විපක්ෂයේ දේශපාලන පක්ෂ අතර සහයෝගීතාවක් ගොඩනැගීමේ සහ පොදු අරමුණක් වෙනුවෙන් පක්ෂ නායකයින් ඒකාබද්ධ කිරීමේ අරමුණින් හිටපු ජනාධිපති රනිල් වික්රමසිංහ මහතා සහ විපක්ෂයේ ප්රබල දේශපාලන කණ්ඩායමක් අතර විශේෂ සාකච්ඡාවක් අද (25) උදෑසන කොළඹ මල් පාරේ පිහිටි එක්සත් ජාතික පක්ෂ කාර්යාලයේදී පැවැත්වුන බව “අද දෙරණ” වාර්තා කරයි.
මෙම තීරණාත්මක හමුව සඳහා උදය ගම්මන්පිල, අනුර ප්රියදර්ශන යාපා, මහාචාර්ය ජී.එල්. පීරිස්, මහින්ද අමරවීර, සාගල රත්නායක, තලතා අතුකෝරාල, ප්රේම්නාත් සී. දොලවත්ත සහ සුගීශ්වර බණ්ඩාර ඇතුළු පිරිසක් සහභාගී වී ඇත.
මෙහි ප්රධාන දේශපාලන අරමුණ වී ඇත්තේ ඉදිරි කටයුතු සඳහා විපක්ෂයේ සියලු බලවේග ඒකාබද්ධ කරමින් ශක්තිමත් දේශපාලන එකමුතුවක් නිර්මාණය කිරීම බව වාර්තා වේ. පක්ෂ නායකයින් අතර පවතින විවිධ මතවාද පොදු එකඟතාවකට ගෙන ඒම සහ විපක්ෂයක් ලෙස ඉදිරියට කටයුතු කළ යුතු ආකාරය පිළිබඳව මෙහිදී දීර්ඝ වශයෙන් අදහස් හුවමාරු වී තිබේ.
දේශපාලන කටයුතුවලට අමතරව, රටේ වත්මන් සමාජ සහ ආර්ථික අර්බුද කිහිපයක් සිය දේශපාලන ප්රවේශය සඳහා යොදා ගත හැකි ආකාරය පිළිබඳව ද මෙම හමුවේදී විශේෂ අවධානය යොමු වී ඇත.
විශේෂයෙන්ම විදුලි බලාගාර සඳහා ගෙන්වන ලද ගල් අඟුරු සම්බන්ධව ඇති වී ඇති ප්රශ්නයට, ගෑස් හිඟය නිසා ඇති වී තිබෙන තත්ත්වයට, පාතාල අපරාධ කල්ලි ක්රියාකාරිත්වයත් සමග මතුවී ඇති ව්යාකූල පසුබිමට දේශපාලනිකව ආමන්ත්රණය කරන්නේ කෙසේ ද යන්න පිළිබඳව මෙහිදී සාකච්ඡා කර ඇත.
