ලලිත් චාමින්ද –
මාළු මිල ඉහළ යන අවස්ථාවලදී සාධාරණ මිලකට පාරිභෝගිකයන්ට මාළු අලෙවි කිරීමේ ඵලදායී වැඩපිළිවෙළක් ඉතිහාසයේ නොතිබුණා සේම මේ රජයටත් එවැන්නක් නොමැති බව ගාල්ල දිස්ත්රික් ධීවර සමූපාකාර සංගමයේ සභාපති පි.බි. ගාමිණී පවසයි.
හැමදාම සිදුවූවාක් මෙන් මුහුද වටකොට පිහිටි කුඩා රටක ජීවත්වන අප අයහපත් කාලගුණ තත්ත්වය හේතුවෙන් මත්ස්ය සැපයුම අඩුවන සෑම තාවකාලිකව අවස්ථාවකම ගිනි ගණනට මාලු මිල ඉහළ යන ආකාරය පාලනය කිරීමට තරම්වත් කළමනාකරණයක් නැති රටක් බව පෙන්වා දෙයි.
මත්ස්ය සැපයුම අඩුවීම හේතුවෙන් මේ දිනවල මාළු මිල විශාල වශයෙන් ඉහළ ගොස් ඇති අතර මේ හේතුවෙන් සෑම මත්ස්ය වර්ගයකම කිලෝවක මිල රුපියල් 1300 සිට 1500 දක්වා ඉහළ ගොස් තිබෙනු දැක ගත හැකි විය. රුපියල් තුන්සියයකට පමණ තිබූ ලින්නෝ කිලෝවක් රුපියල් 1300 දක්වා වැඩිවී ඇත. බලයා කෙලවල්ලා මත්ස්ය වර්ග වල මිල ගණන්ද අහස උසට ගොස් ඇත.
මේ පිළිබඳ අදහස් දක්වමින් ගාල්ල දිස්ත්රික් ධීවර සමූපාකාර සංගමයේ සභාපති පි.බි. ගාමිණී මෙසේද කීවේය.
“මත්ස්යයින් ගබඩා කිරීම සඳහා තිබූ ශිතාගාර පසුගිය රජය මගින් තුට්ටුවට දෙකට විකුණා දැම්මා. මාළු මිල අඩුවන අවස්ථාවලදී මත්ස්යයින් මිලදී ගෙන ගබඩා කිරීම සඳහා ශිතාගාර පහසුකම්
දැන් නැහැ. ශීතාගාර තිබුණා නම් මාළු වල මිල අඩුවන විටදී මාළු මිලදී ගෙන මාළු මිල වැඩිවන විට පාරිභෝගිකයින්ට සාධාරණ මිලකට මාලු ලබාදීමට තිබුණා. මේ සඳහා වැඩපිළිවෙළක් සකස් කරන ලෙස රජයෙන් ඉල්ලා සිටිනවා. “.
මේ අතර ඊයේ (31) පස්වරුවේ ගාල්ලට බලපෑ අයහපත් කාලගුණ තත්ත්වය හේතුවෙන්: ගාල්ල ධීවර වරායේ නතර කර තිබූ බහු දින යාත්රා එකිනෙක ගැටීමෙන් බහු දින යාත්රා විශාල සංඛ්යාවකට හානි වී ඇති බැව් ධීවර කාර්මිකයෝ පවසති. තවත් එක් බහු දිනයාත්රාවක් පෙරළී යාමෙන් හානියට පත්ව තිබුණි.
