හැටන් රංජිත් රාජපක්ෂ –
නුවරඑලිය පොලිස් කොට්ඨාසයේ පොලිස් ස්ථාන කිහිපයක පොලිස් ස්ථානාධිපතිවරුන් සහ සෙසු පොලිස් නිලධාරින් නුවරඑලිය මහෙස්ත්‍රාත් අධිකරණයේ අද (06) කැඳවු නඩුවල අධිකරණ කටයුතු සඳහා පෙනී සිටීම වර්ජනය කිරීම හේතුවෙන් අද (06) දින නුවරඑළිය මහෙස්ත්‍රාත් අධිකරණයේ කටයුතු තාවකාලිකව අත්හිටුවීමට සිද්ධ වූයේය.
නුවරඑළිය මහෙස්ත්‍රාත්වරිය විසින් කැඳවන නඩු සදහා පෙනී සිටින පොලිස් නිලධාරීන්ට සැකකරුවන් ඉදිරියේදී විවෘත අධිකරණය තුළ අපහාස වන ආකාරයෙන් බැන වැදුණේ යැයි කියන සිද්ධියක් පදනම් කර ගනිමින් නුවරඑළිය කොට්ඨාසයේ පොලිස් ස්ථානාධිපතිවරුන් මේ ලෙස අධිකරණ කටයුතුවලින් ඉවත් වී ඒ පිලිබඳව නුවරඑලිය සහකාර පොලිස් අධිකාරි 01 වෙත ගොස් පැමිණිලි කර තිබේ.
මාස කිහිපයකම සිටම මහෙස්ත්‍රාත්වරිය විවෘත අධිකරණයේදි සැකකරුවන් ඉදිරියේ පොලිස් නිලධාරින්ට අපහාස වන ආකාරයෙන් බැන වදින බවත්, එවන් තත්ත්වයක් මත නිල ඇදුමේ ගෞරවය ආරක්ෂා කර ගනිමින් පොලිසියේ රාජකාරි කිරිමට නොහැකි බවත් නුවරඑලිය පොලිස් කොට්ඨාශයේ පොලිස් නිලධාරීහු සිය උසස් නිලධාරීන්ට දන්වා සිටියහ.
මේ පිලිබදව මිට ප්‍රථම නුවරඑලිය ජෙෂ්ඨ පොලිස් අධිකාරිවරයා දැනුවත් කළ බවත්, එයට විසඳුමක් නොලැබුණු නිසා තමන් අද (06) දින උදැසන 11.30 ට පමණ අධිකරණ කටයුතු සිදු කරමින් පැවති අවස්ථාවේ අධිකරණ කටයුතු වලින් ඉවත් වු බව පොලිසිය කීහ.
ඩයගම , ආගරපතන , තලවකැලේ , ලිදුල , නානුඔය , පට්ටිපොල , කඳපොල යන පොලිස් ස්ථානවල පොලිස් ස්ථානාධිපතිවරුන් සහ සෙසු පොලිස් නිලධාරින් මෙසේ රාජකාරි කටයුතු වලින් (06) දින ඉවත් වි ඇත.
