දිනසේන රතුගමගේ
මෙවර ජනාධිපතිවරණයේදී තමන්ගේ පෞද්ගලික සහය දෙමළ පොදු අපේක්ෂකයා වන බී. අරියනේත්රම් වෙත ලබා දෙන බවත් එය ඉලංකෙයි තමිල් අරුසු කච්චි පක්ෂයේ (ITAK ) මතය නොව තමන්ගේ පුද්ගලික මතය බවත් එස්.ශ්රීධරන් මන්ත්රීවරයා පැවසීය.
මන්ත්රීවරයා එසේ පැවසුවේ ඊයේ (22) කිළිනොච්චියේ පිහිටි මන්ත්රීවරයාගේ කාර්යාලයේදී ඒ දෙදෙනා අතර පැය දෙකකට වඩා වැඩි කාලයක් පැවති සාකච්ඡාවකින් අනතුරුවය.
මෙහිදී ශ්රීධරන් මන්ත්රීවරයාගෙන් අරියනේත්රම් ජනාධිපති අපේක්ෂකයාට ඉතා උණුසුම් පිළිගැනීමක් තිබූ අතර සාකච්ඡාව සදහා ඉලංකෙයි තමිල් අරුසු කච්චි පක්ෂයේ කීප දෙනෙකුද සහභාගී වී සිටියහ.
ශ්රීධරන් මන්ත්රීවරයා විසින් අරියනේත්රම් දෙමළ පොදු අපේක්ෂකයාව හින්දු ක්රමයට අනුව සිදු කෙරෙන උසස්ම පිළිගැනීම වන සළුපිලි පොරවා පිළිගැනීමක් මෙහිදී සිදු වූ අතර පසුව ඔවුන් දෙදෙනා එකිනෙකා බදා ගනිමින් සුබ පතා ගත්හ.
මෙහිදී අදහස් දැක් වූ ශ්රීධරන් මන්ත්රීවරයා කියා සිටියේ තමන් දෙමළ ජනතාවගේ සහයෙන් පාර්ලිමේන්තු මන්ත්රීවරයෙකු බවට පත් වූ නිසා දෙමළ ජනතාවට හා දෙමළ ජාතියට සහයෝගය දැක්වීමක් හා ගරු කිරීමක් වශයෙන් තමන්ගේ පූර්ණ සහයෝගය අරියනේත්රම් දෙමළ පොදු අපේක්ෂකයා වෙත ලබා දෙන බවය.
මෙවර ජනාධිපතිවරණයේදී දෙමළ ජනතාවගේ ඉරණම කුමන දිසාවකට තල්ලු වී ගියද තමන් මේ තීරණය ගන්නා ලද්දේ දෙමළ ජනතාවට යම් ගරුත්වයක් දැක්වීමට බවද කියා සිටියේය.
ඉලංකෙයි තමිල් අරුසු කච්චි පක්ෂය කුමන අන්දමක තීරණයක් ගන්නා ලද නමුත් තමන්ගේ තීරණය වෙනස් නොකරන බවත් තමන් ගත් තීරණය පක්ෂයේ ඉදිරි පැවැත්මට හෝ පක්ෂයේ උන්නතියට බාධාවක් නොවන බවත් ශ්රී ධරන් මන්ත්රීවරයා මෙහිදී කියා සිටියේය.
