හැටන් රංජිත් රාජපක්ෂ –
නුවරඑළිය දිස්ත්රික් මහ රෝහලේ වෛද්යවරුන් සඳහා පවත්වාගෙන යන ආපනශාලාව මිනිස් පරිභෝජනයට නුසුදුසු ආකාරයෙන් පවත්වාගෙන යාම නිසා එම ආපනශාලාව තාවකාලිකව වසා දැමීමට නියෝගයක් නිකුත් කළ බව නුවරඑලිය මහ නගර සභාවේ ප්රධාන නාගරික සෞඛ්ය පරීක්ෂක කිත්සිරි හේරත් පැවසීය.
නුවරඑළිය මහ නගර සභාවේ සෞඛ්ය පරීක්ෂකවරුන් විසින් ඊයේ (12) දිනය පුරා සිදුකල හදිසි පරික්ෂාවකින් පසු මෙම නියෝගය නිකුත් කර තිබිණි.
නුවරඑළිය දිස්ත්රික් මහා රෝහල තුළ රෝහල් සුභසාධක සංගමය මගින් පවත්වාගෙන යනු ලබන වෛද්යවරුන්ගේ ආපනශාලාව තාවකාලිකව වසා දැමීමට වැසුම් නියෝගය නිකුත් කිරීමෙන් පසු එහි අඩුපාඩුකම් සපුරා නැවත නාගරික සෞඛ්ය පරීක්ෂකවරුන්ගේ අධික්ෂණයට ලක් කළ යුතු බවද කිත්සිරි හේරත් කීවේය.
ඊයේ දිනය තුළ සිදුකළ මෙම හදිසි පරික්ෂාවේදි මිනිස් පරිභෝජනයට නුසුදුසු ආහාර අලෙවි කිරීම , අපිරිසිදු අන්දමින් ආහාර සකස් කිරීම , නිසි සෞඛ්ය උපදෙස් නොපිළිපැදීම , ආහාර අනුභවය සඳහා අවශ්ය මූලික පහසුකම් සපයා නොතිබීම යන කරුණු යටතේ තවත් ආපන ශාලා අටක හිමිකරුවන් සඳහා නඩු පැවරීමට නුවරඑළිය මහ නගර සභාවේ සෞඛ්ය පරීක්ෂකවරුන් කටයුතු කර ඇත.
