-
නිදාගනිද්දි බිරිය විසින් ඔහුට යන්ත්රයක් සවි කළ යුතුයි ලු… ලෙඩ ගොඩාක් තිබුණත් එළියට පෙනෙන්නෙත් නැතිලු… ඔහු ලෙඩ ගනන් ගන්නේ නැති නිසා වෛද්ය අධීක්ෂණ යටතේ නිතරම ඉන්නවලු…
නින්දේ දි හුස්ම හිරවීමේ රෝගයකින් පෙළෙන රනිල් වික්රමසිංහ හිටපු ජනාධිපතිවරයා නින්දේ දී යන්ත්රයකට සවි කළ යුතු බවත්, එම යන්ත්රය ක්රියාකාරවීමට දැනුම්වත්ව ඇත්තේ ඔහුගේ බිරිය පමණක් බවත් රනිල් වික්රමසිංහ වෙනුවෙන් පෙනී සිටි ජනාධිපති නීතිඥ අනුජ ප්රේමරත්න අද කොටුව මහේස්ත්රාත් අධිකරණයට දැනුම් දුන්නේය.
රනිල් වික්රමසිංහගේ රෝගී තත්ත්වයේ බරපතලකම ගැන පෙන්වා දෙමින් ජනාධිපති නීතිඥවරයා පැවසුවේ තිබිය හැකි සෑම රෝගයක්ම සිය සේවාදායකයාට ඇති බවය.
ස්වාමීනි. මගේ සේවාදායකයාගේ හෘදය වස්තුවේ ප්රධාන ධමනි තුනක්ම අවහිරයි. මොහුට සැත්කමක් කරන්න බෑ. මොහ් නිදන්ගත වකුගඩු රෝගී තත්ත්වයකින් පසු වෙනවා. මොහු නින්දේදී හුස්ම සිරවීමේ රෝගී තත්ත්වයකින් පෙළෙනවා. මේ තත්ත්වය මත මැෂින් එකක මොහු නිදා ගැනීමේ දී සම්බන්ධ කරනවා.ක එය ක්රියා කරවන්න දන්නේ මොහුගේ බිරිය විතරයි. බැර වෙලාවත් මැෂින් එක නැති වුණොත් හෘදය නවතිනවා.
ඒ වගේම ස්වාමීනි ශරීරයේ සෝඩියම් අඩු තත්ත්වයක් මතුව තිබෙනවා. පෙනහළු ආසාදිතයි. මොහුගේ අග්න්යාශයේ උඩ කොටසේ ද ආසාදන තත්ත්වයක් තිබෙනවා. මේ රෝගී තත්ත්වයන් නිසා ශරීරයේ ප්රතිශක්තිය අඩු වෙලා. මේ තත්ත්වය නිසා මොහුට ක්ෂණිකව හෘදයාබාධයක් පැමිණීමේ අවදානමක් තිබෙනවා.
කොච්චර රෝග තිබුණත් මොහුගේ ශරීරයෙන් එය පෙන්වන්නේ නෑ. ස්වාමීනි. කෙටියෙන් කියනවා නම් මොහුට තියන්නේ ඕන ලෙඩ ඔක්කොම තියනවා. මගේ සේවාදායකයා හැබැයි ලෙඩ ගණන් ගන්නේ නෑ. වෛද්යවරු ඒ නිසා නිර්දේශ කරලා තියනවා මොහු සමීප වෙද්ය නිර්දේශ යටතේ ඉන්න ඕන කියලා.
මේ තත්ත්වය සුවිශේෂී කරුණක් ලෙස සලකා මගේ සේවා දායකයා ඇප මත මුදා හරින්න කියලා ඉල්ලා සිටිනවා.
ඒ අවස්ථාවේ දී අතිරේක සොලිසිටර් ජෙනරාල් දිලීප පීරිස් ඊට විරෝධය දැක්වූයේය.
ස්වාමීනි. මේ කියන විදිහට මේ සැකකරුට නව අනූවක් ව්යාධි තියනවා. එහෙම තියෙද්දි ඔච්චර දේශපාලනඥයො බලන්න යන්නේ. ජාතික රෝහලෙන් ඔය කියන ලෙඩ ගැන වාර්තාවක් එවලා නෑ. ඔය කිව්ව රෝගවලට ජාතික රෝහලේ ප්රතිකාර ගන්න බෑ කියලා කිව්වේත් නෑ. ඉදිරිපත් කරපු වෛද්ය වාර්තා බහුතරයක් ඊයේ ගත් ඒවා. රිමාන්ඩ් කරපුවමද ලෙඩ දැනගත්තේ .
මේ සැකකරුගේ රෝගී තත්ත්වය පිළිබඳව අධිකරණය තුළින් පත් කරන ලද විධිමත් වෛද්ය මණ්ඩලයක් හරහා වාර්තා කැඳවිය යුතුයි. මේක අපරාධ නඩුවක්. මහජන සුබසාධක නඩුවක් නෙමෙයි. නීතිඥවරු මාරු වුනාට මොවුන්ගේ ස්ථාවරය කරුණු වෙනස් වීමක් වෙලා නෑ. පෙර දින ඉදිරිපත් කළ කරුණු තමයි අදත් ඉදිරිපත් කළේ. ඇප ලබා දීමට සුවිශේෂී කරුණු කිසිවක් නෑ. එම නිසා සැකකරුට ඇප ලබාදීමට විරුද්ධ වෙනවා ස්වාමීනි.
මෙම කරුණු දැක්වීම සලකා බැලූ කොටුව මහේස්ත්රාත් නුළුපුලී ලංකාපුර සිය ඇප ලබාදීමේ නියෝගය ප්රකාශයට පත් කළාය. ලක්ෂ පනහ බැගින් වූ ශරීර ඇප තුනක් මත මුදා හරින ලෙස මුදා හරින ලෙස නියෝග කළේය.
අධිකරණ නියෝගය ලබා දීමෙන් පසු බන්ධනාගාර නිලධාරින් ඇතුළු පිරිසක් රනිල් වික්රමසිංහ හිටපු ජනාධිපතිවරය ඇප මත මුදා හැරීමට අවශ්ය පරිපාලන කටයුතු සිදුකළේය. හිටපු ජනාධිපතිවරයාගේ පරිපාලන කාර්යාලය නිවේදනය කළේ ඔහු තව දින කීපයක් කොළඹ ජාතික රෝහලේ ප්රතිකාර ගැනීමට සලස්වන බවය.
වෛද්ය ප්රතිකාර ලැබීමෙන් අනතුරුව රනිල් වික්රමසිංහ ජනාධිපතිවරයා සියලු පාර්ශවයන් ඇමතීමට සුදානම් බව ද එම නිවේදනයේ සඳහන් වේ.
