ආහාර සුරක්ෂිතතාවය තහවුරු කිරීම සහ ජනතාවගේ පෝෂණ තත්ත්වය වර්ධනය කිරීම සඳහා ආගමික ස්ථාන කේන්ද්රගත කරගනිමින් ආහාර බැංකු සහ ආහාර හුවමාරු මධ්යස්ථාන පිහිටුවීමට රජය තීරණය කර ඇති බව ජනාධිපති මාධ්ය අංශය නිවේදනය කරයි.
මෙම තීරණය ගෙන ඇත්තේ ඊයේ (21) ආහාර සුරක්ෂිතතාවය සහ පෝෂණය සහතික කිරීමේ වැඩසටහනේ ප්රගති සමාලෝචන සාකච්ඡාවක් ආහාර සුරක්ෂිතතාවය පිළිබඳ ජනාධිපති උපදේශක ආචාර්ය සුරෙන් බටගොඩගේ ප්රධානත්වයෙන් පැවති අවස්ථාවේදීය.
ආගමික මධ්යස්ථාන කේන්ද්රකරගෙන ලංකාවේ ග්රාමසේවා වසම් 14022කම ආවරණය වන පරිදි මෙම වැඩසටහන ක්රියාත්මක කිරීමට නියමිතව ඇත.
මෙම වැඩසටහන හරහා බුද්ධ ශාසන හා ආගමික කටයුතු අමාත්යාංශයේ මූලිකත්වයෙන් දිවයිනේ දිස්ත්රික් ලේකම් කාර්යාල, ප්රාදේශීය ලේකම් කාර්යාල මට්ටමින් ග්රාමසේවා වසම් 14022ම ආවරණය කරනු ඇත.
ආහාර බැංකු සහ ආහාර හුවමාරු මධ්යස්ථාන මගින් ප්රදේශවාසීන්ගේ අතිරික්ත ආහාර ලබාගෙන ආහාර ඌනතාවයක් ඇති පවුල් අතර බෙදා දීම සිදුකරනු ලබයි.
අතිරික්ත ආහාර බෙදා ගැනීම මගින් ආහාර අපතේ යෑම ද සිදුනොවන බව වැඩටහනේ ප්රකාශකයින් පවසයි.
තම ප්රදේශවල සිටින ජනතාවගේ ජීවන තත්ත්වය පිළිබඳ ආගමික මධ්යස්ථානවල නායකයින්ට ඇගයීමක් ඇති බැවින් ආගමික මධ්යස්ථාන මුල්කරගෙන මෙම වැඩසටහන ආරම්භ වූ බවත්, වැඩසටහනට උන්වහන්සේලාගේ සක්රීය දායකත්වය ලබාගැනීම සම්බන්ධව සාකච්ඡා පවත්වා ඇති බවත් ජනාධිපති මාධ්ය අංශය දන්වා ඇත.
මේ පිළිබඳව නිකුත්කළ නිවේදනය පහත දැක්වේ.
