නිල කාලය අවසන් වී තිබෙන පළාත් පාලන ආයතන පාලනය කිරීම සඳහා ඒවායේ බලතල ප්රාදේශීය සම්බන්ධීකරණ කමිටු වෙත පැවරීමට රාජ්ය පරිපාලන ස්වදේශ කටයුතු පළාත් සභා හා පළාත් පාලන අමාත්යාංශයේ ලේකම් කේ.ඩී.එන් රංජිත් අශෝක පසුගිය 09 වැනිදා නිකුත් කර තිබෙන ලිපිය ඉවත් කරගෙන ඇති බව නීතිපතිවරයා අද (13) අභියාචනාධිකරණයට දැනුම් දුන්නේය.
මෙම අනීතික ලිපිය බල රහිත කරන මෙන් ඉල්ලා සමගි ජන බලවේගය විසින් අධිකරණය ඉදිරියේ රිට් පෙත්සමක් ගොනු කිරීමෙන් අනතුරුව ප්රස්තුත ලිපිය රාජ්ය පරිපාලන ලේකම්වරයා විසින් ඉවත් කරගෙන තිබිණි.
පෙත්සම ඉදිරිපත් කරනු ලැබුවේ සමගි ජන බලවේගයේ මහ ලේකම් පාර්ලිමේන්තු මන්ත්රී රංජිත් මද්දුමබණ්ඩාර සහ පාර්ලිමේන්තු මන්ත්රී හර්ෂණ රාජකරුණා විසිනි.
එම රිට් පෙත්සම අද කැඳවූ අවස්ථාවේ දී නීතිපතිවරයා විසින් පෙනී සිටි නීතිඥයා අධිකරණයට දැනුම් දුන්නේ විෂයගත ලිපිය රාජ්ය පරිපාලන ලේකම්වරයා විසින් ඉවත් කරගෙන ඇති බවත් ඒ වෙනුවට වෙනත් ලිපියක් නිකුත් කිරීමට ඉදිරියේ දි කටයුතු කරනු ඇති බවත්ය.
පෙත්සම් කරුවන් වෙනුවෙනුවෙන් පෙනී සිටියේ ජනාධිපති නීතිඥ ෆර්මාන් කාසීම්ය.
ඔහු අධිකරණයට කියා සිටියේ අදාළ ලිපිය ඉවත් කරගෙන තිබෙන්නේ මෙම පෙත්සම ගොනු කිරීමෙන් පසුව බැවින් පෙත්සම විභාගයට නියම කරන ලෙසය.
ඒ අනුව පෙත්සම මේ මස 26 වනදා යළි කැඳවීමට අධිකරණය නියම කළේය.
අග්රාමාත්යවරයා සහ රාජ්ය පරිපාලන අමාත්යාංශයේ ලේකම්වරයා වගඋත්තරකරුවන් ලෙස නම් කර මෙම පෙත්සම ඉදිරිපත් කරමින් පෙත්සම් කරුවන් කියා සිටියේ යම්කිසි පළාත් පාලන ආයතනයක නිල කාලය අවසන්වීමෙන් අනතුරුව ඒවායේ බලය කොමසාරිස්වරයෙකු හෝ එම පළාත් පාලන ආයතනයේ ලේකම්වරයා යටතට පැවරීම සාමාන්ය නීතිමය ක්රියා පටිපාටිය වුවත් මෙම ලිපිය මගින් පරිපාලන ආයතනව බලය ප්රාදේශීය සම්බන්ධීකරණ කමිටුවලට පැවරීමෙන් ඒ නෛතික ප්රතිපාදනය උල්ලංඝණය වි ඇති බවය.
පළාත් පාලන ආයතන පනතේ විධි විධානයන්ට අනුව එම ආයතනවල බලය මෙවැනි කමිටුවකට පැවරීමට නීතිමය ඉඩකඩක් නොමැති බැවින් රාජ්ය පරිපාලන ස්වදේශ කටයුතු පළාත් සභා හා පළාත් පාලන අමාත්යාංශයේ ලේකම්වරයා විසින් මැයි 09 දා නිකුත් කළ නීති විරෝධී ලිපිය බල රහිත කරන ලෙස පෙත්සම් කරුවෝ අධිකරණයෙන් ඉල්ලා සිටියහ..
