දිනසේන රතුගමගේ –
යාපනය වඩමරච්චි චැම්පියන්පත්තු වෙරළේ තිබූ දැල් ගබඩාවකට කිසියම් පිරිසක් විසින් ඊයේ ( 16 ) රාත්රියේ දී ගිනි තැබීම නිසා රුපියල් කෝටි දෙකකට ආසන්න වටිනාකමක් ඇති දැල් තොගයක් සම්පූර්ණයෙන්ම විනාශ වී ගොස් තිබේ.
වඩමරච්චි ධීවරයින් ප්රකාශ කරන්නේ එම කලාපයේ ධීවරයින් සමග තවත් කලාපයක ධීවරයින් පිරිසක් වසර ගණනාවක සිට විරසකයකින් පසුවන අතර ඔවුන් විසින් මෙම විනාශය සිදු කරන්නට ඇති බවය.
මීට පෙර ඒ පිරිස ඔවුන්ගේ ධීවර පැල්පත් කීපයකටද ගිනි තබා විනාශ කළ බව පවසන වඩමරච්චි ධීවරයෝ තමන්ට ඒ අවස්ථාවේදී විශාල පාඩුවක් සිදු වූ බවද කියා සිටියහ.
මෙවර තම දැල් ගබඩාවට ගිනි තැබීම නිසා ධීවරයින්ට ධීවර කටයුතුවල නිරත වීමට හැකියාවක් නැති අතර ඉතා සහන පදනමක් මත ඔවුන්ට හානි වූ දැල් වෙනුවට අලුතින් දැල් ලබා ගැනීමට හැකි ක්රමයක් සකසා දෙන ලෙස ධීවර දෙපාර්තමේන්තුවෙන් ඉල්ලීමක් කොට තිබේ.
දැල් ගිනි තැබීමේ සිද්ධිය සම්බන්ධයෙන් වඩමරච්චි ධීවරයෝ මරදන්කේණී පොලීසියට පැමිණිලි කොට ඇති අතර පොලීසිය සිද්ධිය සම්බන්ධයෙන් පරීක්ෂණ ආරම්භ කොට තිබේ.
