අමායා උඩුවැරැල්ල –
-
දළදා මාළිගාවේ මහ දන්සැලේ ආහාර පිසින්නේ කටුකැලේ ජුම්මා පල්ලියේ නෝම්බි කැඳ හදන හැලිවල…
-
මහනුවර දිස්ත්රික් මුස්ලිම් දේවස්ථාන සම්මේලනය මැදිහත් වී පෝලිම් අවට සියලුම මුස්ලිම් දේවස්ථාන පැය 24ම විවෘත කර බැතිමතුන්ට එම දේවස්ථානවල වැසිකිලි පහසුකම් සපයලා… වැසිකිලි නඩත්තු කිරීමට පැය 24ම ස්වේච්ඡා සේවයකයින් යොදවලා…
-
පෝලිම්වල නිරාහාර ජනතාවට කෑම වතුර බෝතල් බෙදා දීමේ සද්කාර්යයක් මුස්ලිම්වරු අද සිට ආරම්භ කරලා…
සිරි දළදා වන්දනාව මනුෂ්යත්වය අවදිකර තිබිණි. ජාති ආගමික වාර්ගික භේද පිළිබඳ හැඟීම සුන් කර තිබිණි. මේ මහා වන්දනාවෙන් ලැබෙන උත්තම සමාජ ඵලය එපමණක් වුවත් එය සෑහෙනු ඇති බවට උපන් මහත් වූ ප්රහර්ශයෙන් මේ සටහන තබමි.
මේ වනවිටත් දිවයිනේ නන් දෙසින් පැමිණි ලක්ෂ හතරකට ආසන්න ජන ප්රවාහයක් මහනුවර දළදා දැක්ම වෙනුවෙන් රොද බැඳගෙනය. මේ මහා ජනතාව පෙළන බරපතලම තත්ත්වය ප්රමාණවත් වැසිකිලි පහසුකම් නොමැති කමය. එය රාජ්ය ආයතන මැදිහත් වී කළ හැකි ප්රමාණයක් තිබේ. ඒ සීමාව ඉක්ම ගොස්ය.
මේ වනවිට ඒ බරපතල ප්රශ්නය විසඳීම සඳහා ඉදිරිපත් වී ඉන්නේ මහනුවර දිස්ත්රික් මුස්ලිම් දේවස්ථාන සම්මේලනය ය. එහි සභාපති. කේ.ආර්.ඒ. සිද්දික්ය. ඔහු මහනුවර මහ නගරසභාවේ කොමසාරිස් ඉන්දිකා අබේසිංහ සමග සාකච්ඡා කර වැසිකිලි පහසුකම් සැපයීමේ ක්රමවේදයක් යොදා තිබේ.
මේ වනවිට දළදා වන්දනාවට පැමිණෙන බැතිමතුන් රැඳී ඉන්නා පෝලිම් ආසන්නයේ තිබෙන සියලුම මුස්ලිම් පල්ලිවල වැසිකිලි පහසුකම් ජනතාවට විවෘත කර දී ඇත.
මහනුවර මුස්ලිම් දේවස්ථාන සම්මේලනය, මහනුවර මුස්ලිම් වෙළෙඳ සංගමය, මහනුවර විද්වතුන්ගේ සංගමයේ නගර ශාඛාව, ඇතුළු පෝලිම් අවට පල්ලිවල ප්රධාන මුස්ලිම් පල්ලිවන හනසි ජුම්මා පල්ලිය, තක්කියා ජුම්මා පල්ලිය, නීරමක්ඛම් ජුම්මා පල්ලිය, එක්ව වැසිකිලි පහසුකම් යාවත්කාලීන කරමින් ජනතාවට පහසුකම් සපයා දී තිබේ. මේ සද් කාර්යය මේ දයාබර මිනිස්සු ස්වේච්ඡාවෙන් ඉටු කරති.
මේ වනවිට මහනුවර නගරයේ දන්සල් 511ක් ක්රියාත්මකය. දළදා මාළිගාවේ මහා දන්සල තිස් දහසකට දිනපතා ආහාර සපයයි. දළදා මාළිගාවේ මහා දන්සලට අවශ්ය දැවැන්ත භාජන ප්රමාණය ලබා දී ඇත්තේ කටුකැලේ ජුම්මා පල්ලිය ය. දළදා මාළිගාව වන්දනාවේ එන බැතිමතුන් වෙනුවෙන් දැවැන්ත ආහාර පිළිගැන්වීමේ සත්කාරයට යොදාගෙන ඇත්තේ කටුකැලේ ජුම්මා පල්ලියේ ඇති මුස්ලිම් බැතිමතුන්ට නෝම්බි ඇරීම සඳහා කැඳ සකසන විශාල භාජනය. ඒ සද්කාර්යයට මැදිහත් වන්නේත් මහනුවර දිස්ත්රික් මුස්ලිම් දේවස්ථාන සම්මේලනය ය.
මේ සියල්ලටම අමතරව මේ වනවිට අවබෝධ වී ඇති කාරණය වන්නේ මේ මහා ජන සන්නිපාතයට අවශ්ය ආහාර සැපයීමට දැනට ලියාපදිංචි වී ඇති දන්සල් 511ටත් ලියාපදිංචි වීමට පොරොත්තු ලේඛනයේ සිටින දන්සල් 120ට වැඩි ප්රමාණයටත් ඇති හැකියාව මද බවය. ඒ සම්බන්ධ සංවාදය ඇතිවත්ම මහනුවර මුස්ලිම් සහෝදරවරු බැතිමතුන්ට වතුර බෝතල් සහ ආහාර සැපයීමේ වැඩපිළිවෙළක් දියත් කරමින් සිටිති.
මේ අප දකින්නේ මනුෂ්යත්වයේ ප්රාතිහාර්ය ගැන කියන මහා ප්රායෝගික ක්රියාවලියකි. මිනිස්සුන්ගේ හදවත්වල ඇති සැබෑ අපේක්ෂාවන් එළියට එන්නේ මෙවැනි අවස්ථාවකදී ය. මේ ඉන්නේ සිංහල ජාතිය වඳ කරන්නට කොත්තු කැවූ බවට මීට වසර කීපයකට පෙර චෝදනා ලැබූ මනුෂ්යයන්ය. සිංහල අම්මලා වඳ කිරීමට පැලෝපීය නාල මිරිකූ බව කියූ ජාතියක මිනිස්සුය.
ජඩ ජාතිවාදය මේ රට ව්යසනයට ලක් කළා සේම මනුෂ්යත්වයේ හැඟීමෙන් සියලුම මනුෂ්යයින් එකතුවෙන මොහොතක ජාතිය මොන තරම් සුන්දර තැනක් කළ හැකි ද යන්න බව වටහා ගැනීමට මේ දැකුම් දෑසින් දැක ගත යුතු බවට යෝජනා කරමු.
දළදා වඳන්න නොවේ… මනුසත් උයනේ මල් පිපෙන හැටි දැකගන්න මහනුවරට ඇවිත් යන්න..
