංවිධාන සහ වින්දිතයන්ගේ පාර්ශවයන් දිගින් දිගටම පෙන්වා දුන්නේ, ඔහු රාජ්ය බුද්ධි සේවයේ ප්රධානියා ලෙස කටයුතු කිරීම පාස්කු ප්රහාරය පිළිබඳ ස්වාධීන පරීක්ෂණ පැවැත්වීමට බාධාවක් බවයි. මේ හේතුවෙන් ජාත්යන්තර ප්රජාව සහ දේශීය සිවිල් සංවිධාන ඔහු ධුරයෙන් ඉවත් කර අපක්ෂපාතී විමර්ශනයක් පවත්වන ලෙස වසර ගණනාවක සිට බලපෑම් එල්ල කර තිබුණි.
මේ තත්ත්වය තුළ ජනාධිපති අනුර කුමාර දිසානායකගේ රජය සුරේෂ් සලෙයිට සිය ධූරයෙන් ඉවත් වෙන ලෙස දැන්වූයේය. ඔහු එය ප්රතික්ෂේප කළ පසු 2024 ඔක්තෝබර් මාසයේදී සුරේෂ් සලෙයි සිය ධුරයෙන් ඉවත් කිරිමට ජනාධිපතිවරයා කටයුතු කළේය.
මෙම අත්අඩංගුවට ගැනීම හරහා පාස්කු ප්රහාරයේ වින්දිතයන්ට යුක්තිය ඉටුකිරීමේ ක්රියාවලිය නව වේගයකින් ඉදිරියට යනු ඇතැයි විචාරකයෝ විශ්වාස කරති. ඔහු අධිකරණයට ඉදිරිපත් කිරීමට නියමිත අතර, එහිදී ප්රහාරයේ තිරය පිටුපස වූ තවත් රහස් රැසක් හෙළිවනු ඇතැයි අපේක්ෂා කෙරේ.
යුක්තිය අපේක්ෂාවෙන්
අත්අඩංගුවට ගැනීමට අදාළ නිශ්චිත චෝදනා හෝ ඉදිරිපත් වී ඇති සාක්ෂි පිළිබඳව බලධාරීන් මෙතෙක් නිල ප්රකාශයක් නිකුත් කර නැත. කෙසේ වෙතත්, වින්දිතයන්ගේ පවුල් සහ සිවිල් සංවිධාන දිගු කලක සිට ඉල්ලා සිටින සාධාරණත්වය ඉටු කිරීම සඳහා වත්මන් පරිපාලනය ගෙන යන පුළුල් වැඩපිළිවෙළෙහි කොටසක් ලෙස මෙය සැලකේ.
විවිධ විමර්ශන කොමිෂන් සභා සහ ජාත්යන්තර පරීක්ෂණ මධ්යයේ ඇදී ගිය මෙම නඩුකරය, සුරේෂ් සලෙයිගේ අත්අඩංගුවට ගැනීමත් සමඟ නව මුහුණුවරක් ගනු ඇතැයි විශ්වාස කෙරේ.
